【繼續Ｊ？】內地加強反壟斷監管後，ATMJ沉寂咗一排，其中京東(9618)最新有消息，俾大家有機會J返，今次消息同分拆京東物流上市有關。
《IFR》引述知情人士指，京東物流已委任美國銀行同高盛，負責籌備今年香港IPO事宜，預計集資約40億美元(折合約312億港元)，最快第二至第三季招股。
雖然京東物流規模上，同京東早前分拆嘅京東健康(6618)差咁啲，但京東物流估值都有高達400億美元(折合約3120億港元)。
京東健康雖然股價由高位回落唔少，市值目前仍然超過4600億。
市值相對無咁重磅，但一樣吸引唔少星級投資者。喺2018年嘅25億美元融資當中，高瓴資本、紅杉資本、騰訊(0700)、中國人壽(2628)以及新世界發展行政總裁鄭志剛名下嘅K11 Investment亦有參與。
截至2020年9月底，京東物流喺全國運營嘅倉庫，超過800個，包含雲倉面積在內，管理嘅倉儲總面積約2000萬平方米。
今次分拆唔知可唔可以為京東股價，注入返啲動力？定資金會好似之前分拆京東健康咁，要細唔要大呢？
