點知上個月，我再摸清楚，發現佢已經唔再係一粒野，而係腫咗一片野出黎。愈摸愈淆底，上網search話可能係痔瘡，即刻凌晨book咗醫生，放假就去check。
當日去到醫院，簡單填完問卷就等叫名。入到房，講咗兩句，醫生就叫我瞓上床，面壁當自己蝦米咁捲起自己。然後佢先用手摸，再查jel隊支鏡入去。
5分鐘後，佢就話「你痾屎太出力喇，情況好嚴重呀，唔做手術番唔到轉頭呀，出去約時間做手術啦。」
手術前一晚開始要禁食，水都唔飲得。朝早10點自己入院，護士姐姐簡單講完廁所喺邊同手術室喺邊之後，就帶咗我去間二人病房，叫我除哂衫除哂褲，只着醫院件上衣同褲。
換好衫，等咗陣，護士姐姐就帶我去做檢查。抗生素敏感測試、脈搏、心電圖，一切正常後，佢就幫我灌腸。痾完後番番房，我一邊碌IG一邊等叫我。
然後終於叫我了。
行去手術室，麻醉前一刻我都喺度諗「其實我又唔痛又冇血係咪真係要做手術?我宜家不如話走，佢地應該會俾我走?」
醫生同護士當然冇俾機會我諗，對多次名之後就開始幫我麻醉，下半身開始冇知覺後，我就趴喺床任佢地魚肉。聽住啲電鋸聲，吸血聲，聞到一陣陣燶味，feel到一兩下拉扯，手術就完咗。
我望下鐘，只不過係過咗20分鐘。
佢地推我番房之後，因為要等麻醉過，所以冇得用枕頭就咁瞓喺度等6個鐘。期間醫生入過黎解釋情況，佢先同隔離床位個女仔講，然後到同我講時，佢加多咗句「你會好痛架，唔好忍呀，太痛就叫護士幫你屁股打止痛針。」
6個鐘後，對腳啲知覺番番黎，但屁股可以話一啲都唔痛，隔離床位個女仔已經忍唔到打咗一支止痛針時，我仲可以輕輕鬆鬆行去廁所痾尿再上番床同屋企人講電話。
第朝出院番到屋企，第一日我keep住食少少野又瞓，因為冇屎痾所以屁洞都冇咩痛，行得走得。我當時以為自己係幸運兒，天生復原得快過人。
第二日係地獄嘅開始。
坐浴完咗後突然有股屎意，因為好驚會爆傷口，所以輕輕咁推啲屎出黎。痾嗰下唔痛，痾完開始赤赤痛，即刻再裝盤熱水再浸多次坐浴。完咗就食咗粒止痛藥，我以為就咁就完，我捱過咗。
點知今日(第三日)先係重頭戲。
因為有尋日嘅經驗，我浸完坐浴，充滿自信咁開始痾屎。痾完後，一股前所未有嘅劇痛由屁洞延展去陰道口，好似下半身由個屁洞開始裂開咁，企又唔係坐又唔係，即刻用熱水坐浴諗住舒緩都係冇用。
喺廁所崩潰大嗌咗五分鐘，痛楚毫無消減下，我捉緊我最後一絲嘅理智抹乾淨出咗廳開始邊喊邊大叫，因為連搵止痛藥嘅能力都冇，大叫室友幫我搵藥，食完藥瞓上床，都係忍唔住係咁叫，同眼淚忍唔住係咁流。
個人開始好暈，同係咁震，每一下心跳都連去個屁洞，每跳一下佢就好似刀埇咁痛一次。
真係好痛。
崩潰咗30分鐘後，藥效開始黎料，室友見我冇再大叫，開始同我講野，但我個人好似去咗另一個世界咁，完全虛脫咗，咩都講唔到，只係呆咗望住天花板，眼淚繼續流。
宜家距離我剛剛痾屎雖然已經過咗7個鐘，但屁洞嘅刺痛仍然持續，每一下心跳佢都跟住抽痛一次。人地話生仔係10級痛，而做完痔瘡手術嘅痛有7到8級。我開始思考人生，同埋我真係好後悔，點解我到三十歲人都唔識點痾屎，搞到我要做呢個手術。
各位究竟痾屎應該點用力? 有冇人可以答我呀?
