作者：Gear噏
【香港開埠一百八十周年】
1841年1月26日，英國海軍上將查理‧義律派遣英軍登陸香港島水坑口，正式佔領香港建立殖
民地，標誌香港正式開埠。換言之，今日就係香港嘅生日！
香港係我哋嘅祖地(Motherland)，就好似母親咁孕育我哋成長。香港今年已經180歲，比起中共（72歲） 有更深遠嘅歷史，中國永遠都唔係我哋嘅祖國。主流論述話香港歷史由1841年開始，教科書話香港開埠前只係一個貧窮小漁村。事實上，香港開埠前唔係一座荒島，已經有人喺香港努力耕耘，等我哋講下香港嘅史前史啦！
香港位於嶺南沿海地區，初期香港居民都係從附近地區遷入，可分為四大族群：居住喺新界內陸嘅廣府人、客家人；居住喺沿海地區：蜑家人、福佬人。因為新界喺1898年先租借畀英國，一直分開管治，到戰後發展新市鎮，先慢慢融入香港成為一部份。由此推斷，居住喺沿海嘅蜑家人、福佬人等海洋族群先係開埠先驅，喺香港早期發展中擔當重要角色。
海洋族群一直受到廣府族群嘅歧視，被中國社會視為未開化嘅蠻夷，唔能夠喺岸上定居。於是被迫要出海謀生，與外商進行走私貿易。去到明代實施海禁，仲成為咗海盜。農耕社會同海洋社會有好多唔同嘅地方：經濟活動方面，前者穩定地務農，後者危險地航海。性格方面，前者著重儒家倫理，後者熱愛自由奔放；宗教習俗方面，前者祈求穩定，後者祈求幸運。喺價值觀方面，前者節欲克己，後者娛樂至上。前身係海洋族群嘅香港人一早就發展出一套同大陸人與別不同嘅文化。
香港開埠唔完全係英國人嘅功勞，相傳有位叫陳群嘅女士，開埠時為英軍帶路，並介紹呢個地方叫「香港」。”Hong Kong” 亦係粵語蜑家話嘅音譯。如果冇呢班積極同英國人合作嘅海洋族群，香港都未必成功開埠，亦可能唔會有今日嘅香港。
今日係香港一百八十歲生日，呢一日除咗紀念英殖香港嘅誕生，更象徵住香港同中國從歷史上正式分道揚鑣。請緊記香港呢片土地係我哋嘅根，係一個從一百八十年前已經存在嘅家邦。
身為香港人嘅你，喺下面留言同香港講聲生日快樂啦！
