http://news.now.com/home/entertainment/player?newsId=440464
【大叔的愛】傳收視破ViuTV紀錄 Anson Lo 浴室強吻 Edan
ViuTV 買入版權翻拍人氣日劇《大叔的愛》，由黃德斌、MIRROR 成員呂爵安（Edan）同盧瀚霆（Anson Lo）擔正做主演，僅僅播出兩日已經好評如潮，更有傳《大叔》首集收視高達8.7點，刷新 ViuTV 開播以嚟紀錄！
港版《大叔的愛》未開播前已經討論度十足，終於喺星期一正式開播，第一集阿田（Edan 飾）已經同阿牧（Anson Lo 飾）住埋一齊，上司 KK（黃德斌 飾）更買咗超大紥玫瑰花向阿田浪漫表白！一眾網友睇完都話笑到肚痛，Edan 嘅表情好到位，又大讚黃德斌演技有突破，完美詮釋 KK 內心嘅少女情懷，洗脫以往「型佬」形象，令觀眾眼前一亮。
噚晚嗰集兩位 MIRROR 成員就上演「浴室強吻」，沖緊涼嘅 Edan 叫 Anson Lo 幫手拎毛巾，點知 Anson Lo 衝入浴室之後就按捺不住，直接向 Edan 表白，講出經典對白「我知你鍾意大波，但我都有大支嘢吖，你會唔會想試下？」
之後就「壁咚」強吻 Edan，令唔少觀眾表示睇到尖叫！Edan 之後亦出帖表示「我個螢幕初吻⋯咁就冇咗⋯阿牧你好過分！」
《大叔的愛》逢星期一至五晚 9:30 喺 ViuTV 99 台播出，如果 miss 咗頭兩集嘅朋友都唔緊要，嗱嗱臨上網睇重溫啦，唔係一定會被洗版式劇透！
https://youtu.be/fd0QFi-iXCM
