《當NTR發生在自己身上》

我同梓晨一齊去拜佢前女友。
其實今次都係梓晨第一次嚟，佢一直放唔低，亦都冇勇氣嚟，更怕再次見到佢嘅屋企人。

行咗足足一百級樓梯，終於到咗。

梓晨仲講笑話行咁多級，係個天比佢嘅修行。

「咁我就係個天派嚟陪你修行嘅天使。」

「傻妹，邊有人自己話自己係天使㗎！」佢輕輕拍咗我個頭一下。

墓碑上嘅相，係一個短頭髮嘅女仔，佢好後生，好靚。
而隔離就係一個BB仔，眼仔碌碌嘅佢，同梓晨好似樣。

梓晨跪咗喺地下度喊，聽住佢嘅喊聲，唔知點解我都想喊埋一份。

內心一直充滿內疚感覺嘅梓晨，一下子釋放晒出嚟。

應該軟弱嘅時候，就即管喊啦。我摸住梓晨個頭，就好似平時佢安慰我咁。

突然有一對老夫婦走埋嚟，交咗封信比我，同埋比咗個用膠袋入住嘅手巾仔我就走咗。

唔洗問都知佢哋就係梓晨前度嘅父母了，唔知佢哋係咪一直都等緊梓晨嚟，交呢封信比佢？

我踎低身，比咗封信梓晨。

「老公！
容許我咁叫你一次，係第一次，亦都係最後一次。
咁耐以嚟同你一齊，其實我真係好開心㗎！你又搞笑又可愛，我真係非常非常非常之愛你呀！

你知嘛，我知道自己有咗BB嘅時候真係好開心！因為我終於可以有同你嘅愛情結晶品！

但係我發現原來你好唔開心，一切都係我逼你。好對唔住呀，我唔係想折磨你，我只係以為你有同我一樣嘅感受⋯⋯

真係超超超超超對唔住！哈哈！

唔知睇緊呢封信嘅你而家幾多歲呢？有冇識新女朋友？有冇照顧下我屋企人⋯初初佢哋可能會好憎你，但係我都寫咗信比佢哋！你放心啦，佢哋一定唔會嬲架！

對唔住呀，我哋講過要同年同月同日死，我要食言啦⋯⋯

我知道繼續咁落去，大家都唔會好過，我想比多次機會你，過一個你有得揀，屬於你自己嘅人生！

如果有下世，我先再愛你一次啦⋯⋯希望你今世開開心心，我霸定你下世架啦！

仲有阿仔嘅手巾仔，你幾唔鍾意都好啦，上面有佢陣除，BB嘅味道好香架！做父母點都要聞過嘅～

加油呀爸爸，你要努力埋我個份～哈哈！

Ps我估阿仔會咁講XD

老婆上
」

睇完封信之後，梓晨喊得仲西利。
我冇睇過封信嘅內容，但我知道，係一段心酸，沉重，同時又會會心微笑嘅文字。

就好似阿偉嘅字條咁。

好多事情，冥冥之中已經安排好晒。
如果梓晨一早睇到呢封信，佢就唔會遇到我，即使遇到我，都唔會再有心結要由我幫佢解開，我哋亦都唔會走到呢一步。

三年後

我唔再係屋企教琴，用阿偉留比我嘅錢，開咗間音樂中心，自己都會親自教班。

梓晨做咗泳隊教練，身型越嚟越fit，得閒嗰陣就會幫人影下相，個囡一出世，已經比佢當係model 咁狂影⋯⋯

阿妹繼續係KOL，最估唔到嘅係佢都入到大學，自從嗰件事之後，老媽子就話佢變晒，不過唔係變得更壞我就放心啦。

我同阿妹關係好咗好多，佢成日上嚟我屋企食飯，仲會不時傾下電話。

阿輝就⋯⋯依然當阿妹係公主啦，佢都搵到份長工，打算過多兩年求婚，希望順順利利啦。




「林嘉慧！唔準亂跑呀！」我喺日本羽田機場追住個兩歲嘅小朋友跑。

「媽咪，你跑得好慢呀。」

梓晨走埋嚟一手抱起佢，「唔準蝦媽咪㗎，衰妹。」

同時間，佢拎埋啲行李，另轉身望住我。

「行啦傻妹。」

冇錯，即使我已經做咗人媽咪，佢都依然會叫我做傻妹。


喺車上面，望住又藍又白嘅天空，聽住富士山下，唔知梓晨又有冇諗起佢嘅往事呢？

阿囡喺後座跳下跳下，唔係好識講嘢都跟住歌詞一齊唱。


阿偉，我已經原諒咗你，正確啲嚟講，係我冇辦法唔原諒你。

唔係因為你過咗身，唔係因為我仲掛住你，而係⋯⋯我而家真係好幸福，幸福到我唔想憎恨任何人。

到達Ada間餐廳，估唔到我哋係最早到，坐低玩咗陣手機，大家都到齊了。

分別係嚟咗日本留學嘅細佬同琪琪，Ada嘅日本老公，仲有個啱啱出世嘅BB。另外就係Kathy，佢著到成身名牌，睇落好風光，但係就一個人嚟日本見我哋。


人大咗，都冇話咩絕交、唔同你玩，唔啱嘅就默默咁走，有心嘅，想見就點都會見到。

我哋永遠都唔會知道未來係點，呢一刻絕望，唔代表未來唔會得到幸福。

或者喺我心底裡一直默默相信，會出現一個好似咁梓晨嘅人嚟拯救我，所以我先會遇見佢。

日後，我會用最大嘅努力，繼續我嘅人生。

我抱住阿囡，錫咗佢塊面一啖。


《完》

多謝晒由頭睇到尾嘅你

多謝樓主寫左篇咁好嘅文😭

多謝讚賞

多謝你呀

一次過睇曬
我覺得好睇呀
支持樓豬
估唔到劇情發展真係
睇睇下會笑左出聲

多謝樓主一直keep住寫到尾
雖然呢個故好痴撚線但係我都好中意
期待你下次寫故 加油

估唔到咁有深度

一次過睇曬
由笑睇到喊

多謝你

多謝支持

我自己都寫到喊

最尾好感動

睇到一半仲以為會sad ending
以為個梓晨都唔妨好野
點知咁突然出現嘅角色會係真愛

樓主寫得好好睇
個結局都完得好靚

多謝你

痴鳩線
完全暴走

樓主寫得好好，雖然劇情好痴線

多謝晒