睇完平行天堂後，我先知道咩係真正既神作

雷姆（覺醒） 2021-05-10 18:23:27

個啲咩鋼鍊巨人係平行天堂面前都不值一提
咩無職異世界祖先異世界神作re0 更加係一舊牛屎
平行天堂先係真真正正既神作！

首先講下主角 - 太多陽太
豐滿男人味既男主角，做事認真，有勇有謀，決心絕對唔輸比艾倫，又有艾倫既一身肌肉同帥氣外表，但又唔會好似艾倫咁唔知自己做緊乜，陽太凡事目標明確。
硬朗既外表下，包含住溫柔。面對強敵，陽太絕不手軟，發誓要打敗所有敵人，但佢同時又好似炭次朗一樣也沙屍。陽太會鼓勵同伴，當同伴有難時，佢一定會伸出援手。同伴有事相求，佢亦唔會拒絕，盡心盡力滿足每一位身邊既人。佢用愛拯救每一個人。

再講下女主角 - 露美
露美身為聖騎士，有著勇氣與實力，面對一次又一次既難關佢都絕不退縮。外表如天使一樣既佢，心胸廣闊，包融世間上既一切萬物，係佢保護下，有既就只有安心。
天仙一般既露美，其實都有真性情。露美堅強而柔弱，大事大非總會強忍淚水，事後先偷偷忍泣，只有係陽太面前先會露出真正既一面。
要用一個詞黎形容露美既話，我會用女人味濃厚！

平行天堂元素眾多，集百家之大成。主角群對抗強敵時既滿腔熱血；角色離世既傷感情懷；同伴間真摯既友情；撲索迷離既伏線懸疑；使人熱血沸騰既肉搏戰；戰鬥過後既輕鬆幽默，每一幕都扣人心弦，歷歷在目。

平行天堂既節奏明快，絕無拖泥帶水，所有事件都連貫發生，正所謂少說話多做事，心動不如行動，令故事劇情發展迅速。

栩栩如生既世界
每件事發生都總有理由，自然而隨性，觀眾就好似身處於活生生既世界一樣，萬物跟隨時間流動。

人性既決策
平行天堂其中一個重點就係人性。人性即人既本性，作者對人類與生俱來既欲望透過漫畫表露無違。人性既決策在於一線之差，做與唔做，內心既慾望與掙扎，主角總會遇上人生交差點，每當主角做決定時，都要深思熟慮，亦有不少情節值得反思對錯，描寫人性絕對比起巨人更出色。

假如一般漫畫係2D,動畫係3D,咁平行天堂就係4D
一般漫畫只有觀能刺激，而動畫就係觀能，聲音，平行天堂則係觀能，聲音，氣味！作者筆下近乎完美既世界觀，每樣事物都令觀眾置身其景。當主角身處叢林中，聞到既會係花草樹木既氣味，聽到風吹樹搖，見到綠油油既大自然。當主角係其他角色身邊，聞到女兒香，聽到村莊內既流水聲，見到不同人物既美態。每到不同地方，都有該地方既風土人情，獨特氣味與口味，呢種完善既世界觀真係漫畫輕小說界前所未見！！！

每當我睇平行天堂時我都不能自拔，劇情踏入高潮時我更加係手舉舞動，驚險刺激既動作場面，往往睇得我熱血沸騰，彷彿自己就好似陽太！

你問我如果一生人只可以睇一套漫畫，我會毫不猶豫咁答你平行天堂 - 真正既神作！

星野瑠美衣 2021-05-10 18:24:24