由出世到而家，我對狗都情有獨鍾，咩品種都鍾意，雖然貓、兔仔，或者倉鼠呢啲小動物係好可愛，但比唔上狗。
小學嗰陣，一直求阿媽畀我養隻狗，因為我無兄弟姊妹，加上父母成日唔喺屋企，又無工人，我好想有隻狗仔陪我
但阿媽好討厭小動物，嫌佢哋甩毛，又有臭味，就唔畀養。到咗五、六年級，我又嘗試說服阿媽，我願意每日吸塵拖地，唔會畀啲狗毛通地都係，於是阿媽答應咗，我每日放學返屋企第一時間就吸塵拖地，想證明畀佢睇。當時每日零用錢得$10，我會儲起佢，放入個寫住「狗狗基金」嘅信封度
但阿媽一次又一次反口，不停畀假希望我，之後我好有恆心證明畀佢睇，又令我失望。喺18歲生日試過同佢嗌大交，好耐都唔同佢講嘢，結果嗰次佢買咗隻倉鼠畀我，初頭都好開心，覺得擁有屬於自己嘅寵物，但慢慢地發覺，個感覺始終唔同，不過我都有好好照顧佢到佢老咗嗰刻。
慢慢地，中學畢業，出咗嚟做嘢兩年，都開始對養狗無抱咩寄望，突然有日，阿媽話：好啦，我哋養返隻狗啦。我以為佢講吓，無擺喺心，結果佢今次係認真，不過佢有個條件，就係我自己打理，而且唔要甩毛同有臭味。我上網搵過好多資料，心情好興奮，結果決定養Poodle，好快就領養咗隻Poodle BB。隻狗仔兩個月大，因為營養不良、過瘦，加上肚屙，一直無人肯要佢，義工話再無人要就送佢去愛協，雖然我唔係好明點解唔帶佢睇醫生，但我就接咗佢返屋企。
佢初初唔肯食嘢，又肚屙，不停屙爛屎，夜晚都不停屙，屙到成個籠都係，我晚晚半夜起身陪佢，幫佢清潔，日日都擔心佢有事，放工放學就帶佢睇醫生。醫生話BB可能會有腸炎，50%死亡率，我即刻喊咗出嚟，嗰排仲請假留喺屋企照顧佢，又要諗辦法谷返肥佢
唔經唔覺，啱啱好養咗一年，我仲未相信竟然有隻狗喺屋企，不過佢好無安全感，好痴身，我喺洗手間佢喺廳，佢都會喊。
其實佢都改變咗我好多：早睡早起，有責任感。
而家嘅佢，已經係好健康又肥肥哋嘅Poodle仔啦
之前抽過血驗過，所有機能都好正常
佢最近剃咗毛
好可愛我知呢篇嘢係長咗啲，但我相信會有人同我持有一樣嘅心情同經歷
養寵物，唔係一件簡單又容易嘅事
狗狗好可愛 要健康啊
好驚第一個留言就係Too long didn't read
獨生 自小就想養狗 家人有潔癖靠我一個人打理 最近終於養左隻狗狗 好累但都好開心
我都唔敢想像佢唔喺度
