而家諗番起，所有野都係由個時發生，如果我有堅持話唔好，佢就唔會踩得咁深。但我個時只係一心諗住傳銷係咪姐係好似保險咁？因為佢原先都做緊保險。所以只係話，"點解你專揀呢d黎做架？" 佢只係笑一笑就無再答我。我諗佢應該只係講下唔係真，就無再討論落去。
惡夢就係咁開始，佢開始上左一星期d唔知咩course，其間我地有嗌過交，斷過一排contact。到我地再一齊番，先發現佢成個人唔同哂，開口埋口都話要賺大錢，連同我行路搭車都諗點樣上多一個階級。我地由以前既一星期見幾次，到而家一星期什至兩星期都未必見一次。由以前唔會講大話，到而家講大話都唔眨眼。仲成日話要番上大陸傾生意。
我問佢"點解你咁忙，其實你個行係做咩架？係咪呃人架？"(當時我真係無咩傳銷概念) 佢就話"梗係唔係啦，我地有貨揸係手，無貨個d就話呃人姐。"
到我再追問，先發現佢原來入到幾萬貨。而佢自己每晚都有食賣個d貨，仲好似上哂身咁，個人精神d都話係關d保健產品事，我個下就覺得好唔妥。
番屋企做下research先知，原來佢真係中哂招。d傳銷公司手段就係開頭要d p仔上一星期d洗腦course，然後上心態course，不停話你知，點解呢行有d人成功賺大錢，但又有咁多人唔成功呢？就係因為個d人心態唔夠強，未夠努力。仲有就係每晚要你係間傳銷公司做到十二點幾一點，有時什至兩三點，目的就係唔俾你有個人思考空間，迫你坐係到同d人一齊討論點賺大錢。言歸正傳，自從佢做左呢行之後，我一直都好後悔無阻止到佢。每晚都好擔心佢既程度係，會成日半夜訓唔著又開燈上網睇傳銷d資料，希望有一日可以print出黎話佢知佢行錯路。
只可惜我而家只係輕輕帶過話傳銷呃人，佢已經黑哂面。有次仲話其實女朋友成日都問三問四會令人好厭煩。我一直都好想俾d資料佢睇，但又怕會從此無左佢。。。身邊既朋友都叫我離開佢，話佢搞成咁無得救，佢而家無叫你買佢d貨咪偷笑。
我地一齊咗已經好幾年，真係好唔想睇住佢沉落去，真係好擔心佢，但又唔知有咩方法可以救到佢。係咪真係要等佢跌到好痛佢先會醒悟呢？同時我又唔知自己應唔應該繼續同佢一齊，雖然自己真係好愛佢。佢做左呢份工之後，我就好似無左個男朋友咁。自己唔開心又或者擔心佢都唔可以開口同佢講，驚會俾佢覺得我唔理解佢而家份工又或者令佢覺得麻煩，又驚又會俾佢話我發放d負能量影響佢工作。想有人陪唔可以出聲，因為會影嚮佢做野。明知道佢做緊間公司前身就係亮碧思，佢繼續做落去只會自己死，但每次見到佢都唔可以同佢講呢d，因為一講佢就會反面。再加上一啲私人自私理由，自己就黎要考一個好重要既試，關乎將來前途問題，實在唔可以擺咁多精神係佢到同佢抝傳銷係咪呃人。
自己每晚熄燈之後諗起以前佢未變成咁之前，都會喊到成個枕頭濕哂。如果大家聽到自己另一半話想做傳銷去聽下講座先，一定一定要反對，千其唔好好似我咁白痴無腦，事後都佢入去做先識得後悔，想拉番佢出黎又唔分手真係好難。
最後想問下，有無方法仲可以救到佢但又可以保住我地既感情呢？感謝。
