原定要12點趕到去青衣，結果都係遲咗....
明明已經行到好頹，不過遠處見到隊友已經等緊，腎上腺數又再次撻返着
最後我哋比原定時間遲咗大半個鐘先到東涌會合上山教練，但教練即刻同我哋講，如果我哋照原定計劃，由心經簡林嗰邊上，有機會趕唔切日出前攻頂，所以建議我哋喺伯公坳嗰邊上。所以最終我哋決定改為伯公坳上，心經簡林嗰邊落。
沿途一路上伯公坳，其實感覺都還好，去到伯公坳口，準備要摸黑上山，仲有啲莫名其妙嘅興奮。
期間見到個 “霧” 牌，個心有啲不安感。
一路上山，一路Feel到啲風，初頭幾舒服，之後開始有啲寒意，教練話如果上到山頂等日出嘅時候，高度加濕度會更加凍，所以教練建議我哋喺距離山頂大概1小時路程嘅地方，紮營取暖稍作休息，以免流失太多熱量。就係咁，我哋喺嗰度逗留左大概1小時。
0500, 我哋要收拾行裝，準備繼續上山，不過因為太凍，同行嘅絲打有啲發冷頂唔順，要即刻飲暖水，同埋要開求生氈保暖，情況有啲令人擔心。
同時，其中一名戰友亦因為太攰，雙腳抽筋，要教練即時急救，要飲寶礦力粉先可以繼續上山。
搞咗一輪大家先可以繼續上山，但係當時已經係5:50, 距離日出時間只有大概半小時，霧又開始大。大家唯有頂硬上趕路，希望可以日出前攻頂。
呢段肯定係最難捱嘅一段，時間趕急，大霧到成身濕晒，又凍又大風，眼見個天開始光，好驚趕唔切，但又淨係可以繼續行，好沮喪。
突然，我哋聽到前邊有其他行山友嘅聲，嗰刻我哋知道我哋終於到啦
雖然上到去，真係因為太大霧，睇唔到日出，有啲遺憾，但成件事都總算係完成到，係開心嘅。
一邊好似放下左心頭大石之際，另一邊甚至落山先係打大佬，好忐忑
我哋向住心經簡林嘅路線一路落去，沿途都幾靚，好似幾順利咁，幾個鐘後就落到寶蓮寺，時間係9:30am左右，呢個時候我哋先發覺，原來昂坪市集返去東涌仲要三個鐘路程，但係我哋10am就夠30個鐘
糾結咗一陣，最終堅持繼續唔食嘢行埋落東涌先，當然要食gel補充糖分，如果唔係一定搞唔掂
就係咁，進入昂坪棧道，比起落山舒服好多，但直到無啦啦有少少雨
條路變得濕滑，步伐變慢，一慢個人又開始攰 一攰就出事，cam man哥哥差錯腳跌左落樓梯，教練即刻要急救，好彩傷勢唔重，可以繼續行，不過就唔可以再孭住行裝，要由教練幫手孭落山
所以冇行開山嘅真係要搵教練陪同
經過嗰兩座塔之後，終於都見到市區，之後嘅時間就好似行屍走肉咁倒數地下嘅座標
再行咗個零鐘先至真正落到平路，同教練道別之後，我哋幾個就繼續行埋去終點，結束總共33個鐘嘅路程
遺憾嘅係冇辦法踩足三條線，但開心嘅係可以同大家行到尾。總算完成咗件事。
當然對行開山嘅人，呢啲可能係小兒科，但對於我地，特別係兩個絲打黎講，我覺得佢哋已經好勁架啦
一路行一路見到你哋留言，亦好大支持。
最後77地都要講句：多謝晒
