「富三代」鍾培生（Derek）與林作嘅百萬擂台戰喺前晚（18日）正式上演，二人打咗4個回合後，最終由鍾培生以點數勝出！呢場全城熱話嘅「百萬擂台戰」以實時直播形式喺鍾培生嘅個人YouTube頻道獨家直播，不過網上流傳有入場觀賽嘅保險經紀進行網上直播，最高峰時更達到2.8萬人同時收看比賽過程。
其後該經紀喺IG出限時動態表示：「琴（噚）晚直播事件我比三個黑人保安捉咗，琴（噚）晚暫時靠關係保住咗我，但岩（啱）岩（啱）鐘（鍾）培生打咗比我，問我28K X $800=幾多錢。」及話佢隨時俾人告，呢筆天文數字嘅錢佢一定賠唔起，所以佢都做好破產嘅準備，同時佢亦希望向每位有睇直播嘅網民眾籌。
呢場「百萬擂台戰」係喺鍾培生嘅個人YouTube頻道獨家直播，而頻道嘅月費係$800，賽事最高峰有2.8萬人收看，咁即係話要支付超過2千2百萬元。
呢位經紀噚晚上載與林作及鍾培生嘅合照，仲話自己由一開始同林作拍片，去到成為中間人促成拳賽。另外，喺噚晚佢再出限時動態表示與鍾培生達成賠款共識：「我同鐘（鍾）培生先生已達成協議，我會作出適當賠款以及致歉。佢亦都相當大方，只係我好心做壞事，不用擔心，謝謝大家。」
https://hk.news.yahoo.com/保險經紀網上直播鍾培生林作拳賽-ig自爆被追討賠償-062430340.html?fbclid=IwAR1cDzlBBFR2E_fleQ025loatWgZ2RWMRATev-D5NcgFFT8ydS8XaYBpaeM&guccounter=1
