就喺拜登宣誓就任美國總統嘅重要時刻， 2021 年嘅 #StandwithHongKong 全球廣告亦都同時喺美國打響咗頭炮！
趁住新總統就職期間來往華盛頓人流大增，我哋喺主要幹道上掛起咗大型廣告，跟住落嚟仲會喺過千個美國主流媒體網站刊登網絡廣告，務求令香港人呢個民族嘅身份同理念更加入屋。過去一年，美國以至世界各地都出現各種人禍、衝突同紛爭，無疑減退咗各國對香港議題嘅關注。香港人喺下半年除咗面對黨安法嘅威脅，亦迎來第三、第四波疫情，世界各國亦忙於抗疫同準備重振經濟，對自己嘅人民負責。雖然各國嘅政要都有為港人發聲，但係礙於本土局勢佢哋都少咗切入點去落實更多協助香港人嘅政策。而喺我哋進行遊說工作期間，唔少議員都話希望可以聽到多啲當地選民嘅關注以及支持香港人嘅聲音。
其實早喺美國大選前開始，我哋同一眾美國手足就已經密鑼緊鼓開發一個專為喺美國政壇爭取更多實質支持嘅網站 — Call4HK.com。一個民主社會嘅議事廳係會聆聽民眾聲音嘅，而 Call4HK 就簡化咗美國人監察同向國會議員就香港議題表態嘅程序，從而鼓勵更多人聯絡佢哋嘅地方議員，爭取更多對香港人嘅支持。其實網頁由12月頭開始測試至今已經有一千五百人次直接聯絡代表佢地嘅國會議員為香港發聲～
由 2019 年行到今日，熟悉嘅面孔離我哋好似越嚟越遠，有人出走，有人被政治打壓，有人被鎖住喺高牆入面。隨住香港民族逐漸被打壓，唔少人都怕香港人對呢場革命嘅熱誠會就咁冷卻，亦有人可能會覺得光復香港彷彿遙遙無期。
2021 年開始咗唔夠一個月已經感覺到今年會係多事之年，惟團隊真係冇閒情發脾氣或者撩事鬥非，因為我哋未忘初衷、冇忘記過舊年眾籌時對香港人作出嘅承諾。所以喺過去幾個月團隊一直埋首籌備新一輪全球廣告同埋國際遊說工作，希望全世界可以喺 2020 年嘅動盪後再次將目光投放喺香港人身上。
踏入新一年，正當全世界都期盼喺 2021 年迎來新一頁嘅時候，相信香港人亦想提醒各國政府及民眾，我哋
仍！未！放！棄！ 對！抗！極！權！
我哋希望呢次活動能夠令國際社會對香港人嘅關注度繼續升溫，提醒世界喺抗疫同時都唔好忘記中共極權正不斷作出人神共憤嘅惡行。無論一路以嚟嘅路有咁黑暗，前路有幾咁艱鉅，香港人都會一齊並肩行落去！
繼今次喺美國首先打響頭炮之後，我哋嘅行動將會喺全球更多唔同地方出現，並且會一路同大家報告，麻煩大家一齊幫手推 po 推 tweet，將香港人嘅聲音推得更廣更遠！
“Don’t Let Hong Kong Fall”
Stand with US. Call4HK today.
香 港 人 加 油！💪
香 港 人 反 抗！🖐☝️
TL；DR： 重光團隊同一眾美國手足攜手喺美國總統宣誓當日正式發動 2021 全球廣告攻勢為香港議題保溫。有美國嘅親朋好友喺就叫佢地快啲上CALL4HK.COM為香港出一分力！記得繼續支持美國嘅手足同密切關注我哋下一輪攻勢。
其他社交媒體專頁同網站
Youtube:
youtube.com/standwithhk
Twitter:
twitter.com/Stand_with_HK
Facebook:
facebook.com/standwithhk
IG:
instagram.com/standwithhk_
————————
重光團隊 SWHK Channel 🏴:
https://t.me/FFFSWHK20
:
