簡介
《Star Wars: The Clone Wars》(星球大戰：複製戰紀)包括一齣電影及七季共133集電視動畫，講述EP II、III之間為期近三年嘅複製人戰爭。主角團除Anakin Skywalker及Obi-wan Kenobi外，加入咗Anakin徒弟Ahsoka Tano同複製人隊長Captain Rex. TCW由2008年10月起首播，直至2013年3月腰斬，其後兩次於2014年及2020年復活，中間亦有出版後續小說及漫畫。
TCW係一部選集劇(Anthology)，即由短篇故事(arc)組成嘅非線性敘事，各人輪流擔當主角。第三季中期(3.10)打後基本統一播放及實際時序。一個story arc兩至四集不等，第一二季偏好同一事件，用三個人物去寫上中下集，每集間較獨立；而後期四集一故一視角就更緊湊連貫。
觀看順序方面，跟時序睇最清晰。TCW一部分魅力喺嚟自佢亂咁嚟——而不限於劇情安排，甚至因其選集特性，可自選感興趣故事先睹為快。arc同arc之間相對獨立，每集開頭亦有旁白回顧，所以不必太介意次序或特意一集接一集追劇。
由於散敘較空泛，貫穿全劇七季嘅主線可謂作為觀眾代入嘅Ahsoka其角色成長。其他支線有長有短，亦會互相重疊：複製人身份、戰役、政治、賞金獵人/Boba、Mandalore、黑暗面/Maul、原力...... 諸線從第五季後期開始會流。大結局總結Ahsoka、Maul、Mandalore、複製人幾條主線，同步EP III。
入門
假如已下定決心追完，我推薦繞過電影，先由1.01-1.04開始。Yoda打頭炮嘅第一集中見到佢EP V古怪、mentor嘅一面，亦見其前傳時期嘅劍術高超。1.02-03介紹某人嘅最愛Plo Koon，Ahsoka嘅衝動亦事出有因，更見Anakin耐心。1.04由Obi-wan壓軸出場迎戰Grievous，以前傳三人組重聚一幕作結。第一二集嘅複製人外表、性格多變均令人印象深刻，劇情更引導觀眾同情炮灰設定嘅一班士兵，令佢哋變成有血有肉嘅軍人。比起節奏、情節受兩個故仔合併所礙嘅大電影，第一季頭四集受眾更廣，亦奠下劇集基調：Jedi主角嘅單元冒險及複製人嘅人性化描寫，再補充前傳電影略述之政治社會環境，鋪墊帝國崛起。
假如想試味，可選看3.18-3.20。動畫中期畫面進步，三集中節奏、人物描寫駕輕就熟，有Jedi有Clone，有動作有冒險。故事簡單直接——劫獄，又不失war ethics文戲及師徒鬥嘴，更可欣賞嚟先自EP IV嘅客串嘉賓。
而家望到gucci 海報，都唔會覺得佢係kylo ren條on9仔
