好老土咁講，對我嚟講成套戲講緊嘅就係兄弟情。
兩段係人都知嘅 如果唔明建議再睇過。
「唔講一、唔講三，講義。唔講風、唔講雨，講咩？講雷。」
手捲煙係好信任對方先會比對方幫佢捲嘅，因為有口水。
除左哩兩樣寫到爛哂嘅，我理解到嘅係救贖同重生。
文尼唔洗講啦比人搵到係時間問題。
關超，啃埋雲斯頓條數(以我理解原本係佢老婆還嘅)，一人還二千幾萬。所以一直都好缺錢，原本一定還唔到下一期一球嘅。一直都踩界玩火賺錢，遲早都出事，又比兄弟唾棄，自己亦都活喺害死兄弟嘅內疚之中。
成套戲大半都係徘徊迷陣，兩個迷惘嘅人喺迷霧中搵唔到出口，甚至有冇出口都唔肯定，去到後尾寄霧重生，通過互相幫助為大家帶嚟重生。
機緣巧合之下文尼帶住貨走入關超屋企，再達成左協議暫時受關超嘅庇護。
一直都係交易關係嘅文尼同關超，由文尼將d貨交比關超嗰下開始，改變左兩個人嘅命運。
將會死於非命嘅關超同文尼喺哩次交易之中都擺脫左原本嘅結局。
關超通過將貨套現，成功還哂條數仲有餘錢。
對佢嚟講，條數就係佢對兄弟嘅一個交代，佢一直都冇放低過佢害死兄弟嘅事實，而佢d兄弟都唔知佢孭哂上身。原本佢嘅人生已經完左，死於非命係註定嘅，唯一分別就係死喺收數佬手上定係撈偏嗰陣死，哩樣野係佢對兄弟嘅一個交代。
通過套現d貨佢成功喺對兄弟嘅虧欠上面救贖左自己，獲得左新生，有一次重新嚟過嘅機會。
對於一個講義氣嘅人嚟講，賜予佢一個咁嘅機會嘅就係欠左佢一條命。由嗰下開始佢就當左文尼兄弟， 所以將自己珍而重之嘅煙盒交左比佢，由嗰一刻開始，佢就認可左文尼，將佢劃入可以信任嘅人入面。佢亦都好清楚知道自己欠左佢，雖然文尼拎住d貨都得物無所用，但冇文尼，就冇新嘅佢。 泰哥一句，識佢咁耐都冇比過煙佢食就係講緊對關超嚟講手捲煙嘅意義，就係兄弟，佢華籍英軍嗰班係兄弟，文尼一樣係兄弟。
到文尼比泰哥捉到 打比關超嗰下，關超好清楚，去同唔去嘅分別係死一個同死兩個，泰哥冇可能接受佢嗰少少錢or慢慢還。大多數人面對哩個情況應該多數都唔會去，反正只係死文尼，一個識左一陣連熟人都稱唔上嘅南亞仔。
「唔講一、唔講三，講義。唔講風、唔講雨，講咩？講雷。」哩句野某程度上係佢嘅信念。
明知道事不可為，佢依然義無反顧，押上自己因為文尼而得到嘅新生。去到最後戲劇性咁成功救到文尼，佢冇再次累死兄弟，對佢嚟講係一種補完，將過去嘅遺憾彌補左。可能會有人覺得佢好慘，但我反而認為佢係求仁得仁，唔洗再重蹈覆轍。睇住兄弟因為佢死喺眼前，對佢嚟講睇多次應該慘過死。
重生
關超嘅重生太短暫
上面講完左。佢有冇死？唔重要，反正佢欠嘅已經還哂。文尼嘅重生先啱啱開始。
最尾支煙食唔食到一d都唔重要，重要嘅係，關超允許左文尼幫佢捲煙。
開頭以為係另一套鏗鏘集，點知有舊時港式黑幫味道。算幾有驚喜
