由於係零食物語就可以攞到$100 coupon，所以個個都係攞住coupon去食，第一次walk in話full晒，第二次去都係話full所以我地就直接book，間野full到打唔到電話去book，而openrice又見唔到差成💩咁嘅評語，原價$298減完coupon再加一嘅價錢，覺得可以一試。
去到琴晚我地7:45入坐，等咗大約20分鐘開始黎頭盤同刺身，因為食之前心情好都仲未覺得有咩，頭盤嘅炸雞已經唔凍又唔脆，但因為好肚餓所以食晒，諗住頭盤先係咁姐，點知之後黎料～
我地坐到大約8:45pm，除咗頭先講野食物外，只係黎咗一串炸雞皮，由於我地驚浪費食物，所以諗住每樣叫一份試下味，但開始覺得唔對路，就再order咗幾樣，當時已經冇晒西冷同唔記得咩……嗰陣已經覺得食放題都可以冇晒？
不過咁都算，諗住啲人開始走，佢地人手應該夠啦掛？直到9點，見到隔離枱一位阿姐叫咗個經理過去，問佢點解連主食都未到，跟住其他枱都開始有聲音，跟住個經理就即刻畀咗碟蝦嗰位女士嗰枱。
係嗰位女士叫個經理之前，我已經不停舉手想催下啲單，但係完全冇人理我。直到我見到位女士出聲，個經理即刻比野佢食，就覺得「人善被人欺」，我就開始好嬲啦！
然後我都叫另一個經理過嚟，問佢：「主食又唔嚟，串燒又冇，已經9點 ，係唔係唔使埋單？」個經理答我：「係呀，你而家都可以走。」跟住我就更加嬲，9點已經好多舖頭關左門，我出去未必一定有嘢食，加上我白白係度等咗個半鐘，而家先叫我走？！我啲time cost點算？你冇嘢食又叫我入去坐？！
跟住我問佢啲嘢幾時到，佢話即刻跟。好啦，所謂嘅跟就係～有個阿姐求其俾咗啲粟米雞腎我哋，但係我哋完全冇叫過，阿姐話：「而家睇唔到單㗎啦，比住啲你哋食先啦」。我見到另一枱係咁食粟米食飽，跟住見到另一台有烏冬食（原本應該係唔包烏冬），跟住我哋都大叫要咗兩碗，諗住起碼烏冬可以飽下肚再等。
等多一陣，跟餐嘅龍蝦湯終於到，但完全貨不對辦，寫就寫酥皮龍蝦湯，但係嚟到只係好似普通餐湯咁！
然後見到最開頭嘈個經理嘅阿姐嗰枱走，走嘅時候話收咗佢哋每人$80，因為佢哋又叫啤酒同汽水，係要額外加錢嘅。不過講真，咁嘅服務同浪費時間，免費再送汽水啤酒我覺得都唔過分，補償返時間損失同餓都傻嘅感覺都好合理姐……
不過我男朋友就覺得我哋每人比番$100，我話俾$50都多咗，而我男朋友咁好人令我更加覺得嬲，明明我哋俾人蝦緊，應該要有補償，如果佢哋根本做唔到，就唔應該接我哋呢啲客。
過咗一陣，有一張枱都走咗，佢同我哋講冇收佢哋錢。然後個經理又攞咗一碟魚過嚟，但係超級難食，應該係解解凍夠，勁大浸雪味，食咗一啖已經唔想再食。然後又攞咗一串唔知咩嘅肉過嚟，話好食，但係一咬落去成口油，個肚勁唔舒服，就開始忍唔住覺得要走。
跟住我就話埋單，問佢點樣計錢。原本諗住佢收我哋一個人$100以內都算數，但其實真係覺得免費都補償唔到，點知佢話計完優惠收我哋$300 ，即時嘅反應就係問佢「收咁貴」？我哋個set包嘅煮物冇黎到，叫嘅串燒全部都冇，仲話係串燒放題，如果我用$300出去食嘢，已經可以食到好好食嘅嘢。
跟住個經理就話一係你哋而家走，唔收你哋錢。我原本都有1秒諗緊俾返少少錢，但係個經理嘅態度真係好差，佢就話「係呀，你哋而家可以走㗎啦」。雖然佢係咁俾人嘈，可能心情都唔好，但係錯不在我哋客人，點解好似要受佢哋氣咁？
原本見四季悅喺金鐘有間分店，都收得唔平，諗住佢哋因為喺九龍灣咁格攝嘅位置開咗分店，所以想做promotion就整啲咁嘅優惠。我唔知道係琴晚咁差，定係每一晚都係咁差，個位已經正常人唔會行過去，再加埋啲咁嘅服務同食物質素，真係唔會有回頭客。同埋我估係呢一個位開得，去嘅通常都係九龍灣居民，所以真係祝福佢哋。
