陳志雲嘅網上節目《Stephen‧傾》噚晚播出Jeffrey嘅訪問，Jeffrey乜都講，講到感情事仲非常大方，冇話好娘嗰啲唔好提唔畀講。Jeffrey咁靚仔，但佢話冇其他女仔會追佢，亦講到明唔會理，因為男仔唔畀signal人哋，件事係唔會work，「呢啲係互相吸引先得，冇得一個女仔衝過嚟就ok，你對人有意思先會嚟。」
Evelyn大Jeffrey4年，Jeffrey鍾意女友有內涵：「嗰時覺得呢個人好叻，出口成文，用成語溝通，呢個係咪老師？教中文？溝通唔到。慢慢中和下，我又變番有啲文化，佢又正常番啲。識我前佢好文縐縐，講嘢好似寫緊文⋯⋯我鍾意佢文縐縐，唔知呢，係個感覺。」陳志雲問佢公開女友會唔會影響事業？Jeffrey話：「以前都冇諗過入呢行，冇避忌；第二係就算我入呢行，避忌係冇用，一定知，依家啲科技咁發達；同埋你對另一半係要有承諾㗎嘛，冇人想做另一半要匿匿埋埋，唔fair，身為男人要公開。」Jeffrey態度果斷，陳志雲再話將來有咩轉變，就會被標籤負心？Jeffrey：「我唔怕，我唔會轉。（或者女友轉呢？）佢都唔會轉，我肯定。我哋嗰個感覺好夾。」
兩口子有聯名戶口，Jeffrey覺得無所謂，因為大家去到屋企人關係，毋須避忌。其實佢哋同居年幾兩年，Evelyn由女朋友、家人再變成經理人，在公在私都一齊，會唔會多咗衝突？Jeffrey承認大家喺工作上多咗意見，但只會畀大家了解更多嘅諗法，原來Jeffrey以前試過接job冇錢收，Evelyn錫男友，唔想佢俾人蝦，所以做埋經理人。
既然感情咁好，Jeffrey有冇諗過結婚？佢話想喺女友30歲前結婚，但女友覺得好早，「佢覺得我做好自己啲工作先。我有諗過求婚，要做到好surprise，去外國，整到記錄片，每次睇番都好開心，但婚禮唔會大搞，同屋企人相熟朋友食飯就算，但求婚嗰下要做得浪漫⋯⋯過多排再觀察下睇邊啲時機適合求婚，想喺一啲好靚嘅地方。」
至於會唔會想快啲有小朋友？Jeffrey話唔會，「喺依家香港呢個地方同階段，唔適合有小朋友，如果有小朋友都想送佢去外國讀書同有良好教育，我覺得要有資源、有足夠嘅嘢support到先會生小朋友。（外地讀書好重要？）又唔一定要外地，我同佢冇經濟困難先，呢個係最基礎，佢想嘅嘢畀佢學。」
節目中，Evelyn一直坐喺鏡頭外陪住，Jeffrey仲特登唱咗Dear Jane嘅《不許你注定一人》畀女友聽，好鬼冧～～
汁：囧報facebook
