十年一度嘅英國人口普查嚟喇！各位住喺英國嘅香港人，呢幾個月大家將會收到 ONS (Office for National Statistics，英國統計署) 邀請你填寫人口普查問卷嘅信。D4HK 為各位住喺英國嘅香港人整咗個簡介，等大家知道點樣喺答英國人口普查嘅時候都可以支持香港。
英國人口普查，關我係咪香港人咩事？
ONS 個官網噉講：
The census helps us understand what our society needs now and what it’s likely to need in the future. The information it collects helps plan and fund services in your area. This could include transport, education and healthcare.
https://census.gov.uk/about-the-census/why-should-i-take-part
「人口普查幫我哋理解我哋社會而家需要乜嘢，預測將來需要乜嘢。收集嘅資訊有助規劃、資助你個地區嘅公共服務，例如交通、教育、醫療等等。」
即係話，人口普查嘅結果會用嚟決定英國政府點管理你個社區呀！
英國嘅統計數據一向將香港人歸類為「Chinese」。
但係香港人同中国人嘅身份認同近年越行越開，BNO 計劃之後越來越多香港人住喺英國，你想唔想英國政府當你係同班小粉紅係同一個種族，自以為好nice噉 nihao 前 nihao 後「服務」你？ 
所以，各位英國手足，我哋今年要話俾英國政府知，我哋係香港人，英國嘅公共服務應該分開香港人同中國人處理！
美國嘅香港人舊年就搞咗個 Make Hongkonger Count campaign，叫港人喺美國人口普查嘅種族欄唔好揀 Chinese 而要自己喺 Other Asian 下面填 Hongkonger，大大提升咗香港人呢個族群喺美國嘅地位。今年越嚟越多香港人喺英國，我哋想英國嘅手足都透過英國人口普查都做到相同嘅效果。
幾時人口普查？
2021年英國人口普查名義上嘅日期係3月21號，而普查邀請函由今個月(2021年2月)開始就會陸續寄俾全英國每個住宅地址，好彩嘅家庭仲已經喺聖誕前獲邀幫手測試今年為咗應付武漢肺炎疫情而開發嘅新問卷格式添。收到邀請函之後，你可以揀上網回應定郵遞回應。如果你三月尾都未回應，ONS 就會派人上門家訪。
無論你係用咩身份住喺英國 (BC、EU移民、學生簽證、工作答證、家庭移民、BNO LOTR、BNO visa…)，只要你2021年頭半年個人喺英國，你都有義務答人口普查問卷。人口普查係一定要參與嘅，如果拒絕回應，可能會罰款；但普查部門知道人口普查問題唔少涉及個人私隱，所以個別敏感題目可以揀唔答。
詳情可以睇呢度： https://census.gov.uk
