榮格八維理論簡介
前言
「只有瞭解一個人是透過哪種感覺器官來認識世界的，我們才能正確地認識這個人，因為這影響著他與外部世界的關係。」
≪理解人性≫ 阿德勒 節錄
正確咁理解自己，可以減少因為對自己嘅誤解產生出嚟嘅問題，例如人際關係、工作、學業等等。呢個簡介係基於筆者對於唔同書籍同其他人格愛好者嘅文章嘅理解綜合而成，目的係比讀者對八維人格有個好淺嘅理解，對人格學引起興趣，亦可以初步推敲自己嘅人格類型。
若有修正之處歡迎提出。
四種功能
「
感覺告訴你某些東西存在；
思考告訴你它是甚麼；
情感告訴你是否同意它；
直覺告訴你它何時來，何時離開。」
≪人及其象徵：榮格思想精華≫ 榮格 節錄
外傾與內傾
感覺、思考、情感、直覺，四種功能配合
外傾或者
內傾嘅傾向，進一步分為八種主導功能。
簡單而言，外傾嘅人追求融入環境，改變環境；內傾嘅人獨立於環境，避免被環境同化。
其實我地每個人都有內傾同外傾嘅一面，不過今篇文章主要討論以主導功能簡單劃分八種人格。
八種功能
內傾感覺：由客觀知覺引起主觀知覺，例如人在異鄉食到家鄉菜（味覺；客觀知覺）而引起鄉愁（主觀知覺）；喺教堂聽到聖詩（聽覺；客靚知覺）而引起感動嘅情緒（主觀知覺）。以
內傾感覺為主導嘅人，追求因由客觀環境而激發起嘅主觀知覺，而佢所知覺到嘅野係同客觀知覺唔同，亦唔能夠從客體身上搵到。
內傾思考：根據客觀環境某個範圍，建構內在概念世界。以
內傾思考為主導嘅人，強於系統性嘅邏輯思維，善於追溯根源同推理，甚至創立新嘅理論同洞見。
內傾直覺：以個體出發，直接提取源於先天遺傳無意識嘅內容同埋原型意象。以
內傾直覺為主導嘅人，可以睇到一啲外在客體由佢本人內部發出嘅「圖畫」，「圖畫」並唔係指一種視覺上嘅圖畫，而係一種意象。
內傾情感：感受情感價值觀，主觀地判斷客體嘅好與壞，例如個人主觀好惡、個人道德價值觀、意象上嘅真善美等等。以
內傾情感為主導嘅人根據自己嘅情感感受判斷客體嘅好與壞，最後能夠根據自己嘅判斷確立一套屬於自己嘅信念。
外傾感覺：個體對客體嘅專心致志，甚至融入客體嘅感官刺激，進入當下。以
外傾感覺為主導嘅人沉浸喺環境客體嘅感官體驗，例如球員融入球場環境，專注於比賽。
外傾思考：融入客體概念同埋規則。以
外傾思考為主導嘅人熱衷於用接受嘅客體概念同規則，去規範與控制自己同別人嘅行為，例如學校嘅訓導致力用校規規範學生。
外傾直覺：融入客體嘅可能性。以
外傾直覺為主導嘅人，將自己沉浸喺環境無限嘅可能性入面，佢地難以滿足於現狀，總係積極去追求新嘅可能性。
外傾情感：融入客體嘅情感價值觀。以
外傾情感為主導嘅人，以別人嘅好惡或者普遍大眾嘅價值標準嚟判斷同評價一個人嘅好與壞，例如一個以外傾情感為主導嘅女性，可能會傾向搵一個社會大眾認為好嘅男性（有穩定高收入職業、感熟穩重等等），多於搵一個自己真心喜愛嘅男性。
後語
以上只係好簡單地講下八種功能同埋以佢地為主導功能嘅人係點，不過人其實除咗主導功能，仲會使用其他功能，例如一個內傾情感為主導嘅人，同樣會使用外傾思考功能嚟影響呢個世界。唔同嘅人有唔同嘅功能定位同排列，考慮埋呢啲定位同排列，就可以進一步將唔同人分為十六種人格。
延伸閱讀
≪榮格心理治療≫、≪心理類型≫ 榮格
≪類型與原型≫ 約翰畢比
因為日頭返工，最多會夜晚睇同覆