本地電召貨車apps惡鬥連場,繼CALL4VAN上週宣佈宣告結業及轉型後,行內兩大app GoGoVan及EasyVan,亦陷入唇槍舌劍之中,爭個你死我活。
近月,GoGoVan及EasyVan先後獲得一千萬美元融資,被譽為港產科技神話。
記者訪問GoGoVan創辦人Steven,他竟然爆出EasyVan創辦人周勝馥,一年多前扮投資佢公司,實為套晒佢所有料,然後自己開一檔,同GoGoVan打對台。
Steven稱透過朋友認識周勝馥,聽到周話有意投資,就將成盤生意經講晒比對方聽,仲要冇簽過任何保密協議或非競爭協議,點知最後投資傾唔成,反而市場上極速多咗間EasyVan。Steven自認蠢咗,但就學懂了帶眼識人。
記者搵過EasyVan,但對方就話唔回應,表示現階段只會專注提供更好嘅服務,同埋諗計與對手競爭,睇嚟呢場電召貨車apps大戰,真係長鬥長有。