地少人多係小學已經教，一句講你聽，你就接受？咁只係得小學程度，成年人唔單單係要知結果，更要知過程，唔係你連自己係正確定錯誤都唔知，當有人提出論證時你就連反駁都做唔到。
首先，點為之地少人多？要到達咩標準先可以講係地少人多？梵帝岡係咪地少人多？印度又係咪地少人多？中國又係咪地少人多？
有幾個數據，你要先搞清楚，唔好單憑感覺，憑個人睇法，憑單一數據去睇。
1）人口數量
2）土地面積
3）平地面積
4）土地使用比例
香港係城市人口排名中，係排35，比佢高既地方唔少，紐約、北京、東京、倫敦等都比我地多人。以下我會將紐約、北京、東京、倫敦作為對比去評論。
平地面積，我用Google地圖去比大家睇，愈多綠色就愈多非平地。
只睇人口密度，香港只係算中位，但要再睇睇香港統計處既2020年數據
以最高東京人口密度為14790人／平方公里睇，香港中西區、灣仔區、東區、所有九龍區、葵青區都比東京人口密度為高，只係北區同離島區將大部份數量攤分，導致最後得出6890呢個平均數。
原因在於，香港有60％地屬於山坡，有40％斜度少於20度，40％介乎20度至30度之間，20％介乎30度至45度之間，少於1％超過45度。
極大面積不適合局住及規劃，所以係幾個大城市中，香港人口密度比例算係高，而呢個數字稱唔稱得上地少人多，就要睇你自己主觀判斷喇，如果你認為香港地要係全世界最少，人要係全世界最多，咁香港絕對稱唔上地少人多。
有一項數據可以分享下，就係城市住宅用地比例（住宅用地／總面積）
香港－6.8%(平地計16.5)
紐約－40％
東京－58％
北京－30％
倫敦搵唔到數據
香港最可怕既地方係，居住比例奇低，即係極多人口聚集係極少地方，你可以諗，咁咪將個住宅比例提高咪得囉，咁就要講多樣數據，就係土地使用比例。
比起其他大城市，香港有一個最大分別，就係無周邊土地，紐約、東京、北京、倫敦都有周邊土地，好似你睇東京成田機場係千葉縣，而唔係東京都內，有周邊土地就可以將部份次要產業分散係四周，例如休憩土地、墳場、農地、工業地等等
當要將咁多樣必要既土地使用量放係一個天然以坡地為主既城市，問題自然就多，所以唔好好單一地睇某一項數據，例如新加坡地仲細，人又多，因為人地有90％以上係可發展土地。
今日就講咁多先，當你再面對香港是否地少人多時，就會有更好既判斷，唔好再停留係人地講乜結論你就信既小學階段喇（我呢個都只係中學level）
上次篇文有人叫我一次過，今次我就一次過講簡單既題目，希望大家會有多少少認識
