變形蟲 （Amoeba）
只要係嚟自郊區嘅水或者其他污水例如游泳池都好大機會搵到。變形蟲嘅種類成千上萬咁多，大部分都唔會危害到人嘅健康。但飲受污染嘅水都有感染少數致病變形蟲嘅風險，所以無清潔過嘅水最好都係唔好飲啦。下面呢張圖可以見呢隻變形蟲喺度準備吞噬個藻類
有啲實在行得太慢啦，所以加快15倍
不過確實越清澈嘅水搵到嘅微生物係越少。今次拎咗污濁少少嘅水睇，可以見到好活潑嘅畫面。
其中草履蟲（Paramecium)嘅數目可以話係非常之多。大量草履蟲圍住個氣泡，原因係佢哋鍾意聚集喺氧氣較多嘅地方。佢哋嘅繁殖速度極快，之前試過拎咗啲水返去，明明一開頭得好少，兩日之後變咗成缸水都係。久而久之開始覺得呢種微生物好煩
仲有嘅就係棘尾蟲（Stylonychia)。圖入面最大嗰隻就係佢嚟。大家細心啲睇可以見到佢身體入邊有啲綠色嘅嘢，嗰啲其實係佢吞咗落肚嘅藻類。嚴格嚟講只要佢放得落口嘅嘢佢都會食。佢有一個重要嘅特徵就係尾部有三條棘毛。
再放大啲嚟睇其實見到好多細菌喺度游嚟游去。不過至於佢哋係乜嘢菌由於我屋企唔係化驗所無得種菌所以無從得知啦
由於郊區嘅水其實有好多好多嘅生物，認真介紹嘅話其實有排都未介紹完，所以遲啲我會再po出嚟俾大家睇
雖然我今日介紹嗰啲大部份都係無害嘅原生生物，但唔代表水入面無致病嘅細菌同埋病毒。只係因為器材所限睇唔到有咩種類嘅菌同埋病毒
結論：山水好鬼污糟咪飲咪用嚟洗手
