《IT狗》貼馮德倫相 獲本尊回覆:下次叫埋我參與
「Johnny仔」感激馮德倫 令佢絕處逢生
《IT狗》播出至今,一直成熱話。連劇中被貼相嘅馮德倫都有留意。
噚日佢喺IG post出被貼相嘅劇照,寫着︰「We need good comedy👏Next time don’t just use my photos, ask me to join 😝(我哋需要好嘅喜劇,下次唔好淨係用我張相,叫埋我參與。) #it狗 @andylofai」跟手仲召喚埋編劇羅耀輝及出品人魯庭暉。
開到口下次預埋佢玩,劇中飾演佢大學同學,仲俾「paypayduck」上下誤會係佢男神嘅彭秀慧即留言︰「我係真心㗎」,《IT狗》導演簡君晉留言︰「Thank you」。事後導演回覆《娛壹》,佢話︰「馮德倫同監製羅耀輝(Andy)係老友,《老馮日記》就係羅耀輝編劇,可以合作梗係好啦!」
馮德倫除咗同劇中監製係老友,佢亦係劇中飾演「Johnny仔」鄧子超眼裏嘅恩人。劇裏佢啲畫作喺「NFT」大賣而致富,現實鄧子超開設茶餐廳嘅父母,因誤信朋友致家道中落,仲欠下百萬巨債,面對家庭陷入困境,鄧子超絕望之際,卻收到馮德倫搵佢拍攝陳奕迅《倒帶人生》MV嘅電話。
去年鄧子超喺IG重提13前呢件事,寫道︰「2008年既今日,一個願意給我第一次演出機會既(嘅)導演就係你馮生,那時第一次演出酬勞係$900,落樓即刻打畀媽,那刻應該係人生喊得最崩潰既一次,那時全家經濟陷入困境並欠債百萬,同媽講我有錢買野(嘢)食畀自己,今個月唔駛擔心我,然後買左(咗)兩箱印尼撈麵,食了一個半月,期間我也終於揾到工作,香港其中一個主題公園,前面是絕路,希望在轉角,呢句電影對白係當時每天同自己講既(嘅)座右銘。」
事隔多年,佢喺《IT狗》一幕親手將馮德倫相片貼喺牆,「Johnny仔」鄧子超同《娛壹》講︰「拍呢一場戲,心情係好激動,但身旁一班演員並不察覺。別人眼中$900酬勞可能係細數目,但對於當時處於困境嘅我,卻係好重要,好多謝佢俾我機會演出,仲係第一個有酬勞嘅演出。」
#娛壹