轉載Dcard: 新手一日去咗香港三間maid café

嘉美尤男人的名字 2021-12-22 12:21:05

第三站：全日最佳體驗

離開第二站大廈，過馬路再行幾個街口就到第三站大廈。根據資料，第三站於香港maid café當中算經營得耐，聲譽唔錯。上到13樓，同層有一間酒吧。右轉就搵到maid café門口。Maid café以黑白色做主調，地板係黑白相間嘅方格，7-8張枱，面積九百幾呎。最顯眼嘅，係目測至少三米乘七至八米大嘅表演台（其實好似再大啲），projector screen播住虛擬偶像嘅演出，音樂活潑輕快。

去到嘅時候，店內並冇其他客人，三位女僕坐喺度傾偈。見我入嚟，女僕進入工作mode，上前幫我消毒，好似有量體溫（唔sure有冇記錯），以及示意我scan安心出行。坐低之後，女僕送上清水，跪喺枱旁邊，同我講規則只要係人嚟就唔會違反到，望一望就好，跟住介紹餐牌內容。而家回想返起，呢一站係惟一有奉上清水嘅café。

呢度消費冇上一站咁貴，一個主食加一杯飲品，好似都係百幾至二百蚊。餐牌上有個二百中嘅套餐，包含主食一份、女僕調製嘅特飲一杯、甜品一份、即影即有一張同埋可以指名一位女僕上台表演。有意思。我喺atm撳夠錢上嚟，有心見識見識，就揀呢個餐啦。主食一樣都係點蛋包飯，女僕問我想指名邊位女僕沖特飲同埋表演，我話冇所謂。三位女僕一字排開，再問我想揀邊位表演。我第一次嚟，坐低冇耐，真係唔識揀，就話你哋邊個想表演就表演啦。見我真係揀唔到，女僕就話咁佢哋等陣自己deal啦。而家回頭細想，話唔定我揀邊位會影響佢哋佣金之類？下次都係自己揸定主意落個決定，無謂麻煩到人。

之後有一對情侶入嚟，似乎同係生客。女僕們照樣呼佢哋入內，介紹餐牌點餐。等緊餐點，女僕主動過嚟傾偈，問吓我以前有冇去過其他maid café，又問我點搵到呢度。我話今日之前未去過maid café （語言藝術，冇講大話@@），話好奇女僕café係點，成日聽人講自己又未去過，所以上網search吓嚟體驗吓，自己親眼所見最真實。之後另一位女僕由廚房衝出嚟，問我特飲有咩心水，我都係話冇所謂。女僕入返去轉頭又衝出嚟，問我想要奶類多啲定梳打類多啲，有冇咩唔飲，怕唔怕泡沫。我話飲梳打類，冇嘢唔飲冇嘢怕。

係時候描述吓三位女僕。三位女僕身穿黑白女僕裙配黑絲襪，風格同網上見日本啲maid café女僕差唔多。三位女僕其中一位係當日限定，會去唔同café返工，另外兩位應該較常喺度上班，一位深色頭髮，一位頭髮有highlight。負責煮嘢同調飲品嘅，係駐場嘅兩位女僕。其中幫我沖特飲嘅，冇記錯係頭髮有highlight嗰位。三位都係靚女嚟。連登仔可能會話唔靚，落妝嚇死人之類，但喺一般人眼中絕對係靚女嚟，highlight頭髮嗰位眼大大幾可愛添。

調好嘅特飲係天藍色嘅梳打，表面有奶泡沬同士多啤梨。味道正常梳打咁，飲落唔錯。女僕又再同我傾吓偈，問我有冇睇咩動漫之類。蛋包飯煮好，女僕放低蛋包飯嘅時候，再三道歉話唔好意思，啲蛋煮得熟咗少少。其實都唔算熟得過分，同我喺第二站食嘅差唔多，但就冇第一站煮得咁好。可能佢哋對自己要求高，再三道歉，我話冇咩所謂唔緊要。限定當值女僕問我想畫咩，我照樣問佢通常會畫咩。都係畫貓，咁就喺碟同蛋上面畫咗隻幾貓，表情幾盞鬼。之後hightlight頭髮女僕同限定當值女僕帶領我一齊吟咒語施魔法，氣氛幾好，確係有趣。蛋包飯味道不俗，不過我今日已經食咗兩個，仲同舊同學食咗其他嘢，實在有啲飽，惟有一啖一啖慢慢食。

食嘢途中，另一位客人入嚟。原來佢係熟客嚟，已經嚟咗七年，駐場女僕都認得佢。外貌小毒，但係正常人嚟，唔似上一站嘅客人A咁恐怖。深色頭髮女僕本來喺廚房做緊嘢，由廚房出嚟招呼佢，跪喺枱旁邊陪佢捉棋，服務態度相當好。

Highlight頭髮女僕同限定當值女僕都不時走過嚟，同我傾吓偈，又同另外嗰對情侶傾吓偈。食得差唔多，女僕們開始set台準備表演。枝咪壞壞哋，研究咗一陣終於用到，限定當值女僕上枱唱歌。女僕之前有問我想聽咩歌，我一再表示冇所謂，佢哋唱咩有信心就唱咩咁就可以。表演期間，唔可以拍攝、唔可以去廁所、要專心聽，總之正常你會expect到嘅規矩啦。女僕唱嘅係一首初音嘅歌。偽毒嘅我其實一首初音都唔識，不過女僕唱得好聽，冇失場每個音都唱到。表演台有燈光效果，台下兩位女僕又帶大家打吓節奏咁，氣氛相當熱烈，在場各位都應該聽得好開心。

之後上甜品，係朱古力曲奇餅同雪糕，忘記咗叫咩名。味道正常，同正常會expect到嘅味道差唔多。Highlight頭髮女僕問我中唔中意玩board game，話等我食完同我玩吓board game咁，我當然話好。食雪糕途中，見到第四位女僕出現，身穿橙色女僕裙，類似逆轉裁判3真宵嘅女僕造型。不過佢應該落咗場休息緊，非工作時間，出一出嚟又入返店內裡。

食完甜品坐多陣，highlight頭髮女僕拎咗盒board game嚟同我玩。Board game係一個睇圖案鬥快出卡牌嘅遊戲。第一局佢贏，第二局我贏，唔知佢有冇特登讓我。女僕識得搞氣氛，係玩得開心嘅，如果多啲人應該仲好玩。之後佢問我覺得今日體驗好唔好，又主動搵話題同我傾，講吓蜘蛛俠又講吓迪士尼樂園咁，氣氛愉快。

傾得差唔多，同埋我食太飽肚漲漲好辛苦，都係時候離開。同highlight頭髮女僕合照即影即有，女僕喺相上面寫啲字畫啲公仔。落樓價二百中，愉快地離開。

總結

一日三個蛋包飯，飽到上心口。喺旺角散步行咗好耐，消化得七七八八，先搭免費車返歸。概括而言，今日maid café一日遊嘅體驗相當好，唔似網上連登仔講到咁不堪。當然你唔能夠期望過好，畀百零二百以為自己去咗夜總會，全程有人陪住。視其為氣氛愉快啲嘅café，輕輕鬆鬆坐吓食啲嘢，有人笑住serve你，間中傾兩句，體驗相當唔錯。

總體嚟講，今日喺第三站體驗最好，氣氛最好玩得最開心。第一站雖然人多，但氣氛夠熱鬧，食物最好食，價格最相宜。第二站環境最大，算最好坐。全日所見，最靚嘅女僕係第二站嘅女神級一日店長，其次係第三站嘅highlight頭髮女僕。將來如果喺旺角行到攰冇碇去，都會考慮上去第一站或者第三站坐吓食嘢。

以上就係報告全部內容，由一個中意認真哋做無謂嘢嘅膠人所寫。寫到呢度，唔經唔覺寫咗五千幾字。一方面係我自己中意做無謂嘢，尤其同五年女朋友分手之後，而家時間多咗錢又多咗，寫吓嘢可以打發時間冇咁寂寞。另一方面都係當拋磚引玉，支持港語寫作。港語寫作要發展起嚟，總要有無謂人寫吓無謂嘢，唔可以個個都aim做港語寫作嘅董啟章或者九巴刀。當年大一文概學過啲咩，已經忘記得八八九九。散文嘅六大功能係咩，一個都諗唔起。希望呢篇五千幾字嘅遊記唔算太失禮，唔至於傷人眼睛啦。

多謝大家睇到嚟呢度，完。有需要可以隨便轉載，但請註明轉自dcard。

21.12.2021

MH頭痛 2021-12-22 12:22:59

一個otaku指責另一個otaku.jpg

阿璇 2021-12-22 12:30:15

客人a