原來上年已經散Band 由三人變得得返歐陽一個 因為歐陽簽咗中產公司，搞到一路以嚟高調撐反送中嘅發仔同showroom退出
唉 講起新青年理髮廳真係勾起我好多由中學升去大學嘅回憶
七年前佢哋仲未好紅㗎咋 講緊淨係喺街邊busking日日比高登屌抄圖抄歌 我就已經聽緊佢哋嘅歌 就係欣賞佢哋啲歌詞夠本地講日常生活又帶點輕鬆嘅節奏我高中返學真係好大壓力 返學為dse操卷 返屋企又要對住我怪獸老母 日日做past paper做到流淚嗰陣就係聽佢哋啲歌
特別係嗰首《再見我的poly》令我對大學特別有期待令我好想努力好似佢哋咁體驗大學生活 佢哋好多歌都陪伴咗那個就快離開中學雀巢而對未來充滿好奇及迷惘嘅我 直到我入大學仲好記得2014中五嗰陣 佢哋開始紅少少 搞咗好多音樂會 有一次喺廢校搞show 我明明好想好想去但係因為個show係夜晚我媽唔俾去所以冇去 成個暑假後悔咗好耐
早知就呃老母死硬頂撐咁去啦 又記得中學嗰陣曾經幾次喺牛頭角見到發仔，我嗰陣仲係戴老土眼鏡塊面生滿暗瘡嘅自卑學生妹 明明見到佢好興奮 心跳加速但又唔敢搵佢影相 
到我終於去佢哋第一次嘅音樂會係2018大學year 2嗰陣
嗰時佢哋已經叫做事業起步又同Angela yuen合作又出咗幾個碟 見到佢哋有返啲成果會鄧佢哋好開心 因為佢哋終於由三個追夢嘅無名小番薯變到有少少名氣嘅本地文清樂隊 令我覺得讀藝術嘅我都可能好似佢哋咁 只要堅持夢想就會見到希望
依家嘅我已經year4好快就嚟出嚟社會做嘢 經歷咗2019年 好多嘢都變咗 對未來越嚟越迷惘 我個世界好似永遠都停留咗係2019 而我身邊所有人個個都慢慢恢復努力向前邁步 身邊一個二個都計劃緊移 連我世上最愛嘅人都好快會去外國 得我一個原地踏步民冇得離開香港 諗未來真係夠晒煩啦 又要諗畢業之後搵咩工 已經唔敢講夢
我依家就好似返咗去以前啱啱聽佢哋歌嗰陣 就快離開自己嘅雀巢飛去更大嘅環境 對未來充滿好奇及迷惘 好似以前中學咁對住不肯定嘅未來感到徬徨 淨係識得日喊夜喊 不過今次已經冇佢哋嘅陪伴。。 見到佢哋因為咁嘅原因散band 更加失望 歐陽點解你要咁呀
這個世界變了的同時 我也在變。
以前你哋啲歌成日都講 踏出社會之後大家的世界變了 估唔到我而家比以前身同感受 更加明白歌詞背後嘅酸苦
「愛人就係學會放手」
所以 新青年理髮廳 謝謝你 。
在我由中學升上大學成長階段陪伴着我，而我也親眼目擊過你們變紅的過程。你們曾是我人生一段部份的回憶，也曾是我的偶像。
很遺憾不能再去你們的音樂會了，但人生就是這樣，充滿遺憾，所以再見。
我也很努力向所有就快離開我的朋友好好告別，所以再見。這次沒了你們的歌，我會自己努力嘗試邁向第一步。
所以 新青年理髮廳 再見了。
你係黃代表？
