講吓自己遇過嘅教畜

大家講嘅時候小心自爆，記得做適量嘅修飾

Chapter 1 - 恥笑學生的老師
首先就由中一班主任講起啦。
我間中學係英文中學，所以平時喺校園都要講英文。
有一次我想向班主任投訴男班長處事不公。男班長要求同學喺早會前交功課，但係默許自己的朋友lunch後先交功課。
於是我就去教員室搵班主任，然後用蹩腳的英文嘗試作出投訴：「Miss Chan, err...err....the class monitor is not friend with me......so he....」

我講完第一句班主任突然哈哈大笑，然後走入教員室拉埋佢個閏密出嚟，叫我由頭講多次。
然後佢地兩個就哈哈大笑：「哈哈哈~~~ the class monitor is not friend with me...哈哈哈~~~ 哈哈哈~~~」。

我都知道自己英文廢。不過身為老師，就算學生嘅英文差到戳中你嘅笑點，至少你都忍吓笑呀。就算你忍唔到笑，都唔好入教員室拉埋你個閏密出嚟一齊笑呀。雖然我心靈無受創，不過依件事的確刷新咗我對教師質素的認知。

Sorry lo

冇是咁的0/10

Chapter 2 - 消失的老師
中二的數學老師係一個非常嚴格的老師，不過我對佢的印象唔深。
因為佢開學無幾耐，大約十月中左右就開始請病假，然後成個學年我就無再見過佢。
師兄師姊話依個老師患有心臟病，每一年佢都只會喺九月初現身，然後就一直請病假到學年結束。

你無睇錯，佢每年的實際教書時間真係得一個月左右，之後就一直請病假啦。唔只一年係咁，而係每年都係咁！

既然依位老師每年都係咁，學校應該會安排另一位老師教書？同學你太天真了，每一堂的數學堂都係自修堂。雖然有唔同嘅老師負責看管，但係唔會教書。同學睇下英文書、傾吓計就一堂。依個情況持續了整整一年。
結果數學考試我考到了震撼性的低分：17分

當然你可能會問：教師唔教書你都可以自修啫？點解你唔好好善用自修的時間？
你講得無錯，不過中二嘅我仲未識諗。老師消失整整一年係必定會有負面影響。如果老師係可有可無，不如大家唔好返學喺屋企自修算啦。
我中二數學堂嘅時間就咁樣白白浪費咗，結果中三都難以跟上追度，去到中四出去補習先追返。
去到中三，不幸地電腦科又係由依位「消失的老師」任教。今年仲誇張，未到10月佢就已經開始請病假。
成年嘅電腦堂又係變哂胡鬧的自修堂。而且當年電腦堂仲係喺班房上，而唔係喺電腦室上堂。我們連自己用電腦上網的機會都無。
最後我嗰班的電腦科成績明顯低過其他班。不過好彩我間中學電腦科教的內容無用又落伍，所以成年無學過嘢都無咩損失。

喺我升中四之前，依位「消失的老師」就因為意外(唔係疾病)而離世。
依位老師猝然離世，無論對於患病已久嘅佢定係對於莘莘學子嚟講都係一種解脫。

係啱啱升上中學頭幾日嘅事
個教畜點緊名 行過到嚟問我咩名
我望住佢手上份人名表指返自己個名出嚟
佢即刻拎起支白板筆篤住我額頭鬧我
話點解唔用把口講自己個名出嚟俾佢聽
嚇撚死我 鬧還鬧 都唔使篤我額頭下話

上堂瞓覺
上堂成日叫人自修然後搵學生捉棋
話自己有問必答 AL 冇咩難到佢
人地問佢一條pastpaper mc
佢答唔出要返屋企研究完下一堂先解到
但佢個解法係勁長勁多steps
考試時一定用唔著
然後大家去咗睇補習天王啲note 先學識

Chapter 3 - 令我唔信教的聖經科老師
我由幼稚園、小學、中學都係基督教學校。
因此身邊好多同學都信基督教，我都差啲以為自己係基督徒。
不過令我開始懷疑信仰嘅係中二嘅聖經科老師，因為佢講嘅嘢實在係太傻的嗎。
依位Miss話依個世界又好多好叻嘅人都信神，當中包括好多有錢佬、科學家都信神，咁多叻人無理由全部都錯，所以神係存在的。
Ummm......依間中學嘅老師質素真的令人擔憂。

當年會考公開試有一科叫「宗教科」，不幸地又係依位Miss任教。
雖然係公開試科目，但坦白講我唔太記得佢有教過書，好似都係講下聖經故事，感覺同初中的聖經堂無咩分別。
我印象比較深嘅只有兩件事：
1. 播影音使團發現挪亞方舟的video
2. 播牧師驅鬼實錄的video

大家可能唔太清楚影音使團，簡單嚟講就係fake news味極極極極極濃。
「影音使團」聲稱喺亞拉臘山發現發現咗聖經記載的挪亞方舟！！！依件事當年喺香港基督教界應該都算幾大件事。「影音使團」借依件事大肆宣傳，甚至開始製作電影、建立方舟博物館。但係發現挪亞方舟依件事從來得不到學術界證實，發現的地方亦都講唔清。「影音使團」亦都不斷改口，由「已經發現」改為「99%可能發現」，之後再改為「90%可能發現」。

牧師驅鬼實錄就類似恐怖電影。攝影師拎住攝影機跟住牧師周圍去驅鬼。
鬼上身嘅婦人不斷大叫、顫抖，牧師就拎住聖經叫隻鬼快啲離開。
你去YouTube應該都可以搵到類似的影片，總之都係fake news味極濃。

公開試之前就係睇埋啲咁嘅嘢，公開試當然考得唔好。入到試場我成份卷都好陌生。
我果屆有個同學本身可以攞8A，結果都衰咗喺依一科。

玫瑰崗 鄭sir 葉sir 鬍鬚梁仲有黃小田

Chapter 4 - 暴燥的英文科老師
依位英文科老師脾氣極為暴燥，喝罵學生係平常事。
拍枱、推跌學生張枱、將成疊簿掃落地、撕爛同學功課都試過。
不過同上面幾位老師相比，起碼佢都有認真教書。而家諗返又唔係太差。

起初我都成日俾佢罰抄、罰留堂。初初要抄課文100次真係抄到崩潰，抄唔哂又驚俾佢鬧。
不過之後我發現佢4:45pm一定會準時離開學校。
我就明白罰抄唔需要認真，只要喺4:45pm拎一大堆字俾佢睇就一定走得。

Chapter 5 - 跑得好快嘅老師
我個Physics老師上堂只係照書讀，不過佢做得最正確嘅事係派咗一大疊By-topic Past Paper，而且異常齊全，連198X年嘅題目都有。我就運用上堂的時間自己睇書、做題目。

當年Physics堂之後係小息。有一次落堂之後我想問一條Past Paper題目，就趁阿sir離開班房之前發問。
我：「阿Sir...我想問依一題。。。」
點知阿Sir望咗條題目一眼之後竟然開始奔跑！！！

我見狀即刻追住阿Sir。
我：「阿Sir我只係想問一題」
阿Sir (一路跑落樓梯一路講)：「你問啦」
我：「圖片題嚟架喎！？」
阿Sir：「你問啦！」

跑緊落樓梯當然問唔到問題。我心諗：「阿Sir係咪趕住去廁所呢？」
所以我就跟住阿Sir，諗住等佢去完廁所再問。

落到地下之後，阿Sir一枝箭咁衝咗入教員室，我就企喺門口等。
等咗幾十秒，阿Sir果然一枝箭咁衝返出嚟，再衝入教員室隔離嘅男廁。
又等咗一分鐘左右，阿Sir又一枝箭咁跑返入教員室。
睇嚟佢係唔打算答我問題，我唯有自己返班房。

途中我遇到隔離班的另一位Physics阿Sir，於是就決定問佢。
我：「黃Sir，我想問依條題目呀。」
黃Sir望吓條題目，然後又望吓我。佢再望吓條題目，然後望吓我。
思索良久，黃Sir終於開口：「同學你好似係蔡Sir嘅學生？」
我：「係呀。」
黃Sir：「你都係問返蔡Sir好啲。」
我：「但係蔡Sir唔得閒答我。」
黃Sir：「你都係問返蔡Sir啦。」

到底依條題目有咩咁禁忌呢？
我事後回想返，依條題目應該係198X年的題目。由嗰疊Past Paper的影印質素嚟睇，依疊嘢已經重印咗好多次。
我估兩位Physics根本無整理好Past Paper，所以嗰疊Past Paper入面仍然充斥住大量Out-syl、過時的題目，而我想問嗰條應該就係其中一條過時的題目。

老師應該對學生坦白。如果條題目太難，應該直接同學生講需要啲時間諗吓，或者勸我做返啲簡單嘅題目先。
如果條題目Out-syl / 唔重要，點解唔直接同我講？既然條題目咁禁忌，不如一開始唔好派依一題俾我啦。

中六之後轉咗另一間學校，學生可以自由向任何一個教同一科嘅老師發問。Past Paper亦都係經過分類、整理。

Chapter 6 - 唔教書唔改簿嘅老師
一開始寫依個中學老師系列之後，我有send返俾自己啲中學同學睇。
佢地不約而同地同我講：「期待你寫何老師。」
因此壓軸出場嘅就係依位唔教書唔改簿嘅何老師。

何老師係中文科老師。同Econ、Physics依啲術科唔同，語文科的特點就係工作量好大。我們一齊睇吓何老師係點樣四兩撥千斤。

1. 唔教書
當年會考中文科跟現在DSE中文科有很大差異。而家DSE中文科有4份卷，當年會考只有兩份卷：一份係閱讀，另一份係作文。
閱讀果份卷有廿幾篇範文要讀。何老師教範文的方法就係：「叫同學分組出嚟朗讀一次。」
例如《出師表》有8段，全班同學就會分8組，然後逐組逐組出嚟每組讀一段。有啲段落比較短可能每人只需要讀5-6個字。
每個月袋幾萬蚊人工，自己連書都唔洗教，同學朗讀完就當教完嗰篇範文，同學咩都學唔到（當年中文科仲未有說話依份卷）。
各位讀者可能會諗：「咁佢咪好快教完廿幾篇範文？」
咁又唔係，因為上堂大部份時間都用咗嚟處理秩序問題。

點解會出現秩序問題？
一來何老師根本得不到同學尊重。由於分組朗讀課文實在太無聊，同學上堂嗰陣當然會傾計、訓覺、做其他科功課。但係何老師又堅持要全班靜哂嚟聽同學朗讀。
二來何老師有好多無謂嘅堅持。
考大家一個IQ題：一組五個同學要朗讀《出師表》其中一個段落（都係100字左右，平均每人讀廿個字），到底依五位同學需要幾多本教科書？
正常人會認為拎一本書就夠，一個人朗讀完可以傳本書俾下一個人繼續朗讀。但係何老師非常堅持要一人拎一本書。如果同學跟她爭論朗讀一篇課文點解需要五本書。何老師就會懷疑同學無帶書，跟住就會檢查全班同學有冇帶書、啲書係咪喺隔離班借返嚟。。。咁樣搞完一大堆秩序問題，隨時一堂都讀唔完一個段落，然後下堂唔記得讀到邊又由頭開始讀。

2. 唔改簿
何老師係唔會改簿。
你今日交完功課，去到要做下一份功課嗰陣先會派返本簿俾你。打開本簿你會發現以前啲功課係從來無批改過。
去到學期尾，何老師先會一次過收返哂啲簿嚟，然後亂咁俾啲剔，然後等公開試都考完先派返俾你。
至於作文呢，何老師發明咗「同學互改」依一招。各位同學交完作文，何老師會即場派俾另一位同學幫你批改。
同學就用上堂的時間嚟批改其他同學嘅作品。何老師就坐喺度un un腳睇住我們改作文。
結果當然又係一場鬧劇。同學唔會認真作文，批改嘅亦都唔會認真批改，更加有同學一直交空白嘅作文簿。
我有三年嘅中文堂就係俾何老師教。偶爾佢都會教書嘅，不過大部分時間都係浪費咗。
點解何老師嘅課堂會出現秩序問題？唔係因為學生特別差，而係因為何老師唔值得人尊重（但係又迫人尊重佢）。學生都睇得出你尸位素餐un un腳逗份糧，唔聽你講先係正常。

-----------------------------------------------
以下講下我對香港中學教育制度嘅睇法：
1. 學生無選擇權
學生入讀某間學校之後，對於一切幾乎係沒有選擇權的。
教學方式係人夾人嘅，但係喺學校入面，學生一定要跟隨老師的步伐去學習。
一間學校入面同一科往往只有一兩位老師任教。如果老師的教學方法唔適合自己，就只可以靠自己。
但係學生上堂嘅時間又一定要聽從老師的指示，想自己安靜地做吓題目睇下補習notes都係不被允許的。
而且學生喺中四選科的選擇亦都極為有限。學校如果無開某啲組合，學生就永遠揀唔到。
喺DSE制度之下，學生留喺同一間學校六年，唔似以前舊制咁中五有得轉校，唔會有再揀多次嘅機會。

2. 唔透明
班房內發生的一切都係唔透明的。無論係老師對學生冷嘲熱諷，定係唔教書、教錯嘢，基本上都係無人知，亦都難以投訴的。
我嗰個年代互聯網無咁發達，學生基本上係難以發現自己老師教錯嘢的。
我反對政治審查，但係提高透明度先可以減少老師精神上欺凌學生或者教錯嘢的現象。

影音使團自從挪亞方舟套假documentary後，就喺我心目中臭晒朵
當年中學有老師唔記得點解帶成班同學去睇，成套就係咁重複 this is wood this is wood，有舊木喺雪入面就話係方舟

舊校嘅公開試成績一直低迷。
近年聽講啲老師不斷要求學生留堂補課嚟催谷成績，但係一啲成效都無。

成績差嘅原因根本就喺班老師身上。逼啲學生留堂補課反而會害咗佢地。
教學方法係人夾人，如果你嗰套已經證明咗係失敗，不如俾啲學生出去補習或者自己溫啦。

小學個時遇過 但個陣仲細 遇到既時候就只有錯愕唔識反抗 因為小學英文唔好 成日比條教畜罰留堂 然後要我做哂佢比既額外習作先走得 但答錯一題就會比佢癡咗線咁用鉛芯筆畀落手背到 甩哂皮流哂血咁 放學之後自己一個坐係後樓梯喊

個靚女miss日日都捉我入廁所執劑

小學
向住學生dum功課簿

每年大肚一次，仲要年年教dse 中六班
生左4, 5 件
上英文堂就即興教睇scmp一則news

中六、中七轉咗校之後，我先終於遇到好老師。
新學校嘅故事之前喺另一個post講過，大家都興趣可以睇吓：
https://lih.kg/2562313

+1 因為成績唔好 比人dum功課 踢櫈 針對 叫我唔好同其他同學玩 驚我拖累其他同學之類 但我已經好努力 但就係讀唔掂書

啲老師根本無心機諗吓點教，以為鬧就等於教

鬧佢啲咩

我記得outlier有個數學老師對佢影響幾深刻
等佢入嚟講兩句