仲有5個月，工人姐姐就走了..

一齊住咗十幾年嘅工人姐姐要番鄉下嫁人
https://lih.kg/2447681
- 分享自 LIHKG 討論區

睇到呢個po，原本想留言，但越打越多野講，所以決定自己開po
因為喊緊，所以會打到1999，辛苦晒你地睇

我有一個工人姐姐，佢係我出世前三日已經黎到我屋企，到宜家21年了

屋企呀爸呀媽家姐都要番工，所以相處得最多就係工人姐姐，好多時屋企都淨係得我地兩個，我份人好怕醜又少野講，我淨係對住佢先可以暢所欲言

細個比家姐恰，佢會幫我同媽咪講，幫我出頭
小學打交，然後可能比學校記過，我好驚比呀媽知，我同佢講
中學同老師講大話，又係好驚，又係淨係敢同佢講
考dse果陣好大壓力，又淨係會同佢講，佢又會好好咁幫我揼骨
識到女朋友，又係第一個同佢講，帶佢番屋企佢又好識做唔會同呀媽講

好記得佢講番，細個呀媽問我錫邊個多d，我話係工人姐姐
同埋佢以前星期日出去放假，我會隔住個鐵閘咁喊住叫佢番黎佢話佢每次都好唔捨得我，搞到佢都想喊，自此佢每次朝早就會盡量唔嘈醒我，廢事見到我喊

前年套淪落人，我知道自己一定會喊到七彩，我就自己一個去睇，結果喊到眼都痛，要係商場等到好番d先走到

其實上年已經決定左，佢8月就會走，我一路都冇乜野，可能係逃避，但直到今日睇到個po真係情緒大爆發

我同屋企諗住等佢同我慶祝埋我8月生日，佢就會走
我呢幾年都一路幻想究竟果日會係點
我覺得我會冇勇氣送佢去機場我驚我唔比佢走我做唔出笑住咁送佢走..

我講野唔叻，又唔識講呢d肉麻野，加上大個左成日打機/入房，已經好少同佢傾計但要我諗樣野同佢傾計又諗唔到..

我嘅童年回憶入面，有好多開心或者難忘嘅時刻都係有佢份，佢經歷過晒我由小學到中學再到大學嘅轉變，幾個月後大學畢業就係呢個旅程嘅終點..真係好難想像屋企冇左佢會係點..

佢仲話第時我結婚要同佢講，佢可能會飛番黎飲

呀爸會整一塊牌送比佢，佢叫我諗一句野寫落去，我都未諗到我諗住再送份好d嘅禮物比佢

佢係我生命中好重要嘅人，咁樣一走真係冇咩可能會再見，我係好著重感情，由其係親情嘅人，佢走=親人死左一樣..真係唔識點面對呢d冇得用一言兩語講晒出黎，我都唔可以趁一個po表達晒出黎，但我真係好想好想抒發晒出黎

唔好唔開心
既然你都當佢係屋企人
祝佢一路順風 永遠幸福啦
第時咪去果邊旅行搵佢玩囉

其實你覺得咁重要點解你唔留佢contact?
遲啲開返關可以當探個朋友啊

咁當然
諗住第時大個事業有成
會著晒西裝飛過去搵佢
但驚去到見到就會唔捨得走..唉

我以前請過四個工人
依家都keep住有聯絡

樓主喊到碌柒咁 face id都認唔到
密碼又入極唔岩
要好番d先開到signal

生左仔女又wts share 俾我地

21年同住， 親過絕大部份親人添啦

佢幾歲嫁人？

本身諗住遲d先...一路都唔想諗呢件事
但我有佢fb了，我諗有呢個可以拎埋佢印尼電話、地址之類

同你一樣 出世睇到我十八歲 都係走之前五個月喊到痴線 dse都冇心情考
仲記得上年喺飛機睇倫落人睇到喊左好多次

四個唔及一個由頭到尾感情深

同埋工人呢個定位好特別，冇血緣關係，但係會由細睇到自己大，去到某個位就會離開
冇工人真係好難明呢個感受

我明我以前工人又係由細睇到我大，佢返去我都好唔捨得不過都叫有保持聯絡，知佢生活得開心就夠了

好sad
香港好多小朋友都有工人姐姐親過自己父母嘅感覺，見過好多小朋友唔開心或者放學都係衝去攬住工人姐姐、而唔係佢老母。但工人姐姐唔會陪一世，好似樓主咁大個先要分離真係好殘忍。

長年離家，工人姐姐同樓主可能親過同佢自己仔女，咁樣又係sad 。

父母陪小朋友嘅時間真係緊要過個幾皮嘢一個月

呢啲奴隸制度唔應該繼續落去，搞到兩個家庭嘅小朋友都sad

佢係結左婚先黎香港架
我仲以為全部工人都係咁
不過聽佢講 佢老公直情帶女人番屋企，佢寄番去d錢又比佢拎去亂用
呢d廢男人真係

不過樓主要勇敢d面對，同埋呢幾個月調整下心態去接受。

信我，一定要送佢機。

連你咁親都唔送佢機佢會好失望

好在資訊科技發達咗，有心聯繫實得嘅
你哋咁多年相處，唔會斬得甩嘅

第日搵到工儲錢去探佢

你老豆先係最唔捨得個個 小左個對手

我屋企個個28年

網上視像見咪得囉
咪阻人結婚啦！

放過人啦
凳佢開心