北馬里亞納群島聯賽，曾經有香港球員參與？

2019年11月

北馬裡亞納群島U仔隊喺外圍賽入面失咗44球， 成為比賽嘅大魚腩，但佢哋都創造咗一個自己嘅歷史。

2020年亞足聯U19錦標賽外圍賽出現唔少懸殊嘅比數，輸得最大煲係北馬里亞納群島，喺G組佢哋四場比賽總共失咗44球，其中對住泰國隊失咗成21球。

北馬里亞納群島加入亞足聯後，一直都係亞洲墊底嘅魚腩，即使有發展青年足球，但大部分球員都係本住志在參與嘅心態，缺乏嚴格訓練之下，經常輸到大大煲。

今次北馬里亞納群島U19並非毫無準備，幾個月前就曾經去到日本嘅愛媛縣松山市集訓，同當地嘅大學隊以及高中隊友賽，但由於實力嘅差距，去到外圍賽都係輸到趴喺到，有部分球員接觸足球嘅年份唔係好耐，對住泰國嘅一場可以睇到有部分球員基本功及意識都係麻麻，全靠意志搭救。

但係其實北馬里亞納群島喺今次嘅外圍賽差啲寫下歷史一頁，對住汶萊隊差少少就可以拎到呢個外圍賽嘅歷史嘅第一分，汶萊嘅實力會比北馬里亞納群島好一啲，但呢場世紀弱隊之戰踢得好似石地街場跟隊一樣，雙方都有好多嚴重失誤，例如守門員接普通嘅高空波經常性判斷錯誤連嗰波都掂唔到，汶萊脆弱嘅後防令到北馬里亞納群島可以靠有韓國血統嘅前鋒Sunjoon Tenorio梅開二度，但最後都係因為一啲自身毛病犯錯令到北馬輸3比4。

其實北馬嘅球員水平係咪真係咁差呢？又唔係，好似Sunjoon咁，喺美國嘅薩福克大學隊都入咗唔少波， 差極都有個譜，係全隊入面比較識得踢波嘅一個，但足球係講十一個人整體嘅合作性，由於組織上比較混亂，好多時隊友都畀唔到支援佢。

雖然四場波失咗44球，但都入咗3球，成功入波係北馬喺呢個比賽入面嘅第一次，相信冇球員係想一場裏面失超過廿球，但有陣時實力差距係冇辦法，只能夠盡力去踢， 盡力去減少失球，盡力去爭取入球，對於北馬嚟講，面對實力畀自己高嘅對手，成功組織到攻勢已經好難得， 更何況係入波，仲要一次入三球！雖然一球係烏龍波人哋送，但絕對係一個好開始。

2019 M甲冠軍 - 後生椰子蟹


一啲國家或地方足球聯賽，出現隊數不足嘅情況，無法尋找其他球會頂替之下，可能會派出青年隊參賽，一來可以維持隊數，二來可以訓練青年球員，今年北馬里亞納群島嘅官方男子足球聯賽M*League Division 1就出現咗呢個情況，M*League勁旅MP United FC今年冇參賽，於是北馬里亞納群島足協就搵咗北馬里亞納群島U18代表隊頂替MP United，北馬里亞納群島U18代表隊以''Teen Ayuyu''為名參賽， Ayuyu即係椰子蟹，係代表北馬里亞納群島嘅一種動物，最後臨時參賽嘅''Teen Ayuyu''奪得今年嘅M*League Division 1冠軍。

M*League Division 1雖然係北馬里亞納群島官方十一人足球聯賽，但係佢哋嘅聯賽發展仲係好落後，今年分常規賽同季後賽，常規賽有7支球會參加，包括Kanoa、KFAS、Matansa、Paire、Tan Holdings、Teen Ayuyu及The Old B Bank，全部業餘性質，場地不足之下，冇主客之分，大部分聯賽賽事都會喺塞班島嘅Oleai Sports Complex踢，各隊喺常規賽先踢6場，常規賽冠軍進入季後賽4強，另外6支進入季後賽首圈，6支球會會由抽籤決定對乜，一場過，贏波入4強。

M*League Division 1屬於亞足聯管，其實可以參加亞洲比賽，但球會方面從來冇參加過，北馬里亞納群島暫時無意參賽，所以冇需要跟亞洲標準，有屬於自己賽制，亦冇限制外籍球員加入，M*League Division 1成立以來，就出現過捷克、日本、中國、香港、菲律賓等球員，但都唔係職業外援身分加入，只要你喺北馬里亞納群島取得工作資格，就可以註冊踢M*League Division 1，有外籍人士喺北馬里亞納群島開工，都會註冊加入球會踢衛生波。

因為有太多特殊因素，M*League Division 1未能好似其他亞足協成員國咁，大力推行自己嘅聯賽，每年都有變化，要睇到佢哋踢亞洲比賽，暫時冇乜呢個可能。

塞班同關島都好多菲律賓好人

係咪去個邊打工就有機會踢波

汶萊唔係有個踢李斯特城嘅王子咩? 踢到同呢隊55波

U19兩回事嚟嘅，汶萊成人隊有部分球員喺DPMM踢職業，冇王子喺到，都唔會話完全任人魚肉，但U19只係喺汶萊踢業餘比賽，所以可以爭好遠吓。