事源從來無打算養貓，但有一日等巴士，見到馬路有隻黑色貓b鍾下鍾下咁行，就放返去行人路，但佢一直企係度，無再走過，係咁喵喵叫，果一刻就覺得緣份到，就買東買西，張羅晒所有野，去迎接新家人。
點知聖誕果日，佢突然無精神，唔食野，所以漏夜帶去急症，發現腎指數高，懷疑中毒，但自問無野令佢中毒，之後住咗一個星期醫院，吊左幾日鹽水，所有指數落返正常低嘅水平，所以出院，打算之後再謹慎啲，令佢健康開心成長。
但呢幾日佢肚屙，純粹想去睇下係咪有蟲未杜晒，但都覺得順便再check多次指數，點知又高。所以醫生懷疑係腎天生唔好，所以照超聲波，一照就知原來佢係天生對腎偏細，比起同齡（4個月幼貓）細，所以功能上都係差，令佢腎指數會高，一直累積，長久會比同齡貓早有腎衰竭等問題。
醫生話無野幫到，只有腎糧同多飲水，延緩病情，但我好想再努力一下，明顯應該係貓媽媽知佢養唔大，唔要佢，但佢正正就出現咗係我生命，我會代替佢媽媽比最大嘅愛佢，盡所有努力去養大佢，照顧佢，見到佢向人類求救，佢都應該想生存，要我放棄，我唔想。見到佢日日喵喵叫，跑跑跳跳，我想佢可以感受耐啲呢個世界。
所以想請教咁多位有經驗嘅大家，有冇遇過咁嘅情況？如果咁樣可以點做？有無咩醫生可以幫助到佢？請大家可以幫幫我，有無獸醫界朋友可以指教一下？或者邊啲group可以問到多啲意見？因為以前嘅天下貓貓一樣貓教無咗了。
謝謝睇到呢度嘅大家，無以為報，送上我家主子嘅圖🐈⬛❤️代ミちゃん祝大家新年快樂，身體健康。
