住左溱柏四年，少少分享

本身住青衣，幾年前結婚搬出黎，budget有限，當時嘅考慮係要住新啲同近屋企，見佢半新樓，68E半個鐘直出青衣，所以揀左溱柏。一住就四年，喺度分享下少少資訊同感受俾有興趣既朋友。

個人覺得呢度自成一角，好清靜，屋苑算係grand(比起尚悅、蝶翠峰，有去過就知)，大量綠化，pet friendly。以呢度樓價黎講，配套同會所係一流(認真)，雙子式會所，幾個宴會廳可以打牌，一間乒乓波室，室內外泳池(超正)，室內兒童遊樂場，健身室，兩條保齡球lane，每座平台有西式bbq場。用設施另外收費，唔算貴，例如健身室/泳池每次十幾蚊。樓下有marketplace(算大)，7仔，一間好普通既餐廳，唔好期望好食，仲有間源生坊賣有機野。日常要有嘅野都買到，基本上冇咩要求或者懶嘅可以唔出去。

呢度新世界自己管理番，管理費每呎3.1左右，唔算貴，服務算幾好。有次露台去水塞左，半個鐘內有人上黎搞掂。

每座分兩邊，每邊一層四伙分兩部lift，簡單黎講每兩戶分到一部lift，算係好好，平時等十令廿秒就有lift，通常都冇人，好少同人逼。

呢度由二百幾呎開放式到四房都有，當年賣用料靚，全部單位有梗廚，配miele爐頭同焗爐。單位主要望市景/山景/內園景，隔局係四正，露台夠放大晾衫架，唯獨係牆身薄，隔音麻麻。

交通係好多人concern嘅問題，揸車嘅話車位見人放租4千內，平啲就旁邊爛地。揸車一般15分鐘左右出到大欖。

屋苑有廿八座shuttle，番工放工時間十分鐘一班，非繁忙時間十五分鐘一班。兩年前未開通十八鄉路出口就只有用公庵路出入，塞車起黎出體育路都用左十分鐘。而家開通左差好遠，繁忙時間去朗屏站十分鐘鬆啲。不過回程番去始終要經公庵路入，放工時間同假期十八鄉路轉入公庵路預咗會塞下。

呢度生話圈近教育路，元朗廣場嗰邊(尚悅就另一邊，近雞地)，唔介意行下嘅話，十分鐘行到出去教育路，大把野食，不過就冇瓦遮頭。

投資角度，有人覺得呢度山旯旮，唔方便，冇投資價值。有人覺得遲下有咩北部都會區，加上呢度仲係低水，大把水位升。真係睇你點睇。

個人覺得溱柏間隔好同屋苑靚係真，交通麻麻都係真。呢度適合鍾意靜啲/budget有限/區內客/唔係放交通於首位嘅人。住開九龍同港島多數唔會走入黎，同區如果鍾意旺同方便，一定揀yoho唔洗諗，當然價錢唔同。呢度定位本身就唔係賣方便，如果佢係近市中心，早就賣一線價錢。

總結兩句，唔介意花少少時間喺交通度嘅，呢度自住係舒服，性價比係高。希望呢個po提供多啲資訊俾大家參考下。

清準備移民？

直接開價啦

鄉黑地區，不了

開個價黎睇下先啦

咁黎唱好都有

日日比錢鄉黑賺

過時過節仲有免費煙花睇
泊爛地果d車食哂d炭屎

唔計豪宅果類 一般打工仔會住既分層戶屋苑都係交通位置主導個價
如果好似樓主咁講 "唔介意花少少時間喺交通度嘅"
咁大把山旯旮地方都係自住舒服架啦

第一次見業主自己黎連登唱好放盤

住開元朗嘅人邊會比你昆到
成個元朗最on9 就係果頭

元朗AA今期冇飯開？

Admin可以直接ban
直線廣告

hi AA

翹翠峰叫好啲啲
其他垃圾

尚悅衰D喎

1）十八鄉路逢星期六日例牌倒塞返去尚悅正門喎，起碼碌二十分鐘走唔甩
2）原築前面十字路口放燈時間極短，路口長期多車等燈3）溱柏唔近雞地，去街市又勁遠，冇理由餐餐foodpanda㗎，所以買餸煮飯又係一大問題
4）尚悅衰用料差，但衰極行去Yoho都仲得，地點冇溱柏咁西

有諗過買溱柏，但係交通係問題
行出教育路、大馬路要20分鐘
未計去朗屏站、元朗站
熱天，下雨天都未計
有接駁巴士，例塞，繁忙時間我唔知點預時間返工
果到係多年輕人租/買，但係交通係一大問題
如果退休 我會考慮買/住

筆直有限 家庭人士就洪水橋
溱柏開放式既差唔多價錢已經有2房
起碼一落街就輕鐵站、巴士站
唔洗行20-30分鐘
我寧願用依啲時間搭車都唔會行路
唔好買尚築，太入
買返輕鐵站附近啦