呢幾日政府不斷用一個大家都好陌生嘅詞語：「小區」，係咁話要喺深水埗同油尖旺做「小區檢測」。喺此前一年，政府都仲係講緊「社區檢測」。
大家隱約都感覺到【小區】係一個大陸用語，但其實並唔係換個講法咁簡單，因為佢同我哋用開嘅【社區】並唔係相等嘅字詞。
小區直譯自俄文микрорайо́н，микро解細小，райо́н就解地區。佢係特指蘇聯特別設計嘅一種住宅規劃區，有一定施工規則要遵守，例如唔可以超過80公頃。基本上共產主義國家都會沿用呢種概念去設計城市，大陸都唔例外。喺小區入邊有自己嘅公共設施同學校，相對上獨立運作，唔同小區之間嘅來往唔會咁頻繁，等交通負荷唔洗咁重，又容易實行共產式嘅集體管治。
但深水埗、油尖旺呢啲人口超過10萬嘅地區用「小區」嚟形容，香港人聽到就真係諗爆頭。因為香港尤其係九龍西發展咗過百年嘅歷史，地理上來往兩區行路都只係15分鐘，人又會跨區返工、返學，無論人口嘅密集，抑或人群流通嘅程度根本唔係蘇聯式嘅「小區」可以比擬。
唔好以為「小區」同「社區」只係一字之差，稱呼有別；呢種指鹿為馬嘅行徑，更反映抗疫觀念上正走上歪路。
香港一開始係用傳染病學同社會學嘅科學概念，叫「社區檢測」係有啲根據。因為現代人尤其城市人嘅社交接觸唔可以粗疏咁地理關係分類，尤其交通咁方便，一棟大廈嘅人好容易已經一日去勻十八區。現代嘅「社區」其實係以血緣、鄰里、朋友關係同文化構成嘅群體，所以香港一直都會搵「群組」去做檢測，例如有跳舞群組、打邊爐家族等，都有助搵出源頭，阻截病源同埋搵出傳變關係。
但而家香港有現代方法唔用，盲從大陸嗰套，當社區係小區咁以地域劃分；然而油尖旺同深水埗正正就係全世界人口最密集同流動嘅地區，根本唔係捉一兩棟大廈嘅人檢測晒、隔離晒就可以阻截。反而喺呢啲會跨區返工，但同鄰居老死不相往來嘅地區，製造不必要嘅恐慌。
一味跟大陸口風叫「小區」，唔單止係語言上不知所云，奇奇怪怪，更加會令抗疫嘅方向一榻糊塗，離晒大譜。市民要自救，就唔好亂跟呢啲歪風，知多啲概念，喺社區上講返多啲人話。
