講下我嘅情況先
喺6月嗰陣有晚瞓瞓下好痕，發現個肚有幾粒紅腫，但細細粒又唔似係比蚊咬。嗰陣冇意識到係蝨，直到過咗半個月連條女都咬到成身都係，又見到大大隻蝨喺張床度先知仆街了
跟住講下我試過咩方法1. 殺蟲水(冇用)：一開始乜都唔識，走去惠康買殺蟲水。但因為養咗三隻貓，所以只可以用啲人畜無害嗰啲款。結論係冇撚用嘅！
之後都冇再用過任何市面上嘅殺蟲產品。2. 密封床笠(有啲用但唔係主力)：跟住買咗嗰啲全密封床笠，諗住封死床褥啲蝨，但過兩日個床笠都佈滿黑色一點點嘅蝨屎
我唔敢講完全冇用，因為佢原理係要餓死啲蝨，但起碼要封足一年先可以打返開。我暫時都未拆返落嚟，所以唔可以作準只能夠話如果床褥有蝨，咁床架一定更加多3. 蒸氣掛燙(好有用)：哩個一！定！要！有！求其買個自己覺得易操控嘅就得。google或者連登搵任何關於滅蝨嘅post都一定會叫你買蒸氣掛燙，因為係清潔床褥同床上用品其中一個最有效嘅方法！如果有蝨喺你面前，用掛燙最耐噴2秒都一定死。
3. 火槍(好撚柒鳩有用)：雖然蒸氣機有用，但對蝨蛋冇乜殺傷力。我係用IKEA Hemnes嗰款日間床，所謂嘅床板係由一條條木條鋪出嚟。最後我搵到個蝨竇就喺啲木條嘅窿罅位，拆出嚟見到啲螺絲窿勁多蛋
我自己就用火機咁細支嘅火槍，貪佢啲火細細條，精準度高啲。因為啲蝨屎會集中喺某幾個範圍度，我跟住啲屎搵到邊條木係重災區，蒸完之後就搵支火槍每條木條掃幾次，然後對正啲蝨蛋噴。蝨蛋好似白米咁但再細粒啲，一噴中就會聽到啪一聲爆開
多起上嚟就會啪啪啪啪啪啪啪啪好撚爽4. 皺紋膠紙(有用)：燒完啲木條我都未係好放心，所以就買咗皺紋膠紙將啲木條360度咁包住，等佢地冇位生存，淨係留返啲螺絲口裝返好張床。去到哩步其實已經冇晒嘢咬，一直到而家
最後就係如果張床有櫃桶，一定要搞埋佢哋！擺喺入面或者附近嘅任何衫褲鞋襪最好都全部拎去洗衣舖，佢哋會識搞。就算拎去洗衣舖，都要逐件拎出嚟噴下蒸氣，見到有蝨就掉咗佢，唔好撚懶
