從來唔會對一套劇集有太多感受，亦未試過打咁多字去記錄一套劇。獻第一次，俾最特別嘅一套。
套劇講一班小六學生嘅故事，當年香港首播亦都係我小六嗰年，而且係我第一套睇嘅日劇，所以由十五年前七月嗰日起，已經注定佢會有個最特殊位置。基本上每隔一排就會諗起呢套劇，隔咗十五年，終於決定挖返內心最特殊嗰部份出嚟。
本來諗住兩晚睇得哂，但原來太多位要慢慢嗒。由最初以為會飛住睇，結果不停playback又playback搞到一集睇成個幾鐘。再睇落去先發現，一晚一集係極限，如果唔俾自己抖下消化下，其實未必頂得順咁沉重嘅內容。
每一集，一路睇都會一路諗：究竟啲劇情係邊_個寫？點解可以寫到咁黑暗？點解要寫到咁人性化？個編劇係咪有啲心理變態？……寫實又沉重，每一集都睇到又嬲又噏咁瞓。
出賣、功利、為求自保不擇手段、欺善怕惡、小圈子、牆頭草……基本上呢套劇將所有人性嘅現實同黑暗面都描繪哂出嚟，但個傳播媒介，係小學生。
明明只係一班小朋友，但喺佢地身上搵到呢啲黑暗面，反而令到套劇更加寫實同無奈。小朋友係天真，但未必無邪，一樣有弱點同黑暗面，而且一樣會用盡方法掩飾。
不過班童星真係好好戲，堅系巧戲嗰隻。好想知導演究竟係點guide佢地，佢地係完全將一切情感倒哂出嚟，我嘅情緒完全被佢地帶動住，包括配角。
如果話，校園劇通常比一般喜劇更輕鬆陽光，咁樣夠膽寫套比一般鬼片更陰森凝重、玩埋校園欺凌，再放埋火燒學校嘅嘅校園劇，係真心勇過袁國勇。
十五年前喺香港首播嗰陣，feedback除咗係因為太陰沉而收到嘅家長投訴之外，就係一大堆網上討論。唔係討論劇情，而係討論道德、討論人性，但當年仲細冇諗到咁複雜。不過最大爭議嘅，始終都係「阿久津真矢究竟係咪一個好老師」。
相信去到後段，冇乜人會再質疑呢樣野。可能佢嘅方法係有爭議，但無可否認，佢嘅內心比任何老師都更錫班小朋友。真心覺得呢個角色好吸引，九成功勞俾天海祐希，佢每個表情都係100%到肉，冇多冇少。
真矢每集都會講一段仔道理，由最初講現實嘅殘酷，到後來偏感性嘅教誨，每段都係經典。我仲未有足夠人生經歷去體會哂每一段道理，但我相信任何年紀嘅人都適合聽，而且永遠唔會過時，亦都係呢套劇最受歡迎嘅地方。
燒完學校之後，真矢啲人性化開始出。後面嗰幾集，氣氛由黑暗變成感動，再變成好Q感動。唔只真矢，仲有班同學仔嘅友誼。
故事入面班小學生，好努力想喺小學最後一年製造多啲回憶，真矢用方法將佢地由幾盤散沙變成團結。一路睇，一路好似望住十五年前嘅自己同班同學仔。認真，有好多幕我係睇到喉嚨有野頂住頂住咁。
小朋友嘅快樂永遠係最簡單，絕交容易，和好更容易；表面黑你面，其實內心好珍惜好緊張你，同大人啱啱極端相反。可能畫幅畫寫兩句廢話，已經氹到對方好開心。而家人大咗，有邊個真係會做呢啲野？除咗溝女。
除咗講老師同學生之外，家長嘅心態都係呢套劇探討嘅重點之一。
覺得自己嘅決定一定係啱、淨係睇成績、以為入名校就一定係對仔女最好、完全唔知自己仔女諗緊咩、仔女受咗委屈就即刻投訴學校 etc.，係一套全方位探討師生家長真實一面嘅劇。
By the way，呢套劇其實係我童年好深刻好重要嘅一部份嚟。每個星期日晚追劇、聽住片尾首《EXIT》睇天海祐希跳舞……呢啲就不在話下，其實當年我有幻想過福田麻油紙係我女朋友，我真係有，佢真係靚，當年。
仲有播嗰陣係升小六個暑假嚟，我地嗰年暑假要返學校上堂，有位校工又係好鍾意睇，佢會陪我地班小學雞傾劇情。可能嗰位工友已經唔記得咗，但我唔會，多謝你。
香港開埠以嚟收視最高嘅日劇（根據維基），永遠無法被超越嘅一代經典（至少對我嚟講）。小演員會長大，但銀幕記錄下嘅臉孔永遠不老，道理同回憶永不過時。
好多謝睇到尾嘅你，原諒我用咗唔少篇幅講自己嘅感受同故事，因為呢套劇對自己好有意義同情意結，希望冇悶親你地。
套劇真心值得睇，希望睇過嘅都可以喺呢個post搵返少少回憶，未睇過嘅亦都可以一睇。
）
