原因只有一個，就係佢創出比連界王親傳嘅界王拳同元氣彈都更強嘅氣圓斬，呢招嘅奧妙之處就係佢完全無視戰鬥力差距，遇神殺神遇佛殺佛。
首戰使用就已經令立巴見紅，唔好忘記前面成班契弟搏埋老命都打唔傷佢。一招係自爆，無傷。另一招係殺敵一千自損八百嘅氣功炮，都係無傷。唯獨呢招氣圓斬係異類中嘅異類，其一係佢消耗低，用完之後連戰鬥力都唔會降，無限當時用完係連氣都無喘一下。如果當時比達唔叫立巴避開，連個頭片埋落嚟都唔出奇。
第二次用就係打比達大猩猩嗰時，眾所鳩知當時比達一早已經提防呢招，喺立巴一戰已經睇出呢招真偽，就連高傲嘅撒亞人王子都知呢招係唔可以正面接，有印象都知當時比達同悟空打係見招拆招，但唯獨氣圓斬，佢係選擇迴避。點解？正正就係呢招係一撃必殺。試想堂堂一個撒亞人王子比個地球人片死，落到黃泉可以點同啲同胞交代？比塊面片咗條疤出嚟嘅立巴笑成世都似。
第三次就係打菲利嗰時用。身為一個地球人，只有二萬戰鬥力，竟然一招片鳩斷宇宙大王條尾。當時菲利已經變咗一次身，當佢戰鬥力只係翻一倍，都至少有一百零六萬。呢招直接無視當中五十三倍嘅差距。而片中一下之後再緊接住連續四下嘅氣圓斬，先唔講呢下再次突顯呢招消耗低，只講菲利點應對。當時嘅菲利都心知不妙，慌慌張張避哂四招，連鳥山明當時都不忘幫菲利加返幾滴汗，可想而知無限係可以單憑呢招問鼎宇宙最強。要知道當時悟空所有招式都對菲利造唔成傷害，連集合咗幾個星球力量而成嘅元氣彈亦是。
第四次用就係菲利抄鳩無限用氣圓斬打悟空。結果就係菲利自己片到自己無咗下半身。先唔講堂堂宇宙最強有咁多招唔用，就係要用氣圓斬。淨係結果論就知當時無限如果打中咗，悟空真係可以直接喺部治療機到摺埋收皮，打都唔使打。
講到呢到，你係作者你都知根本唔可以正正常常處理呢個角色，唯有出下策，令佢神隱。講到底都係得兩個做法。一，出一班對斬擊免疫嘅敵人，斯路布歐等。二，畀一堆籍口佢唔去打，話佢淆底唔打人造人又得，話佢畀人偷襲畀人石化又得，得咗。不過跟開都知，以無限多年嘅戰鬥經驗，呢啲籍口根本唔存在。所以我深信十八號根本一早已經睇得出佢係潛力股。所以成班瞓哂喺到嘅契弟無一個係佢睇得上眼，唯獨就係企到最後嘅無限先係如意郎君。
所以話，無限根本就係最大贏家。
