[年經]DSE中文考過8次5** 分享考試心得+你問我答

自介一下先
考過8次DSE 5**
作文4次抒情4次議論 兩種文體都有寫
閱讀同綜合就8次都全部5**晒
說話成日失手拎4/5
(因為以前唔忍心蝦小朋友
覺得D人成個未來放左係DSE 比你D補習佬玩到唔合格會好慘
所以後來知道原來可以申請延期考
然後係同做媒既大學生玩先至出返全力)

就考DSE 一來最近終於得閒左小小
可以分享下一些心得經驗
二來之前中文科改革都引起好多爭議
本身諗到好多野 順便分享下我自己對教育同考試之間既睇法

之前舊POST都有過小小分享
因為我分享好隨心 諗到咩打咩
所以唔再重複打返 有興趣都可以去睇睇
https://lihkg.com/thread/1308721/page/1

順便9up下 小弟最近岩岩開左個新既ig account
得閒分享下中文野
如果有興趣都可以follow下
https://www.instagram.com/ptalkchinese/
(我2019年係DSE用愛情故寫左個5**作文
IG呢度入面都有得睇)

講小小中文考試
我覺得其中一個問題係
學校教既野同考試要既野唔係同一樣野
最後就搞到學非所用 然後學一大堆唔考既野
而你又分唔到兩者之間既關係
最後只會令呢科愈黎愈虛無同難入手
但其實我自己覺得
中文科就一定始終都係有跡可尋
只係睇你理唔理解到中間既思維

舉個好簡單既例子 就係修辭既問題
唔知你地有冇試過 學校派既筆記
特別係十二篇範文 會有好多好奇怪既修辭效果

舉例：「擬人法」呢個修辭經常見到教科書上既修辭效果係
「將事物的形象具體化」
但其實你係從來未見過DSE考試係有過呢D答案
咁如果你係學校學呢D Term 出到去照寫返落去
咁你就死硬 因為一定冇分

但其實正確既答案係咩呢?
通常會係突出一個形象特質，
舉個經典例子，如果「太陽伯伯對著我微笑」
咁太陽係唔識微笑 所以呢度當然係擬人
然後「微笑」指既應該係一個適中舒服既溫度
所以其實微笑係想突出「太陽」既「溫暖」、「和暖」

講返先
最正統完整既答法應該係
「將陽光溫暖的形象具體化」
冇錯，個修辭效果真係要咁答
然後如此類推 大約你會估到
如果我話「邪惡的太陽彷彿要把我吞噬」
咁太陽唔識吞噬 所以都係擬人
而正確答案會係
「將陽光猛烈的形象具體化」
而如果擬人法用係花朵 / 電話 / 番薯等等上面
大約你會估到係類似
「將番薯/花朵 xx的形象具體化」

好啦
所以建基於「唔同既物件會有唔同既特質」
所以傳統中文教科書會將佢歸納概括成
「將事物的形象具體化」
我想指出：「教科書冇寫錯亦都冇教錯
問題係老師未必教得清楚 學生亦未必get到重點」
其實我地並唔係要學生背「將事物的形象具體化」呢一句
而係想你具備一個能力將唔同既「事物」同「形象」整合
望到篇文係講咩 就可以從文意去分析到佢中間形象係咩
所以就會得出果啲「將陽光溫暖的形象具體化」既答案

然後好啦 下一件事就係考試制度既限制
考試閱讀卷要有評分既標準
佢逐分逐分計比你 佢唔會係要你寫「將事物既形象具體化」先有一分
而上面寫左咁耐
我諗大家大致會估到 「溫暖」、「猛烈」、「嘈吵」呢類term先會有果一分
然後其實個marking就會係好清楚標明
「考生能指出該事物的特點，給一分。」
所以去到最後，
「將事物的形象具體化」呢一句 的而且確係擬人法既重點
但係係考試既制度下 果一分只會比左係「形象」上面
考生答到先會有分，答唔到就冇分

下一樣野就係補習老師既影響
香港好多補習名師啦 (我自己都係做補習)
所謂既考試技巧其實唔係旁門左道
只不過係學生唔想晒時間理解 咁我地幫你整合理解
然後整條所謂既「答題公式」比你背咁解

例如問親擬人法
你就會係寫
「作者透過賦予太陽微笑的行為，突出了陽光溫暖的形象。」
上面呢度，「微笑」呢兩隻字係文本依據（擬人之處）
「溫暖」呢兩隻字係形象（修辭效果）
咁樣學生如果死背
「作者透過賦予（事物）（動作）的行為，突出了（事物）（特質）的形象。」
就可以保證答得岩擬人法

補習出skill出技巧既做法並唔係錯
只係我好懷疑其實啲學生係背skills既過程中
明唔明白其實個skills背後都係有d concept
而佢同真正中文修辭學上既理念亦都係殊途同歸
我自己會好希望教書既時候順便可以比D學生明埋D思維
不過教左幾年書大多數人都只想聽考試點高分,中間推論唔想知
有時講多D題外話就見到有人係度禁電話唔聽我講野
而且教學時間緊絀 咁後來補補下就算啦都係唔係堂上面講經啦
結果諗諗下呢D野就不如係網上免費分享好似仲好

例如下面呢幅圖就可以好清楚解釋晒我成個理論

總分5* 閱讀3

如果OK既話 我舉多一個例子
好多論證手法 例如比喻論證 佢會咁樣寫：
「將抽象的道理具體化 更能使讀者明白 / 理解」
咁其實你係從來未見過DSE考試係有過呢D答案

果個咩抽象既道理具體化基本上係冇用的
但係你如果睇左「擬人法」既例子
應該大致估到個思維啦

例如十二篇入面既魚我所欲也
魚與熊掌既比喻
其實係將「生命與道義價值上對比」
呢啲咁複雜既野變得簡單化
的而且確 道義比較抽象 仲要講價值係複雜
所以用「魚」(較平) 同「熊掌」(較貴)做比喻
就清楚突顯出「道義的價值比生命高」
然後再從「二者不可得兼,捨魚而取熊掌也」呢一句
就會推到「說明當生命與道義不可兼得的時候 就應該捨生取義」
成個推論既完整答案就會係
「以價值較低的魚比喻生命，價值較高的熊掌比喻道義，以此突出道義的價值比生命高；說明人在遇有兩難的時候，應該捨生而取義。」

要打又係可以打一大段野出黎
不過上面擬人寫過一次呢 呢度就簡略化算啦
但係唔知大家有冇明左一樣野
就係補習既公式大部分都係
「（手法的特點），以此突出 / 說明 / 強調 XXX（特質/情感/道理）。」
(其實上面呢一句都幾重要 睇得明既話你中文都應該有返咁上下理解)

補習既邏輯就係將教科書上面所有唔等使 / 考試無分落袋既野刪去
(e.g 咩「吸引讀者注意」、「加強讀者理解」、「增加權威」、「具體化」)
然後set一條可以簡略精準答中point既句子比學生背
如此而已。

「中文考試」同「真正中文」上面既巨大分別,
係導致好多學生無從入手,怕左中文,而且又炒中文既主因之一，
當然仲有好多原因，但係大家讀中文，我諗好緊要既都係清concept，
特別係閱讀卷，單靠所謂既答題技巧 / 框架，
通常你最後都係覺得自己好似學左好多野
然後考果陣就乜春都用唔到肥左
然後就可以上網鬧個老師係廢柴咁樣的了

我唔完全係一味為中文科辯護
我都覺得成個考試制度有好大既改革空間
包括教科書既更動 師資既培訓 考試合格率既調整
同埋最緊要係我個人覺得中文要3先入到U係一件唔太合理既事情
但係呢啲都係牽連甚遠既問題 都唔由得個別人士去判斷同執行
我就只係係能力所限 睇下可唔可以幫下其他人咁樣

上面關於「修辭題」係一個例子
我想再講講另一個例子係關於「比較 / 矛盾題」
其實所謂既比較題、矛盾題
當中最大既重點只係在於你搵出一個共通既比較平台
即係簡單例子係:
A好靚仔 B就好樣衰 (建基於「外貌」平台)
A好有錢 B就好窮(建基於「資產」平台)

一句講晒：比較題係要你「整理並說明兩者的比較平台」
矛盾題就係「判斷兩者是否同一比較平台」
有時我唔明點解補習會拆咁多Skills 明明同一個concept黎
學野先學原理 去到睇技巧就一點就明

舉個例子先 2014dse q20.



題目問孔子同d學生遇到困境
從孔子同3個學生既對答入面
見到顏回比2個人既優勝之處係咩
你地可以試下做左先 睇唔明可以上網搵語譯
下個reply出答案

拿 篇文入面
子路係「覺得自己唔夠仁德 所以人地唔用自己」
子貢係「建議孔子降低標準 等人地去用自己」
顏回係叻仔 自然兩part都贏晒佢地 就唔講啦

咁你要做既就係「歸納」出一個比較平台

子路一唔掂 就懷疑自己唔夠仁德
咁即係乜呢? 即係「唔夠自信」囉

子貢一唔掂 就覺得不如降低標準
呢個難小小可以要d比喻
類似你想減肥 本身80kg想減到70kg
但減左兩個月發現減唔郁 就決定「算啦 減到75算啦唔洗70」
你一唔如意 唔係努力去做多d運動 而係減低自己個目標
呢個咪就係「對目標唔夠堅定囉」
咁其實你答既時候
就先比句中心句 再分別解釋 就會係答案架啦
「顏回比子路更有自信。(分析顏回優點)(分析子路缺點))」
「顏回比子貢更加堅定。(分析顏回優點)(分析子貢缺點)」

完整答案我就唔完全寫晒啦
用圖出比大家先


所以其實「比較題」問你有咩相通唔相通
其實只係想你歸納出個共通之點(比較平台)
呢個就係中文科需要考核考生既「歸納」、「理解」能力
我又完全唔覺得係所謂唔知考緊乜

(順帶一提 有一樣野我覺得幾有問題
就係的而且確有D題目係作者都答得唔好
果D係中心思想題 我都成日答錯
但係一份卷最多只有一兩題 近年多數都係0-1題咁大把
中文閱讀66%就夠拎5** 佢本身就預左你會錯好多題
而如果你JER住果一兩題好深好深既題目就否定晒成份中文閱讀卷
其實都頗為以偏概全)

然後「矛盾題」啦
其實問你有冇矛盾 係想問你佢係咪建基於同一個比較平台
即係如果你話
舉個我成日舉既經典例子

「有啲老豆老母考DSE之前就成日鬧D仔女『讀唔好DSE第時乞食呀你』；
但係考完DSE，個仔女考衰左 佢地又會安慰仔女『阿仔唔緊要，DSE只係人生一個好小既關卡姐，加油！」
咁老豆老母講野有冇矛盾?
其實呢一題 字面上係好重矛盾 因為佢一時話 DSE好重要，一時話DSE唔重要
但係如果你搵到個比較平台，就會發現佢地係出於同一「出發點」，
「未考之前嚇你DSE好重要，係想你比心機讀書，目的係為你著想」
「考完之後你衰左話DSE唔重要，係想安慰你唔想你自暴自棄，目的都係為你著想」
咁你老豆講野前後字面上有矛盾，但背後都係建基於為你著想（同一比較平台）咁咪自然「無矛盾」囉。

所以所謂既「矛盾題」，其實就係「比較題」既一種設題變體。
通常佢舉一個例子，字面上係好有矛盾
但如果「矛盾建基於同一比較平台」就即係有矛盾
而如果「矛盾並非建基於同一比較平台」就即係冇矛盾

舉一個例子
「香港政府宣稱唔想『將政治帶入校園』，但係又在校園裡舉行『國家安全日』，請問做法是否存在矛盾?」

咁樣我諗大家比較容易睇得明啦?
國家安全日好明顯都係政治既一種啦
咁點解你叫人唔好將政治帶入校園,又搞國家安全日? 明顯係有矛盾。
所以答案寫
「有矛盾，政府不想把政治帶入校園，但國家安全日顯然是政治的一種，故此其實它是主動把政治帶入校園，做法與說法並不一致，所以有矛盾。」

其實只要你講得通，一樣可以係冇矛盾。
「沒有矛盾，政府說『不想把政治帶入校園』，背後目的只是不想學生宣揚反政府思潮，乃是為了鞏固政權；而舉行『國家安全日』，目的是想灌輸愛國思想，背後同樣是為了鞏固政權。兩者行為上有分別，但背後出於同一原因，所以沒有矛盾。」

呢度上面既答法開始有啲夾硬黎
你仲會覺得「咁咪即係唔岩囉 維穩既」
係呀 所以中文科鼓勵我地思考，你可以分析到呢樣野
咪會明白政府由始至終都係維穩為主
而所有行為都係表裡不一, 咁你睇野咪睇得清楚左囉
其實我覺得呢D思維訓練多啲 對學生既邏輯培養係有好大幫助
我記得之前係連登見過一個POST 係話咩中學應該加咩必修科
有reply話「邏輯」，有reply話「管理情緒」
其實兩者我都好同意,不過前者(邏輯)其實係中文科入面係滲入左好多
只係在乎究竟我地明唔明白佢係考緊呢樣野咁解

我記得我讀大學果陣有個prof.講過「中國係最自由既國家」 果下我一聽打個突心諗呢條友癲得好勻循喎。點知佢下一句話「只要你唔危害政權,係中國殺人、放火、強姦、搶劫都可以唔洗負責任,嘩幾自由呀?邊有國家殺完人唔洗坐監 咪中國囉。」全班忍唔住笑到pk 但係其實諗一諗 就類似呢個矛盾題比較點既思路啦(睇你從咩角度出發)

上面既例子解釋左上年dse 2020一條矛盾題
佢最後個答案係有兩個version
可以寫「有矛盾」亦都可以答「冇矛盾」
所以即使你答案立場同我唔同
都唔代表你會冇分
(利申舊年答有矛盾滿分 然後嚇死一堆答冇矛盾既學生)
主要係睇你點推論

比埋條題目同埋答案大家睇下



大致如果你明個logic
就係「從A比較點出發->有矛盾」
「從B比較點出發->冇矛盾」
(類似前面「國安日」果題)
所以答有、冇都可以拎到滿分
老師睇既 係你講得合唔合理 而唔係你答案立場中唔中

呢個比較同矛盾題思維比較複雜
相信比起上面既擬人法難明小小
所以今日講到呢度先
睇下聽日/後日有時間會唔會出多小小分享
如果有咩想問都可以係呢度問

其實卷三真係考常識
果d推論係基本邏輯思維黎
我覺得大部分補習老師都應該教得幾好
(應該咁講 連卷三都教得唔好真係有點兒那個...)
如果有補習既話跟返本身學開果套就ok

不過我都整理緊d邏輯 但偏向係想成份中文咁樣講就唔係側重卷三

鵠巴

推

strong post LM

想問Ching點睇 有時候原文作者 做番DSE閱讀理解都攞唔足分

留名

推

仲話中文5**
少少同小小都未識分