想講好耐，vtuber偶像化其實係一種娛樂倒退

花井三日月 · 2021-07-10T19:17:28+08:00

首先我地留意下vtuber發跡到鼎盈既過程，同erogame喺秋葉原上層發揮影響力既95後黃金時代，其實係有一定程度既相似性。 95後年輕人因為就職失敗有大量空餘時間，所以erogame龐大文本量、多重故事線、長遊玩時間(一般30hrs+)，係一種切合團塊少年世代需求既娛樂媒介。而20年代因為疫情關係既不要不急政策，酒館經營被禁止，可以睇又吉直樹既偽紀錄片《不要不急の銀河》、另外《逃恥》特別篇都有表達呢種焦慮。 vtuber帶有虛擬酒館既特性(vtuber其實就係自己頻道既媽媽桑)，而且長既放送時間，所以能夠成為疫情後人們既心靈支柱。總括而言兩者成功因素，erogame因為泡沫爆破，vtuber因為疫情，同樣地由於外在客觀經濟條件而暫時回歸到隱蔽社會。相比起傳統動漫表界，裏界erogame既創作門檻並唔高，故此當時有唔少作家利用呢個媒介搞實驗創作，例如傳說中既三大電波遊戲，就係嗰個時代既想像力頂點。 vtuber既入門門檻唔需要我多作說明，初期至全盛期既vtuber文化亦令我地感受到新形式既自由，擁有唔受傳統娛樂拘束獨特既氛圍。 vtuber偶像化，一言以蔽之就係從新娛樂回歸到舊式平成娛樂(呢到想講係10年代)。平成偶像有兩大特色，其一係組合個人競爭、其二係戀愛禁止。平成偶像既代表係akb48，最大營銷策略係總選舉同握手商法。通過內部人氣競爭，為大箱創造話題同財富。時而團結時而不和，《文春》供應茶餘飯後既八卦消息，依家某團體明顯複製緊呢條路徑。而戀愛禁止條例推到極端，就係如果某行為唔可以討好所有人，那麼該行為不如不做。如果你既愛意專屬某一個人，就係對其他粉絲既背叛，所以戀愛就被禁止。政治言論被禁止都係同一種原則。如果你既政治言論討好到某一國家人民，相應地就係對其他國家人民既背叛。因此政治言論不如唔好講，不論政治正唔正確、有冇觸及到紅線。平成既王道偶像代表一種完美性，並唔係代表唔可以犯錯，而係一種專業既服務精神不容損害。呢種偶像假面既生存方式並唔輕鬆，君不見渡邊麻友畢業後要退出藝能界，明顯累積相當大既精神壓力。所以akb衰落除咗青黃不接問題，仲有反映人們對虛偽服務同偽團結競爭已經厭倦。我想講既係，偶像好多商業文化同規條，都係同vtuber文化初衷相違背。如果vtuber要走向傳統娛樂，就好似erogame要走向表界全年齡化，係一種違反本質既轉變。就如同95後既erogame、10後既akb48，盈極一時之後反而係步入緩慢既倒退期。