各位香港人，我地係無名小隊。「無名」係因為我地真係無名，只係幾個原本互不相識嘅手足組成嘅小隊，成員有流亡，有入獄，亦有仲留係香港堅持嘅人。
入正題，今次獅子山上嘅直幡係我地既隊員掛上，目的就如直幡寫一樣，呼籲各位香港人杯葛今次嘅選舉，不投票。
有少部分人可能會想投俾所謂「獨立民主派」嘅人，佢地只係一班用花言巧語嘅政棍，話要特赦（手足本身就唔應該判有罪，消費手足），又話唔可以清一色，要入去鬧政府（鬧政府有用嘅話，我地2019打生打死為咩）。佢地入去只係幫港共演好場戲，佢地嘅角色就係忠誠反對派。再者只要睇下係咩人提名佢地，你就會清楚佢地真實背景（立場新聞有得睇）。呢幾個月都有不同聲音，究竟係「唔投票」定「投白票」，老實講我地認為互有利弊。重要嘅係集中一個方法去做，先可以達到最大效用。
原本我地寄望流亡海外既「政治明星」會達成共識，然後發表相同方法去引導香港人作出選擇。可惜最後見到有人「唔投票」又有叫人「投白票」，分散力量。
正如本文開頭所講，我地希望香港人集中力量，19號「不投票」，將投票率拉到最低，狠狠地刮港共一巴！
我地高估咗班狗嘅能力，其實條直幡尾經掛咗好幾日，點知班廢柴咁遲先發現，原本叫大家「不投」嘅力量已經減弱，不過都仲係想話俾大家知，仲有好多手足仲未放棄。
光復香港，時代革命！
無名小隊 12－2021
