《東張西望》又再是是但但？
今日，香港物理治療師協會喺兩份報章刊登聲明，嚴厲譴責香港執業脊醫協會喺9月16號嗰集《東張》發表不當言論，受訪脊醫劉柏偉稱，物理治療師針對腰背痛病人嘅治療只係表面，又話只有註冊脊醫先會詳細分析骨架結構同病人病歷。物理治療師協會批評言論完全失實，誤導市民對物理治療專業嘅認知，更指行為可能違反《脊醫專業守則》。
另外，物理治療師協會又抗議無綫電視未有向公眾提供確準資訊予市民大眾，並促請佢哋日後製作相關節目時，應該咨詢相關專業意見。根據我哋觀察，執業脊醫協會係該集《東張》嘅產品贊助商之一，所以到底TVB係無fact check定唔想fact check都係一個疑問。
過去，TVB都曾經收受馬百良藥廠贊助，推廣一啲唔恰當嘅保健知識，例如鼓勵人將劇烈嘅寒涼藥品安宮牛黃丸當作保健食品食用，因此我哋一直都對《東張》所推廣嘅資訊真確性有所保留。
作為免費電視台，有一定社會責任，衷心希望日後唔會再有電視台因為收咗贊助商錢，就提供不正確嘅資訊畀觀眾，教壞細路仔，令無能力辨知真假資訊嘅觀眾受害。
