：蘆葦、棋盤、波浪、麵包、鵪鶉、另一塊麵包、涼鞋鞋帶......唉，到底古埃及人寫緊咩？？？
：呢個橢圓形只會包住法老嘅名，而呢位法老，即使你唔熟歷史都會有聽過，佢就係大名鼎鼎嘅圖坦卡門！
：吓？點由呢堆符號砌到圖坦卡門出嚟？你又點知一定係圖坦卡門？古埃及人死哂，依家死無對證，你話乜都得啦！
：施主稍安毋燥，且等我娓娓道來。
：喺中文入面，象形文字以圖畫描繪實物，想講太陽就畫太陽，想講雀仔就畫雀仔。所以大家一見到生動寫實嘅符號，就會以為埃及同中文一樣，都係講乜畫乜。其實班專家一開始破譯羅塞塔石時都係咁諗，結果行咗唔少冤枉路。直到石碑出土23年後，「埃及學之父」商博良（順帶一提，雖然佢對埃及文字研究頗深，但其實佢成世無去過埃及 ）先發現象形文字唔止表意，更會表音。即係話比起象形字，古埃及文字更似中文嘅形聲字。
：咁即係點？中文作為方塊字，好清楚咁睇到一個字入面有聲符同形符，例如「河」係形從「水」、聲從「可」；但係埃及文字咁散收收，應該點拆？
：同中文一樣，埃及象形文字可以係直書或橫書，左邊定右邊開始都得。有啲石碑為咗追求左右對稱，同一行會各自由兩邊寫去中間。
：呢個情況下，文字閱讀順序係以生物符號面向嘅方向為始，即係啲雀仔呀、人頭呀、蛇呀望邊，就由邊開始。以一開始嘅圖坦卡門為例，中間嘅雀仔望去右邊，代表佢係由右上讀至左下。
：喺呢十個符號入面，橙色嗰七個係聲符，藍色嗰三個係形符。對照發音，得出Tutankamnn嘅讀音。
：你呢個係「圖坦卡嗯」喎，唔係門。
：係呀，由於古埃及文字唔會標示母音(aeiou)，所以專家會最後喺啲子音中間加上母音，方便發音。咁就變成Tutankhamun。
：簡單嚟講，即係鳩塞aeiou，順耳就得？
：可以咁講。
：咦？讀嗰陣amn明明喺最尾，但係寫嗰陣佢又喺最前嘅？
：因為amn取自阿蒙神，書寫時為表尊重，會搬去最前。
：咁仲有嗰三個形符又點解？
：第一個係權杖，取自統治者一字；第二係柱，取自太陽神聖地Heliopolis一字；第三係薹草，取自上埃及一字。佢地好似部首咁，補充、區分字義，所以佢全稱會係Tutankhamun, the ruler of Upper Heliopolis。
：既然埃及文字有表音作用，我地其實可以用佢嚟譯寫自己嘅名，不過呢個係後話。
）
