AL年代嘅恒商點解咁勁？

前排睇到有個post講讀書叻同錢途嘅關係，結果入面好多人討論AL年代嘅恒商。
所以想開個post講吓AL年代嘅恒商點解俾人叫做「A工廠」，同埋解釋吓點解咁勁。

恒商係咩嚟？
恒商即係而家香港恒生大學嘅前身，當年淨係提供中六、中七課程，因為成績太好所以有A工廠嘅稱譽。

當年恒商到底有幾勁？
成績最好嘅一屆毫無疑問係2012年。
以英文科嚟講，恒商一間學校已經拎咗全港17.3%嘅A。商科嘅講，Econ拎咗全港28.1%嘅A、Accounts 47.1%、Business Studies 76.2%。
企業概論係偏門啲嘅科目，開辦嘅學校唔多，但係Econ、Accounts依啲多人讀嘅商科科目、甚至好難短時間進步嘅英文科都拎到咁好成績真係唔簡單。


而最值得講嘅係，恒商雖然淨係提供商科，但係收生係唔分文理商科。換句話說，大部分恒商學生喺中四、中五都無讀過商科，中六先開始讀。AL Econ、BS同會考關係唔算太大，但係AL Accounts嘅內容係建基於CE Accounts之上，名乎其實係用一年半時間去超越其他人中四至中七嘅光陰。

其他詳細數據：
https://na.cx/i/WRjUuTf.png
https://na.cx/i/keiVej4.png
https://na.cx/i/iBHrk0c.jpg
https://na.cx/i/j9F8zkP.jpg

JUPAS派位結果都好勁：
同一年有43一齊入HKU讀Law (Law + BBA(LAW) + GLAW)
當年淨係收5個人嘅中大Global business有3個係嚟自恒商。
https://na.cx/i/rYTBJgU.jpg

收生成績
最大嘅誤解就係恒商收好高分。恒商1991年先開始提供AL課程，一開始都係收升唔到原校嘅學生，初期收生分數只係best 6 14分左右。之後因為做得好，先吸引到更高分嘅學生報讀。由最初只係收其他學校唔要嘅學生，到後來學生放棄原校都要去恒商。所以話恒商只係靠收生叻係唔公平嘅。

恒商喺最後嗰幾屆先收得高分，之前都唔算特別高分。

（會考18分大約係全港top 30.4%、 24分係top 9.5%、28分係top 2.8%，按比例換算返大約等於DSE best 5 19分、25分、29分）

增值率
恒商最屈機嘅地方在於全港最高嘅增值率。簡單嚟講即係同樣以會考18分嘅考生嚟講，恒商學生喺AL嘅表現係全港最好。崔康常由1996年開始擔任院長，1999年恒商已經係全港最高增值率嘅學校。

以2005年AL為例：
恒商會考18分嘅人拎1A或以上嘅比例仲高過其他學校會考25分嘅人，蔗渣嘅收生分數但是有燒鵝嘅成績。

睇完咁悶嘅數據，就要講吓恒商點解咁勁。

好多個老師教一科
恒商一年差唔多收360人，有十幾個老師教同一科。好處係工作量可以分擔，例如整notes可以每個老師集中整一課、出測驗、考試卷可以每個老師集中出幾題，質素自然會比較高。平時上堂都幾乎唔會睇教科書，淨係睇notes已經夠。其中Business Studies嘅notes更加係其他學校學生趨之若鶩嘅寶物，一來依科好少學校開、資源稀少，二來份notes融合咗多本大學教科書嘅精華，質素真係高。另外Accounts嘅notes都好好，每課都會有幾條唔同難度嘅題目，做哂依幾條題目已經到cover到嗰課大部分嘅變化，依兩科嘅學生係完全唔需要出去大型補習社。有足夠嘅資源俾有心溫書嘅人去溫，依一點相當重要。

老師可以專注教學
學校會專門請人負責行政工作，而且恒商課外活動嘅風氣唔強，老師可以專注教學。教同一班嘅老師之間會經常開會討論，教同一科嘅老師又會經常開會，佢地多數5點幾都未收工。而且學生有嘢唔識可以隨意問任何一個教嗰科嘅老師，佢地都會好願意提供協助。部分老師仲會搞拔尖補底study group，group埋4-5個差唔多程度嘅學生喺空堂進行小組教學。恒商嘅老師係真係好忙好忙。

學習風氣好
中後期恒商嘅學生大多係主動放棄原校嘅學位，一放榜即刻搭的士撲去恒商，恒商唔收就無得返原校。能夠作出依個破釜沉舟的決斷嘅學生普遍比較有決心。大家嘅目標都好明確，唔係想考好AL，一開始就唔會嚟依間學校。

幾乎每一科每個月都會有一次測驗，大部分同學都會認真看待，變相學生會keep住溫書，唔會落後。所有功課、測驗都會好快派返俾學生，仲會上堂講解返，所有嘢都有及時嘅feedback。

恒商仲有宿舍，同學有地方可以一齊溫書討論到夜晚。加上同學普遍唔會視對方為競爭對手（當然都有例外），而係以AL為目標，成班人為同一個目標努力嘅風氣會推動到進步。

宿舍圖：


容許挑戰權威
一科有十幾個老師，但唔會個個老師都教得好。恒商有evaluation制度，學生每個學期都有機會去為老師評分。如果老師嘅評分太差，崔院長會親自同學生了解情況。老師可能會調整教學方法，甚至有可能換老師，所以學生喺evaluation嘅時候係絕對唔會手軟。畢竟學生為咗入恒商都放棄咗好多嘢，覺得老師教得差係絕對唔會客氣。上堂嗰陣challenge老師都係家常便飯（當然好嘅老師唔會咁容易俾學生challenge到）。未必個個老師都教得好，但至少唔會有人呃飯食。

雖然上面提到恒商學生唔需要出大型補習社補習，不過老師唔會排斥學生補習。老師甚至會介紹攞A嘅舊生返嚟幫學生補習。

風氣自由
恒商只有中六、中七學生，加上大家入嚟都係為咗考好AL，所以比較自律。因此喺校規方面特別寬鬆。返學唔需要著校服，輕微嘅染髮都無人理。只要你係專心上堂，食零食、用吓手機都無問題。老師就唔洗花太多心思喺紀律上面，可以專注教學。

獎學金吸引
恒商背後有恒生銀行支持，資金數以億計，一年可以派500萬以上嘅獎學金。每一年有7個外國留學獎學金，包哂4年學費、生活費。仲有3個本地全費獎學金、10個$10,000獎學金、20個$5,000獎學金。
豐厚嘅獎學金吸引到好叻嘅學生專登入嚟讀，係推高收生分數係其中一個原因（Calvin Sun就係其中一位獎學金得主）。

M&S谷大咗
後期恒商成績越嚟越好，淨係靠3AL都未必攞到獎學金。所以會考好高分嘅同學為咗搏獎學金都會讀多一科Math & Stat。Math & Stat類似而家DSE M1，都係教微積分同埋Stat，當年主要係文商科人讀。但係依班會考好高分嘅學生好多都曾經喺會考都讀過Additional Math，微積分嗰部分佢地一早識哂，甚至一早已經有攞A嘅水平。既然佢地本身已經識一半，攞A嘅機會自然大增。喺2011 AL，有讀M&S嘅同學有一半攞A，攞B嘅都有25%。

拔尖制度下對手弱咗
2012年全港有4個6A狀元、13個5A狀元。其中3個6A、11個5A狀元出自恒商。不過其實同一個cohort入面最叻嗰班學生(e.g. 麥明詩)根本唔會參與AL依個遊戲，真正嘅狀元一早已經喺會考拔尖升讀大學。拔尖制度係由2001年開始，2000年AL香港有1個7A 狀元 (香港有史以嚟唯一一個)、4個6A狀元、30個5A狀元。每年有二百幾個最叻嘅學生拔尖唔洗考AL，都係恒商獨大嘅其中一個原因。恒商毫無疑問係勁，不過背後都有時勢因素。

都一樣有學生會、校際足球籃球手球歌唱比賽，學生甚至可以自己成立一個新嘅學會。只係課外活動嘅氣氛無其他學校咁強烈。

不過教學語言同補習社類似，即係啲notes係全英文，考試都係用英文考，但係上堂係用廣東話講，只有啲terms係英文。用母語教會易入腦啲。

痛苦兩年 將來條路平坦啲 行少好多冤枉路

講讀書氣氛
就係宿舍已經同一班一般傳統中學雞唔同啦

咁點解而家會沒落咗

宜家變咗334

因為而家已經無AL
當年有CE、AL兩個公開試，學生先可以讀完中五轉校
而家學生喺同一間中學讀足六年，根本無轉校機會，所以恒商一定要轉型。

恒商升格做恒大之後就完全係另一個戰場。歷史、資金、師資、資源各方面都一定輸俾其他大學。只可以慢慢由低做起，無可能一開始就同三大比。

含大

不如你講埋理科神校莊啟程？
當年我考dse phy Chem bio有買過佢嘅既筆記腳練習 又係高質到爆

崔校長真心有heart 人品不錯

陳享

崔院長當年一手將李兆基中學由band 5升做band 1已經係一個傳奇。恒商嘅成功佢更加係功不可沒。有佢嘅管理先至會出現上面提到嘅種種因素。每年招生佢都會強調做人要有determination，佢嘅演講的確招到唔少有決心嘅學生。

不過可惜嘅係佢嘅管理風格唔適合大專院校，而且佢都壓唔住出面請返嚟嘅大學教授。所以恒商變成恒管之後佢好快就退位，跟區翠華副院長一齊去咗宏恩基督教書院重新開始，不過到而家仲未做到成績。恒商嘅高峰亦都係崔院長人生嘅高峰。

佢對校內員工幾體貼

莊啟程有文、理、商科，所以老師之間分工合作嘅效應無恒商咁勁。
以A嘅總數嚟講，莊啟程都係全港第2，不過人均水平就遠遠不及恒商。

以上都只係05年嘅數據，恒商去到最後甚至達到大約人均1.6A，但係莊啟程就無咩再進步。莊啟程最強真係理科，文科商科都一般。

334學制之後，恒商同莊啟程走上咗唔同嘅道路。恒商就轉型為恒大，而莊啟程因為本身係保良局轄下，最後同保良局唐乃勤中學「結龍」。唐乃勤就係初中書院，莊啟程就繼續做預科書院。不過唐乃勤本身係band 3，所以結龍之後莊啟程都唔再係名校。

因為
康常在，A常在
每朝見到校長著住泳褲游水，我都充滿幹勁

當年得中六中七
專攻AL
銀行出錢
吸晒d最叻嘅學生
師資又超班
咁都唔撚掂就死撚左佢啦

樓主係老師定學生

又唔似香港傳統名校嘅路線
我覺得似中國嘅高考工廠

全級幾百人，咩人都有的
唔係個個死讀書

完全唔同大陸啲痴線高中 恒商入面啲老師唔會逼你讀書，啲學生亦都唔洗老師逼，氣氛係開心同輕鬆嘅。

外人以為恒商啲人淨係識讀書，競爭又大會當同學係敵人，事實係入面無人會做咁無聊嘅鬥爭，因為喺一間過median 就等於坐B望A嘅學校，想爭第一根本不切實際