ViuTV真人騷節目每次都引來熱話，繼《最後一屆口罩小姐選舉》，近日宣布再次舉辦另類選美真人騷節目《造美人》並於6月7日播出，由強尼、沈殷怡和練美娟（娟姐）擔任主持，熊黛林及葉翠翠作節目評審。
節目結合選美與真人騷方式，參賽者不限年齡、學歷、身份，需參與3個月有關飲食調校、身體塑形的訓練課程和考驗，甚或進行醫學美容級微整形療程。ViuTV日前就於官方Facebook公開16強資料，表示：「佢哋將會於6月7日（星期一晚）9︰30挑戰自己，亦都挑戰你眼球，一齊用自己嘅後天努力，令自己由外靚到內，增強自信，人人都可以展現後天美！一齊期待佢哋蛻變嘅過程，一齊邊睇邊努力！」成個節目設有唔同考試及排名機制，成功大變身終極冠軍將獲總值20多萬獎金獎品。
16位參賽者年齡最高33歲、最年輕19歲，除咗拍過《愛·回家之開心速遞》、無綫出身嘅嚴楚翹（Ice），亦包括楊芷羚（Stella）、周卓盈（Tracy）等多位網絡紅人。呢次發布嘅參賽者照片，全部都係以淡妝為主，著上白色貼身運動衫褲，將肚腩、腰粗等外形上缺點表露於人前；節目仲好透明化，參賽者除咗公開自己滿意同唔滿意嘅身體部位，仲公開之前曾經改造過，又或者希望接受療程嘅部位，例如1號劉芷橋（芷橋）之前就曾經整過雙眼皮、隆鼻同埋箍牙，7號陳芊妤（Ann）就試過係下巴打透明質酸；而13號嚴楚翹（Ice）雖然以前未曾接受過醫美療程，但宜家就想試豐胸療程。
網民對於呢班參賽者有讚有彈，表示「呢啲都唔知係邊度搵出嚟」、「應該係整容節目喎」等，但亦有一班網民表示佩服佢哋有咁大勇氣，仲留言話：「咁都夠膽上鏡，其實佢哋已經攞咗冠軍呀，恭喜你哋」、「上鏡本身就會肥十磅，仲要著埋白色貼身褲，少啲勇氣都做唔到，俾啲鼓勵得唔得啊香港人～」、「好岩搵error做評判，雖然係404，但各有各靚，靚唔係跟潮流，而係有自己」等等，唔知今次邊位參賽者可以成功爆起？
《造美人》16位參賽者個人資料：
https://hk.news.yahoo.com/viu-t-v%E3%80%8A%E9%80%A0%E7%BE%8E%E4%BA%BA%E3%80%8B-16-%E5%BC%B7%E5%A4%A7%E8%B5%B7%E5%BA%95-%E6%B1%82%E5%BE%8C%E5%A4%A9%E8%9B%BB%E8%AE%8A%E8%AE%8A%E7%B5%82%E6%A5%B5%E7%BE%8E%E5%A5%B3%EF%BC%9F-062241975.html?ncid=facebook_hkfacebook_a19b6y3mefk