以後TVB邊個無show就推佢落港台
馬浚偉目前除咗擔任港台創作總監外，亦兼任TVB 藝訓班校長，雖然早前佢以港台高層身份表示想請Mirror 同 Error 上港台電視音樂節目，但據《東網》報導，Mirror 嘅歌喺最近三個禮拜絕跡港台中文歌曲龍虎榜，喺電台上零播放，令人不禁懷疑馬浚偉係咪講一套做一套。
其實馬浚偉除咗係TVB 藝訓班校長，佢旗下嘅藝術教育學校仲搵咗無綫高層曾勵珍做榮譽校監，一個同TVB 關係咁密切嘅人做港台創作總監係咪有利益衝突？如果佢係普通嘅電台主持人就問題唔大，但係佢係創作總監，理應對港台嘅節目有決策權，可以控制電台播啲咩歌同埋請咩藝人做節目嘉賓，如果處理不當，就會扼殺其他藝人嘅曝光機會，呢個唔單止係「友台」嘅問題，連其他獨立藝人都可能受影響。
以上事件並非孤例，9月5號港台喺荷里活廣場搞咗個殘奧活動，活動除咗港台體育主持之外，所有嘉賓都係TVB 藝人，包括周柏豪、姚焯菲、鍾柔美。本身聲夢學員都有喺藝訓班跟馬浚偉學做戲，而家港台搞活動，請嘅全部都係星夢、聲夢藝人，實在容易令人質疑馬浚偉濫用港台職權，作有利TVB 藝人之事。
