最多人關心嘅問題
1. 歧視嚴唔嚴重？
好多人都話澳洲歧視好嚴重，但係我喺悉尼住咗咁耐，感覺自己真係俾人歧視嘅次數都係一兩次，通常都係啲鬼仔揸揸吓車發癲喺度笑人。澳洲以前發展得比較慢，好多人都冇接受過教育，10幾廿年前嘅歧視嚴重一啲都唔出奇。不過而家澳洲已經有好多亞洲移民同埋佢哋嘅後代，又批好多臨時簽證比唔同國籍嘅人，基本上成個Sydney 差唔多四成人口都係亞洲人, 華人同印度人特別多，其他亞洲人都有，基本上只要你唔好特別乞人憎，唔好夜晚一條友去啲治安好差嘅區其實好少歧視，反而大部份澳洲人都好友善。
2. 生活使費好貴？
好多人話澳洲生活好貴，除咗買樓同自己揸車之外仲有樣嘢都貴過香港。其實悉尼唔少嘢真係貴過香港，例如水電媒，上網，公共交通，呢三樣嘢你會feel到個使費係大左唔少。不過其實澳洲都有好多方法可以慳錢，如果識得用盡佢啲優惠，個使費絕對可以平過香港。例如水費可以講價，啲電器傢俬可以等減價嘅時候先買，公共交通如果識得用佢啲優惠除翻開平時返工日程$20港紙都唔使etc.
悉尼係貴不過如果識慳其實都可以平過香港。
3. 天氣好熱？
我見其他台有好多話悉尼夏天好熱。冇錯，係真係可以好熱，熱到40度都得。不過其實夏天個30度嘅日子唔多，基本上大部份日子都係23至30度呢個範圍，香港基本上七至九月差唔多日日都過30度，日夜溫又細，仲要鬼死咁潮濕，真心悉尼嘅夏天舒服啲。至於其他季節平均溫度都係低香港兩三度到，又冇咁潮濕，空氣又好啲，基本上係舒服版嘅香港。
4. 好多蜘蛛昆蟲？
無可否認澳洲真係好多好恐怖嘅蜘蛛同埋昆蟲。如果你住獨立屋要有心理準備遇到呢啲動物，至於蛇同蝙蝠，澳洲其實都好多，不過走入民居嘅機會唔大，主要都係啲小昆蟲同埋蜘蛛 （蜘蛛可以好大隻）
不過其實可以做Pest control減低有昆蟲入屋嘅機會，如果都係淆底建議可以住Apartment，悉尼啲apartment 樓價平過倫敦,質素亦都好過倫敦唔少。
5. 出街食嘢又貴又唔好食？
絕對唔係！隨着越來越多移民喺度開餐廳，基本上各國嘅亞洲菜都可以喺悉尼搵到，同埋由於係真係有嗰個國家嘅人開，質素好過喺香港食多多聲，至於價錢，悉尼一定冇香港咁多平嘢食，不過如果以相同份量相同質素悉尼可以平過香港。基本上$20澳幣 （即係大約港紙$110）樓下都有大把又好食又大份嘅嘢食，港式中式日式韓式東南亞etc乜柒都有，唔少嘅質素都唔差。
歡迎隨便問其他嘢，喺悉尼住開/住過都歡迎補充
