首先食飯係一個大問題，吐骨佢永遠都係吐吐吐，啲碎骨飛到周圍都係。
有次我媽叫佢唔好吐，佢又話「邊有吐啫」，其實根本全屋都聽到。你開聲同佢講根本冇用，所以有時佢一吐，我就會將最近佢嗰碟餸撥近自己，同埋夾走最近佢嗰一舊，希望佢自己會醒水。
當然，都係冇用。
好多年之前，連我叔公都忍唔住出聲叫我老豆唔好吐。我叔公，即係我阿媽個老豆個細佬，都忍唔住要出聲話佢阿哥個女個老公，可想而知有幾討厭。
唔止吐骨，刷完牙啷口，唔知點解永遠都係出哂力吐返啲水出嚟。冇錯刷牙個鋅盆都唔expect會乾淨，但我真係唔明點解下下都要吐吐吐咁吐啲水出嚟，個鋅盆又唔係大，啲口水根本飛到周圍都係。
有時吐之前仲要好似公園啲廢老咁「qua!!」一聲，跟住連埋啲痰「qua toooo」咁吐出嚟。
————————————————————
佢通常係最快食完嗰個，唔知點解佢每餐飯有個指定動作，就係一食完就會即刻攞張紙巾撩鼻屎，唔係，係成隻食指伸哂入去，喺鼻窿入面打撚哂圈嗰隻。
我坐佢對面，又食得比較慢，基本上每次見到都好撚唔開胃。
佢從來唔會理同枱嗰啲人食完未，有次我媽盡量好語氣咁問：「點解你食親飯都要撩鼻屎嘅？」，佢個答案係「痕咪撩囉」。可能呢個答案好 make sense，但都睇得出一個人究竟會唔會理其他人感受。
用紙巾撩鼻屎係好事，點都好過徒手，最弊係佢又環保，張紙巾上秒撩完鼻，下秒佢攞嚟抹嘴。幾分鐘之後佢食生果，一路搣個橙，一路攞返嗰張鼻屎紙巾抹手，然後繼續搣返下一舊橙放入口，食完再攞返同一張紙巾抹嘴。
佢好唔鍾意人地一餐飯用幾張紙巾，環保當然係好事，但大前提係起碼用得乾淨，而佢嗰張就撩完鼻屎再抹嘴再抹手然後擺野入口跟住抹返嘴，屌。
————————————————————
我地食飯會用啲膠枱布鋪枱，而每餐飯食完都係我負責執枱。
頭先佢一如既往咁撩咗成分鐘鼻屎，撩完之後就好順手咁 pat 咗喺枱布鋪唔到嘅地方，執枱嗰陣我同佢講咗句「你張紙巾呀」，諗住佢會自己丟咗佢，或者放返喺布上面，俾我包埋佢。
屌你佢同我好求其咁放咗喺佢對筷子上面，我心諗咁我點撚樣執呀。又要拎走你張紙，又要幫你執筷子。
餐飯大家都有份食，我包枱執筷子當然冇問題，但張紙巾我冇份撩，你理下其他人感受，放好少少等我包咗張枱布，都唔係好難啫？
————————————————————
除咗食飯，個人衛生都好有問題。
食飯就話用紙巾撩，但佢平時除咗瞓覺，其餘十六個鐘佢都好鍾意放隻手入鼻窿。有時未必係撩鼻屎，而係好似慣性小動作咁，將佢手指插入鼻又拎返出嚟咁。
搞完個鼻你用紙巾抹返，或者去洗手，我地都冇咁㷫。佢搞完個鼻第一時間，一係hi落自己條褲，一係hi落自己件底衫，一係直接繼續篤手機或者摸屋企其他野。
幾年前我買咗本書，唔知點解佢無啦啦攞咗嚟睇，一路睇，佢隻手指又係一路插入鼻又拎出嚟，又插入去又拎出嚟咁。我平時都唔敢話佢，但嗰次真係忍唔住開口，叫佢用緊其他人啲野嗰陣唔好撩鼻。嗰本書自此我冇撚再睇過。
————————————————————
打乞痴唔掩嘴，呢啲就更加係基本野。
佢打乞痴又好撚盡興好撚大聲，佢星期六日早起身，好多時佢一打乞痴我就會即刻醒，如果聽得出佢係冇掩嘴，我有時都會send個message叫佢掩嘴。
當然同吐骨一樣，佢永遠都係話「有掩」、「冇吐」，但有掩同冇掩嘅聲係好大分別，聾嘅都聽得出。
————————————————————
呢一年武肺，我地屋企嘅衛生習慣都有改變。例如以前返到屋企我的確未必會洗手，而家已經習慣返到屋企一時間用鹼液洗手。唯獨我老豆永遠學唔識。
我阿媽係全屋最緊張嗰個，但佢對我地要求都唔算高。返屋企用鹼液，呢個係最基本。
我老豆通常都係最早返到屋企嗰個，所以我地平時都唔會知佢點洗手。有次我早過佢返，聽到佢返嚟之後水喉聲只係開咗幾秒就閂咗，我就估到佢應該係冇用鹼液。
食飯嗰陣我問佢平時係咪冇用鹼液，佢就口窒窒咁話「唔係次次用」。我阿媽比較緊張，聽到之後就嘈咗我老豆一陣，跟住老豆屌返我阿媽轉頭，好惡咁叫佢收嗲，嬲到我阿媽衝咗落樓，兩個月冇理過我老豆
其實佢鬧嘅係我阿媽，但錯嘅係佢自己，佢仲要惡人先告狀，而且真係一向都好污糟，所以我都撐我阿媽，嗰兩個月都冇理過佢lol
而家我媽嬲就嬲完，我老豆啲態度又開始崛返，食飯開始撩返鼻，洗手開始求其返，真心冇撚得救。
屋企有人，佢就做樣用清水洗幾秒，如果冇人嗰陣，以佢咁嘅衛生習慣，你估佢會唔會洗？
————————————————————
污糟都算，佢更加大嘅問題係唔理人感受，話之你係咪食緊飯、話之本書係咪你嘅，總之佢想撩鼻就撩鼻。
唔理人感受，都算，佢從來唔會聽人講，呢下仲慘。
唔聽人講，我都算喇，有時我地真係忍唔住，叫佢唔好撩鼻屎、唔好吐吐吐，佢即刻黑鳩我地面，呢下最攞命，都唔知點溝通。
多謝睇哂嘅你，有興趣嘅我帶你嚟我屋企親眼睇下live。
