網上討論區「親子王國」網民透露，身邊有夫婦一個想走、一個想留，女方寧願選擇離婚，也要帶分別6歲及10歲仔女移民，正考慮英國或加拿大。網民指，其朋友「有啲錢，佢話錢唔係佢最大concern，佢話以小孩教育將來為主」。
網民不理解對方的憂慮，「將來香港真係恐怖成咁？無言。又話驚將來香港無廣東話，全部已經要講普通話，又話怕將來自己被去勞教，被消失？」網民慨嘆，「完全同呢啲朋友傾唔到計。點解香港依家可以分化成咁？政治上腦凌駕一切」
網民眾說紛紜，有人質疑「為去留搞到離婚，究竟雙方有幾愛呢個家」、「好自私，無咗個家移咗民又會有幾幸福幾開心？如果係為小朋友好就更加唔應該拆散頭家，小朋友成長時最緊要係一個完整和諧嘅屋企。個腦唔知諗咩」。也有網民指帶子女移民可能只是一廂情願，「離婚後如果移民，應該要等法庭判咗撫養權先可以帶細路走。老公可以離婚撫養權同時攪，咁細路未必即時可以移民」。
不過也有人認為，去與留都都並無不可，「佢去外國，小朋友都會遲早唔講廣東話。所以，小朋友講英文無問題，小朋友講普通話有問題？其實，佢哋鑽咗牛角尖，樣樣嘢都睇唔順眼，走都未嘗不是好事」。
有網民稱，「我有個親戚話走就走，兩公婆都算後生，小朋友讀小一，真係雞咁腳走。早排同佢媽媽飲茶先知，原來佢仔被警察拉過、保釋咗、無起訴，可能怕之後好似其他人坐監，嗱嗱聲走。佢媽媽飲茶時仲轉述個仔講，話遲啲走，可能連良民證都批唔到。早知今日，何必當初，佢哋仲唔係乜有錢人，好心當初咪咁魯莽，做事諗下老婆仔女啦。佢新抱本身都唔想走，唔想掉低女家父母，係個仔話唔走就要坐監，夾埋老婆走」。
https://std.stheadline.com/realtime/article/1581964/%E5%8D%B3%E6%99%82-%E6%B8%AF%E8%81%9E-Juicy%E5%8F%AE-%E6%B8%AF%E5%AA%BD%E5%A0%85%E6%B1%BA%E7%A7%BB%E6%B0%91-%E5%AF%A7%E9%9B%A2%E5%A9%9A%E5%B8%B6%E4%BB%94%E5%A5%B3%E8%B5%B0
