懶人包：
懷疑係重度弱智既事主係香港Moynat專門店買咗個4皮幾野既手袋，用咗一日之後個袋既金屬扣內側有嚴重刮傷。送返原廠後原廠認定並非手袋本質品質問題，如果需要補救只可以成set金屬扣更換，費用3950大元。事主覺得委屈，而家縮緊入被竇度喊，特此警世。
FAQ：
Q1. 係咪用家自己問題？
A1. 事主返Office工，正常使用，一日開袋唔超過10次，身上冇任何尖銳硬物可以刮傷個金屬扣。金屬扣可以誤扣既位亦都冇尖銳部件，咁都話用家問題，事主冇野好講啦。
Q2. 係咪針對Moynat既打手？
A2. 做打手做到為咗唱衰對家個名真金白銀比4皮幾野，苦肉計到第二日就搵野刮爛個袋，black and white儲足子彈再放上黎連登，做咁Q多野仲要唔知有冇人support，你係老細你批唔批呢4皮唱衰人呀？
Q3. 咁你想點丫？放上連登唔會幫你爭取到免費維修架喎？
A3. 冇架，個袋爛咗就爛咗，事主放上黎一部份係想發洩，另一部份係唔想再有同樣既悲劇發生係其他人身上。
【TLDR警告】正文，附圖可能使人不安【TLDR警告】
是咁的，事主睇中咗Moynat既一款手袋，個款同色係下面咁樣既(圖片來源：官網)，諗左好耐終於係11月8號晚買咗佢aka事主人生中第一個精品手袋番屋企，準備日日開心使用，靠精品手袋建立自信。
經過足足一個工作日，自信增強效果非常顯著，返工收工揹住個袋果下覺得自己直頭上等過唐太宗活絡油。點知第二日就黎料啦，事主發現個袋既金屬扣內側，冇錯係內側，刮到全個袋都花曬都應該未輪到佢花既內側，竟然有好幾條深過額頭火車軌既刮痕。事主當堂嚇一跳，然後就真係笑唔出啦，收工即刻殺去專門店求救，Sales當日offer左免費送返原廠檢查既服務，過程大概要幾個星期，而事主就因為想考慮清楚&唔捨得咁快送走個袋所以係拒絕左既。Sales就幫手係其中一片金屬扣上貼番膠膜做暫時既保護措施先。
再過一日，事主發現有粒螺絲個頭摸落同其他螺絲有少少唔一樣，有少少凸同刮手，懷疑係品質有問題，於是決定送返原廠檢查。最後係11月13號又走返去專門店要求送返原廠。Sales當日係承諾如果確認有品質問題，一定係免費會換過成set扣既（PS無錄到音）。即日就開左張After Sales Service既quotation，事主就放低左個袋靜候佳音啦。
(圖為當事螺絲)
11月24號事主收到電話滿心歡喜，諗住有d咩好消息啦。結果係Sales打返黎話原廠檢查後確定刮痕唔係由粒螺絲造成，亦都唔係產品品質問題，如果需要更換成set金屬扣就要比3950大元，接近個袋既10分之1價錢。受到原廠回覆同產品品質驚嚇既事主就同Sales有左以下呢段對話啦：
故事至今都未完結，個袋未返到黎，事主個心仲係滴緊血既，第一次買精品袋既體驗真係好似過山車咁。不過皮既部份係值得一讚既，企身得黎摸上手唔鞋，內籠既珍珠小牛皮摸上手非常smooth，摸到唔捨得冚返埋個袋，但基於以上既消費體驗，事主只建議以下人士購買呢個牌子既袋：
覺得皮靚就得，金屬位don’t give a single fuck既人
覺得發生係事主身上既事絕對唔會發生係你身上既人
唔捨得/唔想補多少少買某H字頭品牌既人
立志加入扶貧行列既人
警世完畢，冇咩事事主返入被竇爆喊先。多謝大家。
