先黎結論，根本全部女人都係腐女，從來BL都係女性產物，同同性戀(Gay)一啲關係都冇。
BL即係Boys' Love，顧名思義就係男男戀愛故事，由日本女性作家創作的男男戀愛漫畫開始，發展成依家BL小說、BL劇、BL電影……各式各樣嘅BL作品。雖然係講男男戀，但係同男人根本一啲關係都冇，BL原本就由女性作家創作，主要係女性向市場，一班女性讀者，而我哋會叫呢班鍾意BL嘅女人叫做「腐女」。至於點解會話所有女人都係腐女，只能夠講你太唔了解BL嘅魅力喇。
女人從來都係戀愛動物，對愛情嘅憧憬比天更高，少女漫畫中轟轟烈烈嘅愛情正好填補她們心入面嘅空虛。她們看完一本又一本，最後發覺根本唔能夠成為漫畫中嘅女主角，去爭奪男主角嘅寵愛，於是BL就應運而生。BL嘅設定就係兩個性格截然不同嘅男主角，經過一些共同經歷、波折，最後認定對方相戀嘅故事。BL男主角一定要靚仔，唔靚仔唔收貨，其次就係性格鮮明，例如腹黑攻傲嬌受，忠犬攻女王受等等。女讀者女觀眾不但可以同時食哂兩位男主同埋人設，唔駛再嫉妒少女漫畫入面啲女主角，最重要嘅兩個美男子相愛真係好好睇，他們嘅愛情就係女人夢寐以求嘅野，但係又因為她們唔係男人，BL入面嘅愛情故事變到好似蓮花一樣，可遠觀而不可褻玩，女性不得參與其中，不過又可以感受當中的愛。簡單黎講，BL根本就係腐女們FF幻想世界，男男戀由女人虛構出來同時又為之而瘋狂。
再講下BL同Gay嘅根本分別在於BL係女性向而Gay無庸置疑係男性向(又或者叫基佬向)。頭先講咗BL就係腐女幻想世界，BL入面嘅男主角沒錯就係女人的幻想對象，例如一位主角要Man爆雄性基因噴發，另一位主角則要細心温柔體貼，全部由女性角度出發；至於Gay片Gay漫一言不發就翻雲覆雨，主要為了滿足該族群嘅生理需要，對女性完全沒有幫助因為她們沒有以上需要，她們不會知道男性交合嘅爽快。BL攻受又同Gay Top(1) and bottom(0)有少少分別，攻受概念喺清水番入面只係代表一方主動另一方被動而已，不一定有交合過程。
不過以上雙方確實有共通點，就係一定要靚仔，靚仔通吃，兩邊市場俾佢地玩哂。至於喺商業世界入面，廠商當然想食哂兩邊市場，模糊兩邊嘅分別，創作一些同時符合腐女、基佬口味嘅作品，甚至大眾化口味嘅BL男男戀作品。有些腐女都會鍾意埋Gay作品，大口大口地吃肉。不過重申一次，BL同Gay係好大分別，希望大家唔好將佢地混淆。
既然講咗咁多腐女就索性講埋腐男，腐男就係鍾意BL嘅男人。你可能會問：又話BL唔關男人事，腐男係咩黎㗎，其實佢地係咪即係Gay嘅啫？問呢啲問題其實就等同問：有啲男仔點解會玩Barbie；有啲女仔點解會玩高達；有啲男仔點解會留長頭髮，係一樣咁白痴。BL都發展咗好幾十年，有男性鍾意睇都好正常吖，都唔知有乜野問題，男人唔可以窺探腐女嘅內心世界咩。BL乃腐男腐女嘅個人興趣而已，實屬與其性取向完全沒有關係，腐女唔駛講，佢食一個唔夠要食哂兩個男人，你都仲要話佢同性戀唔係吖化；腐男有啲異性戀有啲同性戀，你又唔可以一概而論喎。
香港人唔好再故步自封，嘗試接受新文化(其實已經唔係好新)。宜家BL風暴已經直捲全球，亞洲各國都發展BL產業如火如荼，日本、台灣、泰國都有自己嘅BL劇BL電影，大陸都一早出咗不過宜家仲Ban緊BL，連韓國都出緊，仲爭香港完全未出，爭人地幾條街呀陰公。(宜家V電視台翻拍嗰套係攪笑BL同真正腐女想要嘅BL其實有一段距離)
BL唔係Gay而係腐女FF，所有女人一律跌入咗BL坑就出唔翻黎。一個靚仔吸引，兩個靚仔更吸引，他們相愛最吸引，一齊享受BL嘅樂趣啦！