[純愛] 只想和你愛一次

外傳. 被遺忘的故事 (十一)

在餐廳，由於剛趕完功課，所以心情比較輕鬆。

「多謝你幫左我咁多呀，thank you!」我舉起酒杯敬了Sam一杯。

Sam:「唔駛客氣啦，我都痴食痴住左幾日架，所以衣鋪係 - 打和~」

「咁你又好似有D道理~ 係喎，都唔記得問你點解衣個星期咁得閒嘅?又唔係sem break。」

Sam:「無呀，岩岩攪掂左個test同assignment，見衣個星期D堂唔太重要咪走晒佢抖下囉~」

「嘩，真係羨慕… 我抖一日後又要忙第二份喇，救命!」

Sam:「鬼叫你讀D咁藝術嘅科咩~」

「車，唔講衣D喇~」

Sam:「係喎，衣幾日好似真係無見你同Elven溝通過，無事嘛?」

「我地都慣左係咁lu，有時我忙，有時佢忙，所以有時都唔覺自己有男朋友。」酒精作用下，我開始把平常不會主動說的話說了出來。

Sam:「咁long D加上大家都咁忙係有D難攪嘅… 好彩你返得去都算密，唔係感情真係實會變淡…」

「但我無可能keep住永遠一年都返去三次咁多架… 而且之後呢? 就算畢左業其實我都唔想返香港，呼吸慣左自由的空氣，返去就好似返返鐵籠咁… 」

Sam:「咁你有無同Elven傾過? 衣個問題都真係要溝通解決喎…」

「未呀，未有合適機會... 或者等佢黎英國果陣啦…」

Sam:「嗯… 加油呀! 只要大家仲鍾意大家，實有問題解決嘅~」

「但係我好似已經慢慢習慣左佢嘅不存在… 好似衣幾日咁忙咁，以前我訓前會掛住佢想聽下佢把聲，但衣家已經好少會咁了…」

Sam:「或者環境逼住你進化要independent D啦… 咁可能令你舒服D。」

「但係咁一齊仲有咩意思呢?」

Sam:「所以你地真係要傾下，要有個共同目標同盼望大家先有繼續努力的動力，唔係好似你衣家咁本身對前景已經咁迷茫，就更加唔知要為咩而去堅持喇…」

「或者你都講得岩，有D野真係要解決左先有得繼續落去…」

Sam:「搵個機會同佢好好傾下啦。」

第二天，Sam便離開找他的朋友了。而我，亦襯著偷得浮生半日閒，鼓起勇氣打了個電話給你，可惜響了一分鐘也沒人接聽。

「打個比我?」一小時候你SMS我。

「係呀，好似好耐無搵你傾過計掛住你呀…」

「Sorry呀，岩岩同同學傾完project，衣家又要趕返hall幫手攪個joint hall function… 我遲D打比你?」

「好呀，咁你先忙啦。」

不過你打回給我，已經是兩天後的事，而我亦開始了和另一份功課的搏鬥，所以只能簡單講了幾句便收了線，之後我又把和你商量這件事放在一邊。

Sam在回去後，卻開始每天也會message我。他會告訴我他那天發生的事，又會問我功課進度，當我訴苦的時候他會支持我，講笑話氹我笑，不知不覺我們慢慢習慣了每天都有和對方message來往，互相支持打氣。

如是者過了數星期，這天我如常在做另一個model，又收到Sam的message。

Sam:「Studio忙緊?」

「係呀…慘 > <」

Sam:「忙成點呀你? 仲差幾多?」

「Disaster… 可能又要捱兩晚通頂喇…」

Sam:「又捱? 你頂唔頂得順呀?」

「頂唔順都要頂架啦…」

Sam:「咁如果有幫手會唔會好D?」

「???」

Sam:「你開一開門啦~」

我帶著疑惑開了門，然後看見Sam一手拿著電話，一手拿著兩袋外賣。

Sam: 「Surprise~」

「點解你會黎嘅?」我真的帶著surprise問道。

Sam:「知你實忙緊，又會唔記得食飯，咪索性買比你食順便支持下你囉~」

「多謝… 你又唔駛上堂?」

Sam:「要呀，明天走一日堂啫~」

「又黎探開朋友?」

Sam:「係呀，你囉~」

「傻架你…」我不知怎樣回應。

Sam:「快D食左野先啦，之後再幫你手~」

那時已經是晚上九時多，於是我便放下手上工作和他先吃晚餐。那時我還沒有多想，不過心裏確實有點溫暖和感動。

「同Elven傾左未呀?」吃到半路，Sam突然問道。

「未呀，嘗試過不過大家未夾到時間，之後又忙就放埋左一邊喇。」

Sam:「嗯… 真係咁忙咩?」

「有D野成為左習慣就係咁架喇…又或者可能我自己都搵緊藉口去逃避啦。」

Sam:「拖下拖下就好可能無架喇喎…」

「或者分手可能都係一個出路呢，長痛不如短痛…」

Sam:「咁嚴重? 不過衣D問題都係要你自己慢慢諗清楚啦… 雖然你唔驚無人要~ 但最緊要唔好比自己後悔。」

「我都係亂up下啫… 食完未呀? 食完開工喇喎!」

Sam:「食完喇，let’s go!」

那晚我們做到零晨三點多後由於太累所以還是決定要回家休息一會。也不知是不是天意，回家途中在一個比較陰暗寂靜的後街上，本身唯一的街燈在我們行行下的時候突然熄滅了，突如其來的黑暗讓我嚇了一嚇，潛意式捉住了旁邊的Sam。

「唔駛驚，你捉實我我地慢慢行過去，好快有返燈架喇。」他一隻手搭著我捉著他的手，另一隻手搭去我另一邊膊頭，半擁抱式和我慢慢走過那段路。因為害怕，所以我沒想甚麼就和他這樣走著。 慢慢走到另一條街的時候，我們終於重見光明，不過當我想縮手的時候，Sam卻把我捉實，然後突然把我抱進他懷內，那刻我想掙扎但卻被他抱得死死的，完全反抗不了。

「Ada，對唔住，我真係唔想再忍喇…其實由中學開始我已經鍾意你…」

那時這句話震憾了我，因為我確實從沒向這方面想過，亦讓我停止了掙扎。

「不過你一直同Elven一齊，而Elven又係我老友，我一直只可以將衣份感情收係心底… 但近排我見你捱得咁辛苦，而佢又好似對你不聞不問咁，令我開始覺得你值得一個更好的人去愛你，而我覺得果個人可以係我…衣幾個星期我每日都好掛住你…」

我沒想過那刻我竟然有心動的感覺，或者在我最需要人support的時候，他的出現不知不覺間讓他慢慢走進我的心入面留有了點點的位置，結果我就這樣靜靜地讓他抱著… 直至過了一段時間，我意識到不能再這樣，才終於把他推開了。

「對唔住…多謝你鍾意左我咁耐，但我同你無可能架… 就算我同Elven最後分手，我都無可能同你一齊咁傷害佢…」

「我明白… 我都係一時忍唔住，我地可唔可以當無事發生過繼續做返好朋友?」那時Sam的表情是帶著點失望和後悔。

「淨係做好朋友當然無問題啦…」我不想亦沒有勇氣失去這位好朋友。

經過這表白後，我沒有再讓他和我一起睡在床上，所以這晚他只是睡回地上，然後第二天便離開了。只是有些感情發生了，就很難可以就咁當粉筆字抹走佢…

外傳. 被遺忘的故事 (終)

知道了Sam對我的感情，其實我很忐忑，然後在和你一次簡短閒談中，我忍不住問了你一個問題。

「如果有第二個男仔想追我你會點?」

而你的答案讓我感到意外。

「我咁好， 你點會捨得唔要我~ 我信你唔會鍾意第二個架」

「咁如果我同你講我對佢都有好感呢?」我再問你。

「傻妹， 有我相信你都會為左我懸崖勒馬將佢扼殺於無形嘅。」

若果我是以講笑的性質問你，我想你的答案會令我感到高興。可惜當這答案出現在我本身已經感到迷茫的時候，它只是讓我的心更不好過，這不是我想聽到的答案…

一方面我感激你對我完全的信任，只是我辜負了它… 但另一方面我卻有個疑問，到底你仲有幾緊張我? 你就真的完全沒想過亦不害怕有失去我的一天? 是不是我對你只是可有可無的存在?
亦因為這樣你連基本對我的關心也漸漸欠奉? 那時我突然明白有時給了對方過份的安全感，原來並不一定是件好事。

當然在分手後見到你傷心難過的樣子時，我意識到自己這想法是有點偏頗和武斷。但當時的我越想確實越覺得大家根本走不下去，繼續勉強維持這關係亦沒有意思，於是和你分手的念頭亦變得越來越強烈。

而在這段時間，Sam彷彿真的當那天的事沒發生過般照常每天會message我，起初我有嘗試避忌，不過有時在辛苦寂寞的日子，他的message總能讓我感到溫暖，漸漸我也沒有了抵抗力開始多回和他說話。

「上次都講清楚左咯，唔會有咩誤會嘅…」我這樣說服了自己。

現在回想，那時確實沒有好好控制自己，結果最後對你造成了這麼大的傷害…若果時間黎夠重來，我應該能把這件事處理得更好，把對你的傷害減至最低…


“不過再後悔已經沒用，始終時間不能倒流，怪只能怪自己愛得太遲… 之後我地經歷左最開心的旅行，其實果次都係我地第一次一齊去旅行，果十日我真係好開心，有時我又會諗，如果無左衣個旅行反差無咁大，我會唔會反而無咁傷心難過? 我覺得都幾有可能… 不過就算真係會，我都會選擇寧願有衣十日難忘的回憶… 又，我又諗如當果日我無睇到Sam比你的message，我會唔會永遠都唔知衣件事? 不過答案係點我諗都唔重要了…”

其實你臨黎英國前幾日，我再三猶豫後係想同你講我決定左分手，一方面我覺得既然決定左，應該要比你知道你先再決定仲黎唔黎英國，如果你決定唔黎，我絕對理解，但若果你仍選擇黎，我會盡最大努力同你開開心心過埋果十日然後留個最美好的回憶比大家。另一方面，我亦害怕見到你後自己會心軟，所以還是見面之前說比較好… 不過當時你同我講第二日要考兩科，我只好打消這念頭，以免影響你考試成績。既然命運這樣安排，那就讓你在完全不知情下開開心心和我過那十日，然後在離開前才告訴你吧。只是我沒想過你會提前問起又堅持要我說出來，更沒想過會以那方式讓你知道了Sam的事…

不過同你係英國果十日，開心的程度確實遠遠超出了我預期，比你寵愛的感覺真係好幸福… 所有被淡忘的感覺再一次湧現，如果我無離開香港或者你都係英國，我深信我地真係可以永遠係埋一齊… 可惜我知道衣個係我地永遠解決不了的鴻溝… 緃使一次又一次我差點說出收回分手的決定，但最後我還是沒有說出口…

回到香港，我們不再每天24小時見住大家，這亦讓我能慢慢冷靜下來重新審視這件事。你對我的愛，我再沒有懷疑，我亦深切感受到你有多想留住我繼續同我一齊，但每當我諗起之後我還是會一個人在英國，然後我還是會回到以前的經歷，我就明白就算過了這一次，總有一天我們還昰會分開… 理智告訴我不能心軟。然後慢慢你的努力變成了我的壓力，你的寵愛變成了我的內疚，我知道我已經不可能給回你對等的感情，這亦代表我們不可能再走下去… 只是我捨不得亦說不出對你狠心的說話，所以我只能讓你主動說出來。 接著，我漸漸疏遠你，又會和Sam出去，希望你能主動放棄我，而最後我成功了…不過雖然這是我一早的目的，但在聽到你主動提出分手那一刻，我還是能感受到自己的心臟承被重擊了一下，我知道自己失去了一些很重要很重要的東西… 那晚一方面我有種如釋重負的感覺，但另一方我亦真的完全壓抑不了自己的淚水，喊了一整個晚上…

第二天一早你就message我跟我說sorry，其實那時我已經知自己唔會同返你一齊，但一方面我好驚直接拒絕你會讓你更傷心，所以我決定讓你留有少少的希望，而另一方面是我的自私，我心底裏還是希望可以感受耐一點你對我的好，延長大家之間的connection… 所以我決定直至我走那天才告訴你這決定，那我便能感受你的愛久一點，而當時間到了我們便只有被逼接受這選擇，沒法再有其他可能。

不過讓我始料不及的是，在和你分手後我和Sam的感情也火速升溫… 也許是因為沒了最大的心理包袱，也許是因為我潛意識希望能快點忘記你放低你，也許是我天生渴求被愛… 和你分手後一個月左右，在我離開香港回英國前數天，一次晚飯後他送我回家，他又突然抱著我，只是這次我再沒有推開他…

對唔住，係我呃左你，因為我唔想令你更傷心難過，我亦好嬲自己講過唔會同佢一齊但做唔到，明明口裏說仍愛你但卻對你做了這樣過份的傷害…


“親身經歷過失戀，我先明果陣我有傷害得你幾深，所以對你我真係無半點嬲或者恨意，相反，因為衣個經歷我先知你對我有幾重要… 希望好快你都會好似我果陣搵返你咁搵返我啦，我相信經過今次的經歷到時我地會成為更好的一對! 所以你要快D返黎呀~

愛你的Elven”

可惜，最後我都沒有回頭…


從回憶回到現實，Ada很有耐性把Elven 600封信逐一看完，然後她又走到電腦前把Elven的Xanga重新下載並閱讀了一篇，彷彿自己就像回到Elven身邊，重新陪他渡過了這600日一樣…. 她能感受到Elven當時的痛苦和絕望，甚至覺得自己差點親手毀了Elven這個人… 幸好最後有一個女仔Rachel的出現，拯救了他。

(岩岩login你xanga的時候，估唔到就算過左咁耐我仍不需要任何思考便能打出你的password… 或者有些東西其實是一直存在，只係視乎你想不想搵佢出黎…)

(到底你同Rachel最後係點? 點解你咁傻要自殺呀…)

留有了很多疑問，Ada抹掉了臉上的淚痕，走到書桌前拿出了紙和筆，然後開始了書寫。

“親愛的Elven,

開始落筆寫這封信時，我突然係度諗，到底我地有幾多年無聯絡呢? 數數下都好似有8年以上? 原來我對你都真係幾衰… 不過無諗過當再同你有返connection嘅時候，你竟然一次過比左咁多surprise我… 我更加無諗過以後就算想同你再connect，都已經唔會再有機會… 點解你要咁傻呀? 你以前唔係話人死左就乜希望都無，所以你一定唔會自殺架咩?你今次所受嘅打擊真係令你絕望到咁? 定係因為我令你改變左你的價值觀同人生態度? 我唔希望係前者，但亦唔希望係後者…

Judy將你的信比晒我喇，如果唔係發生左衣件事，或者我衣世都唔會知你真係傻到咁… 好多謝你為我所做嘅一切，亦都好抱歉我對你所做嘅一切… 我覺得自己好幸運，可以有一個咁愛自己的人曾經係自己生命出現，睇完第一封信，回顧返同你所有嘅點點滴滴，真係勾起返我好多的回憶… 戀愛會結束，經歷會留低，我好想同你講，直到今日我都從無後悔過比黃天佑成為我生命中第一個男人，亦都好感激係我最重要嘅成長時期有你一直係我身邊陪我成長，沒有你就沒有今日的我， 所以你衣個身份同位置係永遠無人可以取代… 而我亦都好想話比你知係同你分手後，我其實無你想像中過得咁輕鬆，就算同你只係係英國一齊短短的10日，但每次經過同你行過的地方，甚至只係自己間屋入面，我都會諗起你… 有時和朋友一些的對話或者一些生活的細節，我都會諗起你… 初初同Sam 一齊拖手、接吻、甚至… 我都會諗起你， 因為身體告訴我那種熟悉的感覺不同了… 正如Stephy的歌

”愛過太深 原來身體會疑問” …

直至過了差不多一年，我才完全習慣了和我一起的那個人不再是你… 這個秘密，我一直沒告訴過任何人，現在告訴你，可以讓你釋懷一點嗎?

看著那600封信，彷彿親身陪你經歷了那600天一樣，感受著你當時所受的傷痛和絕望，我的心也跟著一起痛起來，因為我知道我親手傷害了一個很愛我很愛我的人，而當他獨自承受傷痛的時候，我卻在另一個人懷內被愛著… 雖然我仍然覺得當日分手的決定是無可避免，但若果這世界真的有平行時空，我好希望可以有另一個時空，在那裏我並沒有去英國，然後就這樣和你一直在一起，好希望係果度嘅鄧詠恩可以全心全意咁一直愛你，彌補著這個時空她對你的所有虧欠…

多謝你在我生命中出現和為我所做的一切，再見喇我的初戀…

同樣愛你的Ada”

寫完後，Ada拿出了一個打火機想把這封信燒掉給Elven。可時就在火炎就快碰到信紙的時候，她突然熄掉了打火機然後伏在桌上哭了很久很久….















(或者，我應該返香港一趟去見你最後一面，然後係你墳前親自讀衣封信比你聽…)

好好睇
G持

Any chance to give an update on rachel?

多謝支持

會有呀 不過構思中 衣個角色有d難拿捏 所以短期內都未必有新文了 同埋諗緊有無機會寫到個第二部

外傳. Rachel的自白(一)

「表妹，明天得唔得閒呀? 係日本買左你最鍾意嘅芝士蛋糕比你呀~」剛下機的Rachel在回家途中whatsapp了Annie。

Annie:「Yeah~ 多謝! 渡完蜜月喇? 好唔好玩呀? 你就開心啦，又歐洲又日本，玩足三星期先返黎~」

Rachel:「Ok la~ 岩岩落機就搵你喇 ，你睇你幾有面呀~」

Annie:「咁你明天方唔方便過黎我同Jacky度? 咁岩我地都有D野想比你… 」

Rachel:「都可以呀 ，你地一齊住後我都未去過你地新居~ 咩黎架?」

Annie:「嗯… 明天你就知架喇… 你會一個上黎定同埋Daniel?」

Rachel:「得我一個咋，佢明天就要返工喇…」

Annie:「哦好，咁明天見啦~」


第二天

“叮噹”

「Hi 朱太~ 隨便入黎坐啦」Annie看見Rachel一臉高興。

Rachel:「打擾晒喇~ 個蛋糕你快D放入雪櫃先啦。」

Annie:「多謝表姐~」

Rachel:「你衣度都幾靚喎，廳又夠大，幾好幾好~」

Annie:「好彩咋，果陣咁岩有衣個靚盤放租，我同Jacky一睇就即刻扑搥了~」

Rachel:「証明你地同衣度有緣囉~ 係喎，Jacky呢?」

「佢有D野係房忙緊… 佢近排心情有D差」Annie的臉色突然變得有點暗淡。

「哦… 無野嘛?」Rachel察覺到Annie神色有異。

Annie:「你等我一陣，我同佢講聲睇下佢攪成點先…」

Rachel:「好呀…」

過了一會，Annie和Jacky一齊從房裏走了出來，Jacky手中拿著一本類似書冊的物體。

察覺到Jacky臉上的凝重，Rachel心裏有一種不好的預感。

沉默了一會，Jacky深呼吸了一大啖然後說道:「Rachel，Elven死左喇…」

「下?」

「…Elven死左喇…」Jacky痛苦地重覆了一次。

「…你講笑咋? 」不敢相信自己的耳朵，Rachel的腦袋根本不能想像自己聽到的事情。

Jacky:「… 我唔係講笑， 係你結婚第二日佢自殺死左…」

Rachel:「自殺? 你意思係因為我結婚所以佢自殺?佢點自殺架?」

Jacky:「無人知佢點解自殺… 但從時間上黎睇，係有衣個可能… 果日有人見到佢係尖咀海傍跳海...」

Rachel:「點會咁架… 我同佢都無聯絡好耐啦…」

Jacky:「佢有幾鍾意你，我地衣班close friend個個都心知肚明… 衣幾年其實佢成日都總係帶住種鬱鬱寡歡的感覺，一直都好後悔最後自己同你攪成咁…」

Rachel:「係我衰...一直對佢其實我都存在住一份愧疚感，但我真係無諗過會變成咁...」

Jacky:「係咪真係因為你無人知，而且都無人會估到，所以唔好自責… 我地唔講你聽住都係廢事破壞你去渡蜜月的心情，不過之前執拾遺物果陣伯母係佢床下底搵到衣本野，佢叫我交返比你...」說完Jacky把手上的書冊遞給Rachel。 (詳見36章尾)

「衣本係?」Rachel伸手一邊接過一邊問道。

Jacky:「你打開睇下就知...」

Rachel把書冊打開，很快便知是甚麼一回事，裏面很精美地用文字和圖畫記錄著Elven和自己相識的故事。

「可唔可以比我一個人靜靜咁睇完佢?」Rahcel把書冊關上後說。

「好，咁我地返房先，你睇完ok就叫我地啦…」說完Jacky和Annie便走回房間留下Rachel自己一個。

看見Jacky和Annie回到自己房間，Rachel深呼吸了一口氣然後鼓起勇氣再一次打開了書冊。隨著一頁又一頁的內容呈現眼前，一幕幕的往事亦在心底裏被勾起，第一次的見面，campus獻花，海旁談天，joint-hall ball，1 on 1籃球賽，inter-hall後的晚上等等... Rachel突然發覺原來那短短兩年不夠的時間，她和Elven以朋友來說確實有不成比例的經歷，而讓Rachel吃驚的是Elven連很多細微位或是對白都記得清清楚楚，若不是被這書冊勾起，很多情節和對話Rachel自問自己不可能會記得，霎時間她能感受到這男孩到底有多喜歡和在意自己，但自己待他卻像用完即棄的膠袋，這讓Rachel感到更加內疚...

(你真係好傻...其實我有乜咁好值得你付出咁嘅感情?)

看畢冷靜過後Rachel便和Jacky Annie告辭，她需要自己沉澱一下。

「有件事希望你唔好介意，base on衣個故事，我幫Elven寫埋後續部份，希望可以係另一個世界幫佢完成心願... 大概講佢時光倒流返左過去，然後成功追到你，同你幸福快樂咁生活。 之後我張本書連埋D遺物燒左比佢... 未經你同意就咁做， sorry...」臨離開前Jacky對Rachel說。

「唔緊要啦，人都唔係度咯...如果人有下世或者真係有平行時空，我都好希望佢可以開開心心咁過...」

離開後，Rachel並不想回家，只是在街上漫無目的地溜漣，然後她來到了尖沙咀的海傍，Elven自殺的地方。

其實憑Rachel對Elven的認識，她並不覺得Elven是會因這些事而選擇輕生的人，不過事實如此，又不容她不相信。

(到底係咪我害左你呢... 如果果陣對你好D，你會唔會有唔同嘅選擇?)

(抑或從一開始我就唔應該同你傾計同你熟?)

(點解過左咁多年，你都仲放唔低咁傻呀?)


「小姐你發左呆好耐喇喎，無乜事嘛?」就在Rachel望著個海發了很久呆，一個阿婆突然出現在旁邊問道。

「我...無事呀，諗緊野啫...」Rachel禮貌性回答道。

「無事就好，唔好諗唔開又做傻事呀...」

「又?」

「係呀，幾個星期前有個後生仔又係好似你咁企左係度發呆好耐，之後我仲同佢傾左好耐計，點知我走無耐就見佢突然跳左落海，我咪即刻報警，但蛙人好似搵左好耐都搵唔到條屍，淨係係海底搵返佢個銀包，睇怕都凶多吉少喇...」阿婆一邊回憶一邊說道。

「個後生仔係咪二三十歲，高高大大幾靚仔架?」Rachel緊張追問道。

「係呀，幾靚仔架，不過個樣就好似好憂鬱咁囉…」

「係咪咁嘅樣?」Rachel用手機在facebook找了Elven的一張相問道。

「係呀，你識佢架?」阿婆略帶驚訝。

Rachel:「佢係我朋友… 咁佢死之前同你講左D咩?」

「佢同我分享左佢D故仔囉，之後就講佢衣一生最愛的女仔岩岩同第二個結左婚， 都唔知佢係咪為左衣件事跳海呢...」

「我都想知...」Rachel對阿婆說，又彷似和自己說。

「你唔會就係佢講果個咩米醋呀?」阿婆疑惑問道。

「係... 我就係佢口中果個米醋...」得到証實，Rahcel不知是因為內疚還是心痛，眼淚終於緩緩流下。

「果然好靚女呀，唔怪得可以令佢咁念念不忘啦... 唉，不過阿婆都唔知安慰你定責備你好喇... 感情衣家野，好就可以讓人好幸福，衰嘅就真係可以毀左人一生...」

「我真係無諗過會變成咁...」Rachel開始掩面痛哭。

「不過其實都唔怪得你嘅，怪只可以怪老天爺鍾意作弄人啦，佢嘅命中注定偏偏又唔係佢嘅命中注定... 不過阿婆都係八掛下，你覺得佢唔好咩? 有個對你咁好咁愛你嘅人，點解唔考慮下要咁對佢呀?」

「我都知佢好好，只可惜我嘅心無位置比佢呢...」Rachel繼續掩面痛苦答道。

「你個老公對你好好?你好愛佢?」阿婆鑿而不捨追問。

「我唔知點講...」

「好似有d難言之忍喎...見到後生仔同你都算有緣呀，不如你都同阿婆講下你個故事?」

也許是因為被Elven的死訊亂了心神，也許是因為阿婆也聽過Elven的故事倍有親切感，也許是因為Rachel現在真的很需要一個傾訴對象，結果Rachel竟然真的和阿婆開始分享了她鮮為人知的故事。

時光倒流一句話
作詞：黃偉文 作曲：林家謙
編曲：林家謙
監製：許創基 / 林家謙


如果我有逆轉的超能力
時間撥到早一百年的春天
全城在勤勞活著彼此友愛忙裡不見亂
我跟你或會發展知己情緣

除非我有預知的超能力
能趁疫症不猖獗時的秋天
如常地邀約你去洛磯山多瑙河休假充電
要親暱憑情動不等豁免

其實我不必異能大到可扭曲真相改春秋
我只想忘掉你不解這溫柔斷言未接受
能重做時光只需倒流一句話就足夠
尷尬到自己之前吞了「我喜歡你」不開口
十世還做朋友

情願你有讀心的超能力
能發現我的心計提早阻止
台詞若講錯了已被沾污的友誼
恐怕不易
再清洗回頭又死守那良朋位置

其實我不必異能大到可扭曲真相改春秋
我只想忘掉你不解這溫柔斷言未接受
能重做時光只需倒流一句話就足夠
尷尬到自己之前吞了「我喜歡你」
演好另一種「男朋友」

其實我只想未曾笨到搞不清楚你先開口
我只想忘掉你聽到的表情像很荒謬
難題是時光未許倒流明日只可向下流
尷尬到自己的人假設還未夠狠反了臉出走
厚面皮些演好友

有無巴打絲打聽完衣首歌即刻諗起Elven

外傳. Rachel的自白 (二)

我和Daniel初中時便已在教會認識，因為年紀相同，團契又在同一組，加上我地都住在沙田區，很多時活動完結後也會一起乘車回家，所以我們很快便熟絡起來。

Daniel一開始給我的感覺是玩世不恭型，對很多事好像也不太上心，不過慢慢我卻發現其實他只是對所有事也像遊刃有餘，雲淡風輕，問題發生時總能處變不驚地簡單解決問題，就好似世界上沒甚麼事值得他認真看待。記得在一次教會宿營，因為我們屬比較年長的一群，自然需要負責主要活動。而在一個戲劇表演中，當還有不到一個小時便要開始表演時，卻突然發現有組員大頭蝦把部份道具弄掉了。在大家都在發茅不知怎辦好時，Daniel主動走了出來拆解問題，一方面他找人聯絡宿舍職員看看有沒有機會把握時間找回失物，另一方面他開始重編部份劇情盡量把遺失了的道具影響減至最低，又利用灰諧手法把部份不見了的道具反變成一些攪笑位，結果最後大家都能順利演出，而且羸得不少掌聲。就是那一次後，我開始對Daniel改觀並發現他其實是一個很聰明亦很可靠的人。慢慢再深入交談，我又發覺了他幽默風趣的一面，而且對很多事都有自己獨特而有深度的見解，因此對他越發欣賞。不過要到真係開始鍾意，應該是我會考完之後嘅事了。

會考過後不久，Daniel的父親在一次意外中去世，那時Daniel表面上好像沒甚麼事一樣，只是盡力安排好父親的身後事，努力讓身邊的人不用擔心。不過有一晚因活動進行得較晚，完結後大家很快便離開，我本身想等他一起回家，但等了很久也不見他踪影，結果找下找下卻聽見他原來正躲在教會一間房裏痛哭，那是我第一次聽見他哭，了解到他軟弱的一面，他每一下的哭聲，都衝擊著我的心房，讓我感到十分難受… 不過為了避免他難堪我並沒有進入房裏，只是等他哭完出來後我才扮撞到和他一起回家。自那時開始，我發覺我對他多了一種特別的感情。

不過我和他發展成戀人的過程，其實並不順利。縱使知道自己喜歡上他，我卻不敢表達出來，但另一方面，我又很在意他對自己的看法和感覺。那時因為我們常常在一起，在中學雞年紀自然亦有很多無聊人謠傳我們是一對。雖然聽到這些謠言暗地裏我只有高興，但我亦害怕這些謠言會讓Daniel介意然後疏遠我。幸好Daniel在聽到這些謠言也只是一笑置之，並沒有影響我們之間的相處。只是在一次偶然機會下，我卻聽到他和另一個教友John的對話。

那時他們在一個活動室內預備崇拜的事宜，由於沒有關門，我碰巧經過時卻突然聽到自己的名字，放是便躲在門口旁邊偷聽他們的對話。

「咦Daniel，今日唔見你同Rachel一齊黎嘅?」

Daniel:「我之前有野攪唔係屋企出發咪無同佢一齊黎囉。」

John:「哦~襯人少少老老實實，你地成日出雙入對，行埋左幾耐啫?」

Daniel:「咪痴線啦，我地係好朋友咋，咁岩大家住得近所以成日一齊啫。」

John:「相處咁耐真係dd感覺都無?我唔信囉~」

Daniel:「無喎 ，我無可能會鍾意佢架，所以你地都唔好再成日講衣d無聊野，我男仔都仲好無咩所謂，人地一個女仔咁比人誤會實唔開心架。」

John:「知喇知喇，你講得咁firm，咁我都叫其他人收斂下啦...」

那時無意聽到Daniel的剖白後我很不開心，然後就削削離開了。之後因為難過，對方亦已表明不會喜歡自己，自尊心作用下我刻意和Daniel拉開了距離，不再像從前般常常和他一起。Daniel感受到我的變化並沒做甚麼，然後大家好像都慢慢接受了疏遠大家。

轉眼間過了一年多，由於拔尖我已經提早上了大學，Daniel則還要為AL打拼。不過這段時間，我卻突然多了位追求者，他是我們另一位教友Peter。我和他也認識了很久，以前的他並不是十分顯眼，比較沉默寡言，不過在那一年卻主動多了聊我說話，間中亦會約我出去吃飯。初時因為和他認識日子也不短，所以沒特別在意，只是隨著次數越黎越頻密，我亦開始注意到不妥當的地方，開始對他較為冷淡和拒絕他的邀請。

之後也許意識到我對他態度的改變，他亦慢慢知難而退。只是在一個晚上活動完畢後，當我在活動室執拾完物品準備離開的時候，他突然出現在我眼前。其實以前Daniel都會和我執拾然後一起離開，但近這一年大家疏遠了後就很多時大家都變成各自離開。

「Rachel，我有野想同你講...」他帶點氣喘說道，應該是從外面跑進來。

「你飲完酒黎?」嗅到他一身酒氣我問道。

「係...我需要飲酒壯膽先講得出...」

「不如有咩下次先講啦，我趕住走喇...」察覺到他眼神有點不對，我有點害怕。

「唔得！一定要今晚講！」他語氣突然帶點激動。

「咁你講啦...」無辦法下我只能見步行步。

「Rachel，我其實鍾意左你好耐...你可唔可以做我女朋友?」隔了一會，他緩緩說道。

「Sorry...我對你無感覺...不如我地都係繼續做朋友啦?」不用任何思考，我直接給了他答案。

「點解呀?感情可以培養架，你比次機會我啦，我會對你好好架...」Peter用帶點哀求的語氣說道。

「我已經有鍾意嘅人喇...」我希望我的坦白能讓他死心知難而退。

「...係Daniel?」Peter失望地問道。

「唔關你事...總知我同你無可能啦...」

聽到後他突然很激動走前捉著我膊頭。

「你唔好咁傻啦，佢唔鍾意你架！John已經同晒我地講Daniel表明唔會鍾意你架!」

「你放手啦，你捉得我好痛呀！」我嘗試掙扎但失敗。

「我唔放！我要你認清你同Daniel係無可能架！」

「邊個話我同Rachel無可能架?」這時一把熟悉的聲音從Peter身後傳來，接著便看見Peter被人用力拉後，然後我看見了Daniel的樣子。

他走過來把我護在身後，然後對著Peter說道

「我衣家同你講我鍾意Rachel，咁你可以死心啦?」

「但你之前明明講過你唔會…」

「我衣家改變主意得唔得呀?襯件事未攪大我勸你快d去洗過面冷靜下，唔係再繼續落去大家連朋友都做唔成!」Daniel大聲斥喝Peter。

「你好野！」說完Peter有點老羞成怒便氣沖沖轉身離開。

「你無野嘛?」看見他離開Daniel轉身溫柔地問我。

「我無野...點解你會係度嘅?」

「行到半路醒起漏左野咪返黎拎，點知岩岩遇到衣幕...睇黎以後都係等埋你一齊走好d喎...」

「嗯！」我開心答道。


一起回家途中，我鼓氣勇氣問他

「咁你岩岩講嘅野係真定假?」

「咩?」

「岩岩你話鍾意我囉...」

「岩岩要佢死心所以亂咁up架咋，你唔好放係心度...」Daniel難得帶點面紅說道，這是我第一次看見他展示害羞一面。

「哦...」我帶點失望。

「咁如果Peter再出現點算?」隔了一會我不死心又再問。

「咁...衣段時間我地盡量唔比你一個人獨處啦」他說”地”字時明顯加重了語氣。

「其實…點解你突然好似咁討厭我?」感覺受到委屈我終於問了一直想問的問題。

「下? 點解咁講?係你討厭我喎...衣一年明顯係你突然主動疏遠我...」Daniel一臉驚訝望向我問道。

「因為你同人講你一定唔會鍾意我，我仲點好意思成日痴住你...」我委屈地說。

「點解你會知...你果日聽到晒?」

「果日我咁岩經過出面…」

「所以你係因為咁之後開始避開我?」

「咁你都講到咁，我可以點喎...」

「原來係咁！我仲一直以為你突然討厭左我...」Daniel臉上出現如釋重負的表情。

「我點會...」(我明明係鍾意你…)

「咁就好喇！」Daniel臉上重現陽光笑容。

「咁你可唔可以話我聽點解你一定唔會鍾意我?」但我仲未可以笑得出。

「呀...你真係想知?」Daniel一臉尷尬。

「想！」我鼓起勇氣。

「其實我果日係因為面子講大話...」Daniel擦著鼻子尷尬說道。

「!!!所以...」

「既然知你唔係討厭我我都唔介意怕被拒絕同你講，其實頭先我同Peter講嘅野都係真嘅... Rachel，我好早之前已經鍾意你...」

幸福的感覺來得太快，霎時間我突然不知怎樣回應。

「我...其實都鍾意左你好耐…」隔了一會我終於細細聲說出一直想說的話。

Daniel笑了一笑

「突然間，我有d感激Peter...」

說完他便突然抱著我，然後吻了下來...

外傳. Rachel的自白 (三)


對於大家也是大家的初戀，和Daniel一起後頭一年，我們都很幸福甜蜜。不過隨著他也入了大學，我又越來越投入於大學和hall的活動，我們兩人的關係亦開始產生了點變化。也許是大家生活圈子都有了很大不同而又理解不到對方的生活，我們的話題開始變得越來越少，有時甚至會相對無言，然後我會不開心，之後他會發脾氣... 我們的感情彷彿亮起了警號，不過幸好每次雙方隔了一會都會嘗試氹返大家，這份感情才能繼續維繫。


在我的yr2，一次機緣巧合下，我認識了Elven。說起Elven，其實我有點不知應該從何說起。對於這名字，很早以前我已經不陌生，因為他是我教會閨密Susan差不多整個中學的暗戀對象，所以早在很多年前，我已聽過關於不少他的事情。但要到真正認識他，還是等到yr2一次我和Susan在大學附近吃完晚飯後在hall樓下和他的碰面。也許是早已先入為主，Elven給我的第一印象並不差，靚仔、醒目、感覺又平易近人，不過和Susan以前描述的陽光男孩不同，那時Elven的面容是帶著種哀愁，給人一種心死的感覺。當然那時我已聽Susan說過原因，和ex分手的打擊對他可以說是災難級。

隔了數星期後有天，Elven突然加了我的MSN，後來我才知道原來當時他是為了幫宿友追我表妹才有這舉動。不過姑勿論他當日的動機是甚麼，我們卻意外地很快成為了好朋友。和他這樣快熟絡的原因有很多，一來是對他早已不陌生，二來是大家有很多共同的話題 - Susan、hall life、籃球、表妹等等，三來是大家真的很夾嘴型，諗嘅野好多時都好相似，同佢講野好有果種知心好友的感覺。某程度上，或者Elven當時其實是取代了Daniel去聆聽我關於大學和hall生活上的點滴。和Daniel說，感覺有點像對牛彈琴沒甚麼共鳴，但和Elven說卻總是停不了然後很自然繼續產生一個又一個的話題。

隨著每晚聊天和他變得越來越熟絡，慢慢我發覺Elven表面上雖然常常是鬱鬱寡歡，但了解越深仍不難察覺他骨子裏其實仍是一個很正面亦很幽默風趣的人。每次我放負或者遇到問題時，他總是能從正面方向給我鼓勵和意見，有時我心情唔好，他又很能用幽默平伏我的心情，久而久之，我習慣了每逢遇到D唔開心或者負面嘅事，都會搵佢訴苦，因為每次都佢傾完，我嘅心情都會好返好多。

另外，我覺得他自己本身其實亦是一個很強大的人。不論在游泳、籃球和足球比賽裏，他都是十分耀眼的存在。有實力固然不在話下，最難得的是你能看見他對每一件事都總是全心投入，全力以赴。我還記得那時望著他因腳傷而飲恨籃球冠軍時那種失落，讓我心裏亦莫明跟著他痛起來。但正因如此，我對他說的話或者給的意見，總是有種近乎盲目的信任，因此我們還說笑以”師徒”稱呼大家。

不過那時雖然和Elven很熟，但一直其實我都覺得只是留於表面，因為他對我從來都只是展露自己positive和強的一面，卻從來沒有放過負能量或是展示過一些不好的性格，這讓我覺得對他總是有種距離感，好像我並不是真的完全認識了解這個人。直至有一次，他為了獎勵我籃球比賽有好表現，終於跟我說了自己和ex的故事，那時我才第一次真正感受到他正面硬朗的外表下，原來隱藏了甚麼樣的傷害，我能感受到他的心那時其實仍沒好還處於滲血的階段。然後到到他籃球比賽輸了，在我的哀求下，他第二次向我展露了自己軟弱的一面，那種距離感才真正消失了，我覺得自己終於能了解到真實的他。

或者有人會問，其實男女之間咁friend，點會完全無諗過其他方面嘅野? 對於Elven對我的好，其實我不是完全沒有想過會不會包含了其他感情。不過一來在Susan口中我一早知他是一個十分之nice的人，二來他跟ex的事亦讓我覺得這並沒有可能，三來是有幾次我亦曾和他呻過自己與Daniel的問題，而他總能給我正面的意見讓我和Daniel和好。這讓我完全否決了這可能性然後更亳無避忌地和他越來越熟絡。直到有一天他一個message告訴了我我錯了，感情確實係好複雜的一件事，時間亦能改變很多的事情，而有時到你發覺的時候已經太遲…

就在Elven 足球隊成功奪冠的那晚，他在喝醉後send了一個SMS給我，告訴我他發覺自己喜歡上我。朝早起身看見這message的一刻，我很愕然然後有點不知所措。不同於Peter我可以直接拒絕然後雖然可惜但仍能當沒有了這朋友解決，但Elven這個朋友我是真心不想失去，那時他對我以言真的是一個很重要的朋友。不過思前想後，我發覺我根本沒有其他選擇。接受Elven? 不可能。不接受Elven但繼續維持現有關係? 咁同害佢繼續比假希望佢有咩分別? 佢己經被傷害過一次 ，我唔想成為佢加害者之一傷多佢第二次… 而且我本身就接受唔到d女仔成日周圍收兵。所以糾結了兩天，我只能接受現實，告訴他以後大家還是保持距離較好。當時Elven並沒有回覆我的message，不過一星期後正當我已預備好永遠失去這個好朋友的時候，他卻跟我say sorry並解釋自己只是一時酒後糊塗，並沒有追求我的意思，自己亦根本未放得低佢個ex，想當粉筆字抹左個message大家當沒事發生過繼續做好朋友。我也不知當時是我真的很天真，還是因為心底裏我根本不想失去他，我竟然選擇相信並應承了他。若果當日我能少點天真，多點小心，現在發生了的悲劇是不是就可以避免?

不過應承還應承，發生了這件事，我並不可能完全當甚麼也沒發生過。雖然我們照樣常常傾計，但之後我都無再主動約過佢出去或者主動談及和Daniel的事。雖然之後我還是答應了他一起去看戲，甚至和他一起去ball這些邀請，但那時我認為只要自己沒有越界，凡事說清楚沒有比錯誤signal對方，那大家都會明白不會再有甚麼誤會發生。


「阿婆可唔可以問過問題?」聽到這裏阿婆忍不住發問問題。

「嗯?」

「你講到Elven咁好，同Daniel果陣又有D問題，真係完全無諗過唔要Daniel接受Elven?」

「果陣真係完全無諗過喎… 因為當時離開Daniel一定唔係我option之一，自然唔會諗接受Elven。」想了一會Rachel答道。

「咁果陣你明知Elven鍾意你，你又仲應承同佢睇戲去ball?」


「果陣我以為講清楚，唔會誤會就無事嘛…. 同埋我擔心成日拒絕會令佢唔開心，亦好似唔信佢咁影響到大家嘅友誼…」

「無誤會係一件事，但你無諗過咁可能會令佢對你嘅感情變得更深?」


「果陣無諗咁仔細呀… 又或者真係我衰，覺得自己無過界，無比錯誤訊息人將來就算發生咩事自己都無責任掛…」

「咁你問心，咁耐以黎，你係咪真係從來無對佢動過心或者做過一D野令佢誤會?」

這時Rachel突然想起和Elven去完ball後自己情不自禁的一吻。那時因為整晚的環境氣氛帶動，神推鬼㧬下蜻蜓點水吻了Elven的臉龐一下，事後Rachel其實十分後悔，不過很快便以這是西方正常社交禮儀說服了自己這舉動並沒甚麼不妥，而之後她和Elven亦沒有再提起過這件事。

「可能曾經有一兩個moment都唔係無感覺嘅，不過只係一閃即逝囉…」Rachel帶點尷尬答道。

「哦? 咁你繼續先。」阿婆露出了一個微不可察的笑容。

外傳. Rachel的自白 (四)

在Elven畢業離開宿舍前的最後一晚，我們出去傾了一晚通宵計。諗落原來我同Elven曾經試過三晚這樣出去傾通宵，一晚是他籃球比賽後，一晚是這晚，一晚是在一年後發生。和Elven傾計，是很舒服的一件事，而對於他畢業後要離開，我其實亦好唔捨得。感覺他走後，我就再沒有一個可隨時傾訴的對象，始終他已經離開了大學世界要過新的生活，我總不能再常常捉著他繼續說自己大學的事。而physically遙遠的距離亦讓我們比以往見少了很多，雖然我們還會經常message大家，但不得不否認那時大家有輕微升溫趨勢的感情亦因此而冷卻了下來。

由於yr3是我最後一年的inter-hall比賽，加上做了隊長令我花了很多時間在team和hall的事情上，這讓我和Daniel的感情危機進一步擴大。我們見面少了，吵架多了，那時我甚至覺得他根本不會是我將來的那一位，不過基於不想就這樣放棄大家還是努力苦苦堅持下去。而另一方面，我察覺到Elven亦慢慢在轉變，他給我的感覺不再像從前那樣開朗和正面，有時甚至覺得他有種負面的氣場。起初我以為可能是因為工作的關係，但從他在比賽前送給我的一份禮物中，我意識到這個轉變可能是因為我。在我最後一場比賽前，他送了兩份禮物給我。一份是印有我team相的陶瓷杯，而另一份則是他DIY的一個卡紙模型。第一份其實是我很喜歡的禮物，因為我覺得很有心思，亦很能鼓舞我。但第二份卻讓我感覺到壓力，因為明顯地這份禮物不是一個朋友會為你而製作的。不過那時我也沒再多想這問題，始終一直我都有表明自己立場，我亦相信他明白。遺憾地，之後比賽我落敗了，而Elven亦專登陪了我一整晚去安慰我。

經過他的開解，我心情本來是舒服了很多，不過第二天，我卻發現他原來做了一件讓我很生氣的事，有hallmate碰巧經過並影到他襯我睡著時偷偷錫左我塊面一下… 我生氣並不是因為被吻，而是因為我覺得他背叛了我們的友誼，背叛了我對他的信任。一直以來我們仍能做好朋友是建基於大家都知道並遵守朋友間的界線，但他這行為明顯超越了這條線，亦告訴了我他原來一直也放不低我。當我扚起心肝和他攤牌時，他亦直認不諱自己一直還很喜歡我，而在他說出叫我考慮他而和Daniel分手這說話時，我知我們的友誼真的要完結，再沒有其他選擇了… 我接受不了他有這種想法和心態。之後一段時間他也有嘗試再找我，但我覺得和他已經沒有可能再有信任，而且對他來說這應該反而是一種解脫可以讓他繼續move on，所以我狠下心腸冷對待他。自此，這個特別的朋友就從我的生命中被移除了。其實心底裏我好明白果兩年，佢真係幫左我好多好多，有時我都諗如果佢無鍾意我大家可以繼續做好朋友，咁有幾好呢? 可惜世事並沒有如果… 我只係希望佢可以盡快放低我搵到自己真正嘅幸福。

隨著忙碌的大學生活完結，我和Daniel間最大的問題亦不再存在，大家的關係回復如昔。不過經過時間洗禮，七年之癢類的問題還是會慢慢浮現並困擾著我們。幾年後，雖然大家都習慣了對方的存在，但大家的感覺卻像越來越淡，然後去到某個位，他提出了分手。那時心底裏我是不希望分手，但卻又不能否認大家的感情已經去到一個分水嶺的位置，要麼就接受這感覺然後走到結婚這一步，要麼就只能分開各自重新出發，而最後我同意了分手。

不過有時有D野真係到無左你先會知自己真正諗法。分手後的時間我一直都好唔開心，連工作亦沒甚麼心機常常出錯。幸好原來Daniel也有類似感覺，結果在一個月後因為某個教會活動讓我們再次碰頭，而活動後他提出了復合，我亦坦然接受。也許大家愛情的感覺是變淡了，但這並不代表你可以接受對方從自己生命中消失。有趣的是當心態上接受了這決定後，之前的問題好像又變得沒那麼重要了。Things will find a way they work。

又過了一年，我在Susan的婚宴上再次看見了Elven。那熟悉而又陌生的面孔感覺上除了多了點風霜的痕跡外其他並沒甚麼改變。看見他和身邊的朋友有講有笑，前排亦聽Susan說過他交了女朋友，我想他早已放低了我正開心過生活，這對大家應該都是最好的結局。我有諗過主動過去打聲招呼，不過最後還是決定一動不如一靜，真係有機會面對面撞到才算吧，結果這機會最後並沒出現。回家看見Elven facebook post了張和Susan的合照，基於我和這兩人的關係，我like了這張相片，這應該是我五年來第一次like Elven的post。 其實當日我是有諗過block Elven facebook，不過最後我想留有一個渠道比大家知道大家近況，不至於完全了大家的connection，所以便讓它繼續存在。過了幾日，我收到Elven久違了的whatsapp。過左咁多年，我相信甚麼也應該過去了，所以我和他開始談回天，甚至再見面。雖然大家不可能回到當日的關係，但若果能做回普通的朋友，那也算是個不錯的結局，只少可惜和遺憾感應該沒那麼強烈。不過到到真正見面，直角卻告訴我Elven並不是完全放低左我，從他的眼神，我還是能感受到他對我一種特別的感情。正當我還在猶豫應不應該和他繼續溝通時，我家裏卻出了一些事情。

事源是我一個阿叔問大耳窿借錢然後走左佬，不幸地我爸爸在不知情下成為了擔保人，自此我屋企便不斷被受滋擾。恐嚇訊息、電話、信件、街招等等，層出不窮，而最可怕的是對方擁有了我們全家的電話和相片。雖然說覺得對方應該只是靠嚇，不會真的做一些傷害性的行為，不過大家還是會覺得不安。這段時間Daniel很緊張和關心我，每天都會盡量接送我出入，又陪我們到警署報警。有他的陪伴，我的心安穩了很多，亦再次提醒了我Daniel是一個多可靠的人。最後不知是甚麼原因，滋擾行為維持了三個多月後就突然全部消失了。或許是大耳窿知道再找我們麻煩我們也不會幫阿叔還錢，及時止蝕控制成本吧。然後有一天，當我和Daniel晚飯後正在街上閒逛時，他突然說道

「不如我地結婚咯?」

「好呀。」沒有猶豫，我很自然答道。

由於我們想一齊從簡，於是佷快幾個月後我們便正式註冊成為了夫妻。

外傳. Rachel的自白 (終)

「咁聽落都幾好呀， 點解你頭先好似有D難言之隱咁?」聽完Rachel的自白，阿婆問道。

「因為在我結婚前一日，突然收到一個匿名SMS，內容係講Daniel係一個衰人，話我同佢結婚將來一定會後悔。

我看到後問她是誰但她沒有再回應。當時這message令我有點不安，但細想下自己和Daniel認識了這麼久，我自問很了解他是一個甚麼人，亦覺得結婚就應該要相信他，所以便只是把這當成是惡意攻擊的message，第二天照和Daniel開開心心結了婚。

不過在和Daniel渡蜜月期間，有日我無意間發覺了同一個電話號碼send了一句”BB 我好掛住你” 比Daniel…」

「你有無搵佢對質?」阿婆聽到這裏不知為甚麼感覺有點憤怒，還不知覺捉實了自己的拳頭。

「無… 我唔敢，當時淨係覺得好亂，然後努力扮作無事…而諷刺嘅係我記得果個電話號碼係同一個因為個號碼最後四個字咁岩同Elven生日日期係一樣… 然後返到黎突然就聽到Elven的死訊…」說到這裏Rachel又開始流起眼淚來。

「唉…或者冥冥中係有天意係入面…個後生仔連我聽佢講左一陣我都聽得出佢有幾咁愛你…」

「我知， 睇埋佢衣本畫冊我更加清楚… 咁多年，佢對我真係從未試過有半分差過， 永遠都好溫柔，可惜我真係回應唔到佢對我嘅感情…」Rachel陷入了回憶說道。

「就算你發現老公原來真係一直有第二個都係咁諗?」

「我無諗過… 而且Elven都已經…」Rachel聽到後呆了一呆。

「咁如果Elven未死呢? 比你重新揀一次，你會揀一個你愛嘅人，還是愛你嘅人?」

「我愛嘅人定係愛我嘅人? 我唔知呀…不過點都唔重要啦，或者等下一世有機會我再話你聽…」Rachel想了一想後苦笑道。

「如果我話有辦法比你再見Elven呢? 你想唔想見佢?」見Rachel動搖阿婆再追問。

「我唔明你咩意思…」Rachel突然抬頭愕然望向阿婆。

「想嘅就跟我黎啦…」說完阿婆突然從衣袋裏拿出了一個球狀物體放在地上，再拿出了一個疑似遙控器的物體按了一個掣，一扇門突然從球體伸展出來，然後阿婆便走了進去。Rachel看見後嚇得目定口呆，感覺像是看見電影裏幾十年後的科技情節，但再三猶豫後還是敵不過好奇心跟阿婆進了入門內。阿婆看見Rachel進來後後再按了一個掣，接著出面海邊突然閃了一閃，門便不見了一切回復如常。原來自從Rachel見到阿婆一刻起，兩個人身邊便像圍上了一層隱形薄紗，其他人都看不見他們，直至她們進了門內消失後一切才回復原狀。

Rachel進入門後跟阿婆走進了一條通道，然後很快便到了一間像高端實驗室的房間。正當Rachel想問阿婆這裏是甚麼地方時，前面一個影像吸引了她的注意。他看見Elven 正躺在一個玻璃容器入面，像沉睡了的樣子。

「Elven!」失而復得的感覺讓Rachel立即衝了過去想近距離看看Elven。

「你點叫佢都無用佢唔會醒架喇，佢嘅靈魂已經唔係衣個時空。」

「點解會咁? 你對佢做過D咩黎?」Rachel激動地問道。

「你應該感受到我係無惡意，我係要傷害你地就唔會花咁多時間聽你地講故仔啦。幾個星期前係頭先果度見到佢萬念俱灰，好似一心想尋死咁嘅樣，我咪提供左一個方法比佢去修補遺憾啫。」

「咩方法?」

「衣個世界係好複雜，唔係單單好似你地所認知咁。同一時間，其實係有好多唔同時空同時演繹緊係唔同的時間，唔同決定所造成的唔同世界。而我有方法將我地嘅靈魂轉移去另一個時空。」

「你意思係Elven個靈魂衣家係另一個時空?」

「聰明。」

「咁佢仲有無機會會返黎?」

「如果返去的目的或者疑惑得到解決，記憶嘅封印就會短暫解開，然後佢可以選擇返唔返黎。」

「咁佢的目的係咩?」

「你知道嘅。」

「…我?」

「係，所以無你的參與，佢其實係唔會返黎，因為就算佢係另一世界真係可以同你一齊，返到黎都會失去返一切… 除非佢係同衣家嘅你一齊返黎。」

Rachel陷入了沉默。

「其實衣家全世界都已經接受佢死左，雖然唔知佢係果邊係點，但至少可以重新過新生活都未必係一件壞事呀。除非你都有其他目的或者疑惑想解決，唔係你無必要冒險為佢咁做。」見Rachel很久也沒有出聲，阿婆又再說道。

「到底個系統運行法質係點? Elven點決定佢係去左邊一個時空?」Rachel再思考了一會後問。

「要攪清楚衣個技術唔係返返過去改變未來，而係去左另一個唔同的時空，而衣個時空的前設或背景同今生衣個世界可能會唔同。當你諗住想改變的事物，系統自然會將你個靈魂送去最接近你所想的果個時空。不過因為保護時空法側，靈魂過到去大部份的記憶都會被封印，可能只係剩低一D最深入的感覺和本能去左右自己的決定和行為，因為若果不斷帶著現世記憶穿梳於唔同時空係一件好危險嘅事，有D帶有不良動機的人好可能會利用衣種技術做D傷害別人或者世界的行為，所以穿越後你唔會記得自己係穿越者，只是重新在那時空生活，當然因為前設不同，封印的記憶亦可能會影響你做了一些不同的決定因而引申不同的結果。而就算最後條件滿足你選擇返返黎衣個世界，你都只會當發左場夢咁，唔會記得穿越衣個事實。」

「我可唔可以問Elven去左一個咩時空?」

「佢有講過自己有兩個最大嘅遺憾，一個係錯誤表白令到你地最後連朋友都做唔成，一個係點解佢唔可以早D係你有男朋友前認識你。佢好有信心咁話如果可以早D認識你，佢一定可以搶羸你老公喎。」

「哈，咁有自信? 睇下點...」聽到這裏Rachel不期然露出了點點笑容。

「咦，笑得出即係你心入面應該有決定喇喎...」

「嗯，發生左咁多野，如果可以從新洗牌，我都好想知道結局會唔會改變... 以前其實我都有諗過如果有下一世，我都希望可以有機會回應Elven報答佢，而當聽到Elven的死訊後衣種感覺就更加強烈… 衣家知佢原來未死又真係有衣個機會，我說服唔到自己唔去嘗試… 同埋關於Daniel，有D野我都想去find out...」再思考了一段時間，Rachel終於作出了決定。

(又或者其實我只係想逃避，唔想再面對衣家嘅Daniel…)

「既然你決定左，咁就諗住你想要嘅目的，然後食左衣粒藥佢，至於衣度D手尾阿婆會幫你善後架喇。」

「多謝你…可唔可以問你點解要幫我地? 」

「嗯…」阿婆彷彿亦進入了自己的回憶。「因為阿婆好想每個人都可以有多次機會，亦都好想知道個答案… 」

「咁希望有一日我可以返到黎講你聽個答案啦。」

「哈哈，可惜你唔會有咁嘅機會，正如頭先所講，你返到黎後只會當自己發左場夢，而我係你心目中亦只會變返做一個普通嘅阿婆，所以你唔會講到咩比我聽架。」

「噢，咁太可惜了...」Rachel有點失望和不好意思。

「傻女，其實如果見到你地可以一齊返黎，咁就已經係答案啦，唔係咩?」

Rachel聽後想了想，然後對阿婆笑了一笑，再說了句多謝後便把藥吞下了，很快暈倒在地上。

阿婆把Rachel放進了第二個玻璃容器並接上Elven的容器後，望著Rachel和Elven望了很久，然後右手突然往臉上一撕，露出了另一個面容。若果Elven和Rachel看見一定會大吃一驚，因為這時阿婆的臉容，竟然和Rachel有超過八成相似， 只是臉上佈滿了歲月的痕跡...

「希望你地唔會白廢我專登返黎嘅心意啦...」說完後阿婆便依依不捨離開了房間。

只是阿婆沒想過回到外面無耐，竟又遇見了另一個人，讓她陷入了兩難的境地…

之前故入面係咪有講過Elven會返去Rachel細個未同Daniel拍拖嘅時候？
Btw真係好好睇

多謝支持
唔係呀 只係第一部尾有講過係另一時空Rachel拒絕左Daniel復合的要求

總會有？

暫時仲會有
不過主要都係睇仲有無讀者想睇
可能戲情唔太吸引都感受到好似越黎越少人睇
只係唔太捨得就咁完左個故仔所以想再努力下

咁我應該係記錯第二個故

幾好睇吖樓豬

Btw, 又係時空劇情

外傳. 故事的終結與起點

2050年 香港

因為女兒思雅剛結婚搬離了屋企，已經60歲的Rachel正在執拾家裏的雜物。打開其中一個膠箱時，她看見了一本久違了的畫冊。

(Elven…)

心血來潮，Rachel翻開了這本畫冊一頁一頁讀著，嘴角不時露出淡淡的笑意，直至看完後卻又露出濃濃的哀傷。

(不知不覺你都離開左30年，如果有輪迴，下一世你應該都夠年紀成家立室?)

這時兒子天佑剛回到家看見母親正拿著畫冊愁眉不展的樣子，心底裏明白到是甚麼會事。

30年前，Rachel和Daniel結婚後不久便發現了Daniel疑似有出軌的痕跡，正當她糾結要不要和Daniel攤牌的時候，卻發現自己懷孕了，而且還是龍鳳胎。再三思量後因為希望BB能有個健康的家庭成長，同一時間亦希望BB會令丈夫生性回頭是岸，所以她選擇了沉默。初時，她以為自己成功，因為Daniel對她和BB也很好，直至BB 一歲多時，一個女人找上門把一切都催毀了，因為這個女人告訴她自己亦懷孕了，而且她和Daniel原來早在很多年前已經發生了關係，只是Rachel一直不知道。

深受打擊的Rachel只能選擇和Daniel離婚，並獨力撫養兩個孩子。幸好兩個孩子很乖，讀書成績亦很好，而在他們升上中學時Rachel終於把和父親的事告訴了他們，這讓兩個孩子對母親更是疼惜。不久，兩兄妹有一次襯母親不在的時候在家裏搗亂，把所有雜物散到整屋都是，但那時一本畫冊卻突然吸引了他們的注意，兩兄妹於是停止了搗蛋並一起閱讀著這本畫冊。

「原來媽咪讀大學果陣有個咁嘅故事… 唔知衣個Elven乜水，衣家去左邊呢?」看完後天佑首先說道。

「好浪漫呀… 淨係睇衣本書都知個Elven幾有心思啦! 阿媽果陣咁蠢架，有個咁好的男仔唔要走去揀果個衰人老豆!」思雅看完側變成了心心眼，陶醉於美好的幻想世界之中。

「朱天佑，朱思雅， 攪乜呀你地! 係咪想死?」 這時Rachel回到家打開門看見兩個孩子的”戰績”，完全壓抑不住自己的怒火咆哮道。

知道自己闖下大禍的兩兄妹立刻一左一右走到母親旁撓著她雙手開始使用大絕。

「阿媽唔好嬲啦，我地諗住順便執下屋嘛，我同阿哥一陣會執返好晒D野架喇~」思雅首先撒嬌道。

「係呀，我地會執返好架，包保之後整齊過之前!」天佑再幫手補鑊。

兩兄妹說完扶阿媽在梳化坐低後便開始執拾。隔了一會見母親火已下後思雅終於忍不住問道

「媽咪，到底邊個係Elven呀?」

聽到Elven這名字，Rachel的身體震了一震，本身想問她們為何知道這個名字，不過看見通地雜物便估到原因了。

「Elven係媽咪以前一個好好的朋友…」

「咁佢衣家去左邊?好似唔見你地有聯絡嘅?」天佑追問道。

「因為佢已經唔係衣個世界喇…」隔了一會Rachel答道。

善解人意的兩兄妹感覺到媽媽的心痛便沒有再問問題，只是走到母親旁邊靜靜抱著她。

當然，為了滿足自己的求知慾，他們很快便用撒手鐗從表姨Annie口中知道了整個故事。

「原來我個名係媽咪為左紀念佢而改…」知道了故事後天佑對思雅說道。

「阿哥，我聽完後好唔開心呀… 阿媽咁多年黎一定好內疚…之後仲要知道老豆咁過份…」思雅眼濕濕地對天佑說。

「我都好唔舒服… 我開始明阿媽同阿爸分開後咁多年都無再同第二個一齊喇…」

「點解?」

「發生左咁嘅事，大概覺得自己唔配再有幸福吧…」

「阿媽真係好可憐呀… 阿哥我地有無野可以幫到媽咪?」

「或者真係有…」天佑這時突然想到之前在網上看見過前排科學家在研究平行時空和空間轉移上取得了很大突破。

自此，兩兄妹發奮讀書並很快在科學領域上進得傑出成就加入了國家的秘密研發局。


回到現在

「阿媽，諗起Elven?」天佑坐到Rachel身邊問道。

「嗯… 咁岩執野見到本書咪拎出黎睇下囉。」Rachel抹一抹臉上的淚痕答道。

「如果有一日可以比你時光倒流，你會唔會有唔同選擇?」靜了一回，天佑再問。

「衣D問題點知呀… 不過如果真係可以返返過去，至少我肯定會千方百計阻止佢自殺… 為左我，真係唔值得架…」

「阿媽，我未經歷過愛，體會唔到當日Elven的心情。不過我同阿妹都知你衣幾十年黎其實好唔開心… 我地好希望可以幫你修補你人生嘅遺憾，好希望你可以活得開心D。」

「傻仔，都咁多年啦。阿媽見到你同思雅咁乖咁生性就已經好安慰，只要你地開心幸福我就開心架喇…」

「我地好幸福呀，因為有個咁好嘅阿媽~ 衣家到我同阿妹有能力去回饋你喇，今晚同我地去一個地方啦。」

「咩地方?」

「今晚你咪知囉~」


到了晚上，天佑駕飛船帶Rachel到了一個效外地方。降落後經過一重又一重的關卡，他們來到了一個像實驗室的大房間，思雅早在這裏等著並向他們揮手。


「你兩個攪咩咁神秘呀? 衣度就係你地工作個實驗室?」30年後的科技絕不是現在可比，所以看見很多看似先進的儀器也沒有讓Rachel大吃一驚。

「你都可以咁講，衣度係其中一個實驗室。不過黎緊我地講嘅野你要認真聽同埋唔好咁驚訝。」天佑答道。

「咁嚴肅? 咁講啦。」

「其實自從知道左阿媽你D故仔，我同阿妹就一直諗緊有咩方法可以幫你，而咁岩地球上科技嘅突破比左條路我地。阿媽，唔好嚇親，前排我地國家終於成功研發左時光機可以比人返返過去喇。而且一時間，阿妹果team都成功研發左另一樣野，一種可以幫人將靈魂轉移去另一時空的技術。首先你要明白衣個宇宙其實係有好多唔同的世界…」天佑和思雅很認真和Rachel講解這技術和要注意的事項。

「所以你意思係我可以用時光機返返過去，再用阿妹個技術去另一個世界重新黎一次?」用了很長時間理解背後理念後，Rachel得出結論。

「無錯，當然要點用佢地你可以認真諗下，然後再話比我地聽啦。」

Rachel聽完陷入了深思，良久，她終於作出了決定。

「越諗阿仔阿女你地真係好叻，多謝你地咁孝順為我做嘅野，阿媽好以你地為榮! 我決定左喇… 」然後便把自己的計劃告訴了他們。

「阿媽你肯定? 你唔自己去經歷另一個世界?」

「阿媽老喇，而且仲有你地，我邊捨得就咁走左去… 返返去救返Elven，比另一個自己多一次選擇權，然後如果可以知道埋佢地嘅結局就最好啦…之後我就返返黎陪你地，我仲要等住抱孫架嘛~」

「媽…」天佑和思雅走到Rachel前面緊緊抱著她，因為他們本身也很唔捨得Rachel。三人就這樣抱著一團靜靜享受著這時光。

「好啦，我出發喇，早去早回!」過了一會Rachel終於收捨心情決定出發。

「衣個空間膠囊有3套藥和儀器，以備有咩變數和不時之需，你好好袋住呀。前面果部就係時光機入口，你入去就得，其他野我地會set好架喇。」抹掉眼淚思雅把需要的用具交給了Rachel。

「媽咪好快返架喇，等我呀~」深呼吸了一口，Rachel走進時光機並和兩個仔女揮手作別。

「萬事小心呀媽咪!」說完天佑便按下了一個紅色的掣，而Rachel亦應聲在時光機內消失了。

經過一輸暈眩的閃光後再次打開眼，Rachel 發覺自己回到了30年前的尖沙嘴海傍，而在遠處，她看見了一個熟悉的背影正望著海邊發呆。

(Elven，Rachel，我黎救你地喇!)


-外傳. 故事的終結與起點 完-

多謝

所以今次加少少新元素唔係純返返過去希望可以特別D

因為劇情需要, 我將D 章節重新編排過. 被遺忘的故事會係第二部劇情, 岩岩完左. 有興趣可以去紙言或者PENANA 睇下新目錄的編排.

另外預告明天會有第三部新的故事劇情上線

第三部

1. 你好 我係Elven

“夕陽無限好 天色已黃昏 本想去憑愛 去換最燦爛一生~”

隨著鬧鍾聲響，Rachel緩緩打開眼睛，望著陽光已經灑入房間，她知道要起床了。今天是星期日，她需要返教會主日崇拜。經過一輪梳洗換裝後，Rachel已在走往巴士站的道路上，她不時四周觀望，尋找著那熟悉的身影，然後在巴士站裏，她看見了他。

「Hi，咁岩嘅?」帶著點尷尬又帶著點高興，Rachel向那男孩打了聲招呼。曾經，他們習慣相約一起返教會和返屋企，但自從幾個月前Rachel意外聽到男孩告訴別人說不會喜歡自己，她便沒有再約過他，只是大家間中還是會在巴士站裏碰面。一方面她想逃避他，但一方面她卻又希望見到他。

「我地有緣囉~」男孩露出他招牌式的燦爛笑容說道。自從察觀到Rachel的異常，他習慣了搭早一班車到教會附近先吃早餐，不過今天因睡過頭所以只能極速買個麵包代替，然後便遇見了Rachel。他很想知道Rachel為何突然疏遠自己，但男人的自尊又讓他不好意思問出口，結果就默默接受了這變化。

Rachel聽到男孩的回答，個心猛烈跳了一下，然後很快回復平靜，只是象徵式對男孩笑了一笑以作回應，結果氣氛陷入了古怪的dead air，幸好巴士很快便來到打破了這困局。巴士上並不多人，Rachel坐到了其中一排空位靠入的位置，男孩猶豫了一下後並沒有坐到Rachel旁邊，而是選擇坐到Rachel的後排，他並沒有發現Rachel看見後臉上出現了一個一閃即逝的失望表情。

巴士開動，兩人都故作望向手機避免尷尬。過了一會，男孩突然醒起甚麼問了Rachel一句

「咦，今日係咪轉左你做司琴?」

「係呀，本身係Susan做架，但佢前日突然同我講話今日會帶個新朋友返教會想全程陪住佢所以搵左我頂佢喎…」

「嘩，咩朋友咁大面子呀… 肯定係男仔啦~」

「我又無問佢呀，一陣就知係唔係啦~」

「車~ 仲話係人地死黨，咩都唔知架。」

「果陣訓緊覺求其答應左佢就收左線喇… 」

「哦… 係喎，開始諗大學讀邊科未呀?」

「未呀，仲諗緊…」

「你就好啦，唔駛考A-level可以直接入大學…」

「果陣叫左你比心機讀書架啦，你唔理我淨係顧住玩咋嘛…」

霎時間，他們又好像回到以前沒有隔膜的時候，一句緊接一句閒聊著。


開心時光過得特別快，轉眼間巴士就到站，他們走到教會門口便看見了Susan正和一個男孩閒聊著。

「嘩，真係男仔喎! 你睇Susan今日仲好明顯裝扮過著得咁靚!」男孩子說道。

Rachel看見這情境，心入面已大概估到這男孩是誰。

(死女包，終於得償所願叫到佢返我地教會?)

「嘿嘿，我地快D行過去打聲招呼先啦~」



「咦，你地好返喇? 一齊返黎嘅?」

Rachel和男孩走到去Susan面前本身想質詢Susan，誰知反被Susan搶先一步將軍殺過措手不及。

「我地不嬲都無事，係你地亂up咋嘛。衣位俊男咁生面口嘅，你唔介紹下?」還是男孩首先冷靜下來帶回正題。

「佢係Elven，我中學同學，今日第一次返我地教會呀。」Susan心情極好地介紹著。

心裏猜想得到証實，Rachel立即對Susan展示出一個只有她們兩個才懂的笑容，因為Elven一直是Susan的暗戀對像，所以她對這名字並不陌生。

「你好，我係Rachel呀，Susan的好朋友。」

「你好，我係Daniel，都係Susan的好朋友。」

「Rachel，Daniel你好呀，nice to meet you~」

「我代表我地教會歡迎你~」Daniel 作了一個歡迎的手勢。

「好啦，唔好咁老土啦，就快開始我地入去啦~」Susan不想給Elven壓力便接著說道。

入到去，Rachel就走到台前和其他教友預備一會崇拜的事宜，Daniel就周圍和其他教友打招呼。Susan側帶著Elven坐下然後和四周的教友談天。

隨著琴聲響起，崇拜亦正式開始。不過整個崇拜Elven卻總是不自覺望向鋼琴的方向，不知為甚麼，由他望見Rachel第一眼開始，就有種很熟悉又親切的感覺想親近她，所以眼睛總是不期然會望向她。事實上其實他亦不明白自己為何會突然答應Susan返這教會，以前Susan不時也會邀請他但他總是拒絕，但在前幾天當Susan又再問他的時候，他腦海突然有個聲音告訴他要答應，結果糊里糊塗這天便來了這裏。

同一時間，Rachel在不用彈琴的時候不時也同樣會望向Elven的方向，因為不知為甚麼她對Elven好像有種溫暖的親切感，好有老朋友的感覺。

(或者係因為我成日都聽Susan講起佢所以感覺好熟悉?) Rachel這樣和自己解釋。

崇拜完結後，大家又開始和不同的教友寒暄。這時由於Susan正在和另一教友談天，Elven在旁邊不期然又在尋找Rachel的身影，誰知當他看見Rachel時Rachel亦碰巧望著他，他笑了一笑便走近了Rachel。

「其實我地之前係咪見過? 唔知點解我總係覺得你好熟口面。」

Rachel聽到後心裏想了句 ”我都係”，不過嘴裏卻說

「見就應該無見過，不過之前我都聽Susan提起過你個名幾次。」
(其實點只幾次，幾百次都可能有…)

「提起我? 無啦啦做咩提起我?講我壞話呀?」

「無呀，講話佢學校有個文武全才的萬人迷好受歡迎啫~ 同埋話邀請過你幾次返教會你都請佢食檸檬囉~」

「你聽佢亂up啦，佢最叻就係將所有野誇張化…」

「有無誇張就要之後慢慢觀察下先知喇~ 點都好，好高興認識你，再次介紹我係Rachel，陳天恩~」說完Rachel伸出了手。

「我都好高興認識你，我係Elven，黃天佑~」Elven亦伸出手說道。

隨著兩手雙握，新的故事又會否隨即展開?

好勁 樓主 好睇 支持

多謝支持

2. 認識

當晚Susan打了電話給Rachel。

Rachel: 「點呀Susan姐，今日好開心啦~」

Susan:「唔好笑我啦，雖然我都真係好開心~」

Rachel:「你睇你春心蕩樣個發姣樣… 你今次用左咩魔法可以邀請到你個男神返我地教會呀?」

Susan:「我都唔知呀… 其實大家上左大學後都好少見，幾日前咁岩中同聚會見到咪又問下佢，本身都預左佢會推，點知佢今次突然應承喎。」

Rachel:「莫非佢終於比你的誠意感動到?」

Susan:「唔會啦… 咁你覺得佢點呀? 係咪同我描述嘅一樣?」

Rachel:「都真係幾靚仔幾nice呀，唔怪得俘虜左你個少女心咁多年，連之前阿Paul最後都決定唔要啦~ 不過都要提提你，人地有女朋友架，唔好咁沉船呀…」

Susan:「咁我都知… 可以見佢多D我都好滿足架喇，將來係點就隨緣啦，反正都單戀左咁耐~不過佢地long D都keep到咁耐真係勁，証明佢都係一個長情嘅人~」

Rachel:「我真係無你乎， 應該佢做咩你都覺得係優點架喇… 咁你有無問佢以後仲會唔會返我地教會呀?」

Susan:「有呀，佢話以後得閒嘅話都可以返下喎~」

Rachel:「咁你以後加油喇~」

Susan:「當然! 咁你又點呀? 今日同Daniel一齊返嘅? 你唔避佢喇?」

Rachel:「咁岩巴士站撞到咋， 我仲邊敢再約佢呀…」

Susan:「都唔明佢諗乜架，你咁好點會唔鍾意你架… 你又係，人地講一句你就縮晒沙咁，比D熱情追佢返黎嘛!」

Rachel:「唉… 我都唔知…學你話齋，隨緣啦…」

Susan:「幸福係要自己爭取架! 你睇我幾努力~」

Rachel:「我就係做唔到你咁型嘛…」

Susan:「唔講衣D住喇，大學D野諗成點呀?」

Rachel:「仲諗緊呀… 不過應該都係港大Social Science或者BBA機會大架喇。」

Susan:「Elven讀HKU架喎，你如果有野想問都可以問下佢呀。」

Rachel:「好喎，不過等真係有野想問先麻煩佢啦~」

Susan:「share個contact比你有需要你自己add 佢MSN或者打比佢啦~」

Rachel:「唔該晒~」


過了兩星期，Rachel加了Elven的MSN

「Hi Elven，我係Rachel呀。」

Elven:「Hello Rahcel，近排比較忙所以無返教會呀，得閒D我會返下架喇…」

Rachel:「哈哈，我搵你唔係逼你返教會呀…」

Elven:「係? 因為Susan係咁問我，潛意式以為你都係… 哈哈」

Rachel:「放心啦，我唔逼人返教會架~ 搵你係想問下你HKU D野架，我黎緊要揀科喇」

Elven:「咁快手? 你想讀港大?」

Rachel:「係呀，岩岩好彩夠分拔尖… 諗緊讀Social Science港大好似係最好。」

Elven:「原來你係高材生! 好犀利呀~ Social Science我唔太熟，等我問一問人先。你成績咁好點解唔讀醫科呀?」

Rachel:「我讀文科入唔到醫科呀， 同埋都真係無咩興趣…」

Elven:「icic~ 岩岩問左hallmate，佢話Soc Sci應該HKU同CU最好，但就睇你想主修咩野。 例如journalism、geography、 econ 就CU好D，但psychology、social work、 politics等就HKU好D，名氣同排名上HKU都應該好DD。」

Rachel:「好快手! Thanks ar~港大D hall係咪玩得好犀利架? 你覺得間大學點?」

Elven:「港大好多hall同埋D hall嘅文化同其他大學係好唔同 ，衣度好講你要投入hall的生活同文化，所以好睇你鍾唔鍾意，鍾意就好開心，唔鍾意就會覺得好chur。我入左間新hall相對無咁chur，但其實大家都好想建立多D野將佢都變傳統hall咁，唔係就好無特色，所以變左另類嘅chur，但又無其他舊hall威逼性咁強。至於大學都幾好呀，香港最高學府喎，環境靚又近西環。我自己個人認為啦，港大D人係smart D醒D，但世界仔D，而中大就與世隔絕D，D人係乖D純D。」

Rachel:「我都有聽聞過。會考讀書讀夠喇，入到大學我都想explore多D唔同嘅文化同生活。咁你係邊間hall?」

Elven:「你唔駛考AL已經好好多喇，考完你真係會覺得會考其實好輕鬆… 我入左C-hall呀，一間新男hall。」

Rachel:「咁你一定真係好鍾意同成班男仔玩喇!」

Elven:「哈，ok la。為左女朋友只好犧牲下…」

Rachel:「Wooo，好偉大呀~」 (Susan睇黎你都真係幾難有機會喇…)

Elven:「係喎，下星期港大i- day (information day)喎，你得閒都可以黎參觀下呀，大把人同你介紹~」

Rachel:「我會黎呀~ 到時睇下有無機會搵下你呀。」

Elven:「好呀，我多數會係hall個showroom。」

Rachel:「咁到時見，唔該晒你呀~」