16歲嘅呢一日，可以話係我人生嘅轉捩點
我成功入選咗香港年青訓練員培育計劃
終於可以透過離開呢個不值得留戀嘅屋企
去譜寫屬於自己嘅人生喇
呢個計劃會正式將訓練員ID頒授俾通過挑選或考試嘅年輕訓練員，並將佢地分成小組，希望佢地能夠結伴上路，一齊為香港嘅Pokemon聯盟作出貢獻
「歡迎大家嚟到沙田市pkm centre，我係沙田市嘅喬伊小姐。今日就係我地一年一度嘅年青訓練員培育計劃開始嘅日子，請大家首先望下貼咗喺大堂嘅名單，聯盟已經將大家各自配對成小組，希望大家可以互相扶持，喺訓練員嘅道路上走得更遠。雖然係聯盟配對嘅小組，但亦都唔代表大家必須要做朋友或者一齊行動，純粹係俾大家一個交朋結友嘅渠道。」
喬伊小姐掛住招牌笑容再花費兩小時講咗一啲聯盟訓練員嘅權利同義務，簡介咗香港地區嘅地理環境同分區blablabla一輪，終於嚟到我最緊張嘅環節
「各位參加者相信都已經急不及待想認識自己嘅朋友仔喇，係咪先？不過，喺正式分組認識之前，請未持有Pokemon嘅新晉訓練員沿地下黃色線排隊到護士站，我地會逐一為你提供新人用嘅Pokemon作為你嘅初始伙伴」
我深吸一口氣，然後起身行往護士站。
坐椅移動嘅聲音並唔多，我回頭一望，發現原來在場200人當中，同我一樣要領養代替購買嘅人根本不足20個，令我再次體會到低下階層嘅悲哀。
我當堂屌咗一聲，心諗：「仆你個街，乜咁多人本身有pokemon嘅？我仲以為嚟得都係同我一樣窮到買唔起」
我個心跳得愈來愈快，不斷諗如果唔係我鍾意嘅pokemon咁點算好？如果係好弱嘅pokemon又點算好？如果係好難馴養嘅pokemon又點算好？
「膠毒係咪？呢度係三個各地研究所捐贈嘅精靈球，入面各有一隻Pokemon，你可以揀一隻帶走。」喬伊小姐將三個精靈球放喺我面前嘅櫃枱
我順序拎起三個精靈球之後，發現入面分別有呱呱泡蛙、木守宮同埋小火龍，咁我嘅選擇係....：
1. 呱呱泡蛙
2. 木守宮
3. 小火龍
頭10票入面最高票數嘅做結果
