最近賽事見到大部分有潛力的4歲馬都交出應有水準,像剛周日兩組三班賽「醉眼光」搭「旭日昇」,「浪漫勇士」與「幸運有您」,雖然大熱Q,但普羅馬迷過關都不太乏味,最重要幕後可以搶到分,令稍後的4歲系列賽更加精彩。
跑法勝在靈活多變
第6場二班只得「黑桃火箭」有機會參與4歲馬大賽,不過牠的終極目標應是打吡,今場一哩預期會有更威脅走勢,卻未必可一步登天。「美麗同享」於西澳洲4戰全勝,本來部署進軍上季大賽,可惜經典一哩賽後便因傷缺陣。今季加盟東廐首戰配潘頓以玩敵姿態贏馬,上次外檔上前,直路走不利內欄仍保住亞席。查上季初在希廐時早已試過谷閘捉住領放帶到,本身得1026磅馬仔,急彎窄場照計更合腳法,如你有翻看其於澳洲時贏馬表現,放頭、居中、留後,任何跑法都得,就算今場有快馬自己未能領放,安守三四位鬥後勁亦無不可,5歲馬健康全面養回追落後。
莫雷拉照例一手重兵,尾場「旋風飛影」上季新馬班只不敵「加州星球」,後駒剛戰再勝評分已破百,「旋風飛影」上場落四班負頂磅掟大彎仍勝,終於顯露真面目,因為輸兩場才換來38元W。「豪華房車」子嗣本來就需要熱身提升狀態,廐侶「醉眼光」有辦你睇,「旋風飛影」可以一出即勝定非凡品,就算加6分至66分仍大有水位,輕磅更好衝。