三十歲人，有啲生涯劃規經驗想分享畀後生仔女

Kume 2020-09-17 20:35:30

想畀多啲學生哥睇到，所以放校園台。

小弟行將三十，最近終於理解世界運作方式。無奈人生已經定形，好多嘢無法扭轉。如果早十年明白呢一套，照住佢去規劃人生，今日應該過得好好多。

依家後生好叻，大把人醒過我，但肯定亦有唔少迷途羔羊。自己失敗咗，唔想人地步我後塵，所以特登分享以下經驗。廢話唔多，有嗰句講嗰句。

一、讀書只係為搵錢鋪路
人生粗略分為兩個階段：（一）讀書期。（二）搵錢期。後者先係主菜，起碼佔你人生七成。讀書只係為搵錢鋪路。就算年年考第一，畢業後搵唔到錢都係失敗者。相反，如果你搵到好路數，中學畢業已經足夠。呢一點好重要，我以前就係被表象迷惑，困住喺讀書期，走唔到出嚟。唔好因為種菜要除草，就忘記自己種緊菜，除草只係為種菜服務。做人核心永遠都係搵錢。

就算唔求發達，衣食住行全部要錢，人一定要搵錢。方法不外乎打工同創業，核心原理係交換利益：有咩係人地需要，而你可以提供到？提供到就換到錢，否則就冇錢。

二、閣下有咩賣點
又不妨將自己當成一件商品，你賣點係咩？你係搶手貨定籮底橙？一個人嘅價值，主要由以下條件組成。評估吓自己值幾錢。

1. 生產技能。例如煮飯、拍片、整車、寫程式、外語能力，即係你嘅生財工具。離開學校之前，你最少要有一件呢啲工具。
2. 工作經驗。你運用某技能搵錢嘅資歷越長，人地對你嘅技能越有信心。呢個係無形資產，可以提高叫價能力，轉工升職亦都靠佢。
3. 人氣。行出街有冇人識你？越多人識，人氣越高。人氣未必可以直接轉做錢，但對你做事業或者有幫助。所以明星鍾意開餐廳，因為顧客對佢有印象，會優先幫襯。呢個就係人氣嘅威力。依家有youtube、facebook，普通人都可以拍片、寫文幫自己累積人氣。
4. 人脈。你朋友之中有冇社會上流人士？對你事業有冇幫助？唔一定講錢咁市儈，至少可以提供寶貴意見，開闊眼界。
5. 溝通能力。搵錢即係同人合作，合作必須溝通。如果你思維清晰，口齒伶俐，會加好多印象分。
6. 外表。明星、藝人、模特兒可以靠樣搵食，因為佢地靚仔靚女。雖然係天生，不過後天都可以執，例如化個靚妝，恤個靚髮，著衫講究啲。男仔可以練大隻。如果份工需要拋頭露面，呢樣嘢都好重要。
7. 性格。雖然相對次要，但唔係冇用。如果你樂觀積極，討人歡喜，自然有更多機會。有嘢求人，人地都傾向答應。黑口黑面，一定神憎鬼厭。

如果要打工，人地請唔請你就係睇呢啲。
學歷唔重要，實力同工作經驗先係王道。如果目標清晰，中學畢業就應該出來做嘢。哪怕升職或者需要學歷，你都可以半工讀。先上車，再補飛，點都冇死。

三、目標才是王道
最緊要有目標，目標主導一切。及早訂立目標，猶如偷步起跑。但你唔會被取消資格，只會更快衝線，何樂而不為？

哪怕你係中學生，得十幾歲，都要盡快選定未來職業，脫離「唔知想點」嘅狀態。唔好覺得有大把時間，可以慢慢睇到定，冇咁嘅事。如果一直拖延到畢埋業都仲係「唔知想點」，咁就係工揀你，唔係你揀工，主導權喺人地喥。

咁樣好大機會向下流，被迫從事籮底橙職業。例如侍應、洗碗、看更、工廠工人，共通點係經驗唔值錢，無前途可言。執檯三年、洗碗五年，唔係升職加薪嘅理由。做呢類工始終要搵路走，我相信冇人會當侍應係終身職業。所以你今日唔諗自己想做咩，終有一日都要諗。

四、理想職業
揀理想職業，門檻越高越好，所謂專業人士：醫生、律師、工程師，you name it，呢啲工長期缺人，難以取代。有咗目標，就設法鋪路。想做醫生，就要讀理科。想教書，可以試吓幫小學生補習，累積經驗。

當然，唔一定醫生、律師咁老土，你應該評估自己有咩優勢。如果屋企有家族生意，哪怕只係街市一個檔口都好，繼承祖業絕對係明智之選，可以慳返好多時間。如果你天生麗質，可以考慮幕前工作，有一班樣衰嘅人搶唔到你飯碗。你母語係普通話，可以考慮教鬼佬中文。總之，策略係揚長避短，減少競爭者。

五、藍領行業生態
如果你自問讀書唔叻，藍領技術工係唔錯嘅選擇。但係今時今日，再唔係就咁行入鋪頭就可以做學徒嘅年代。我嘅經驗證明所有「招聘學徒」嘅學徒都唔係真學徒。因為公司唔想花成本訓練新人，只會請職業學院嘅畢業生。咁樣亦可以保障本行人飯碗冇咁輕易被人搶走。簡單來講，如果你目標職業係整車、水電維修、烘麵包等，中六畢業即刻報VTC課程，讀兩年就可以入行了。

六、小心投資時間
本文對象係十幾廿歲嘅人，你地勝在後生，可以急起直追。哪怕你今日ABC都未識，仲可以用一兩年時間征服英文。

時間係最寶貴嘅資源。廢柴同成功人士都要食痾瞓，但佢地其餘時間投放喺唔同地方，活出兩種人生。善用時間可以拋離競爭者。點樣善用時間？

生活中所有行為可以分兩種：（一）消費，例如食嘢、睇片、聽歌。（二）生產係辛苦嘅，例如煮飯、拍片、作曲。

同樣付出時間，消費係畀錢買服務，換取短暫快樂。生產係用技能創造財富，有長遠利益。回顧一日時間表，你消費定生產多？所謂善用時間，就係多生產，少消費。就算消費，都揀啲有回報嘅，例如睇片學英文，唔好睇廢片。睇廢片都睇英文廢片。

以上原則，日常生活應該時刻銘記。例如運動可以強身健體，但唔應該沉迷，因為對你進入人生第二階段（搵錢期）冇幫助。讀書讀到悶不妨落街打下波伸展筋骨，但加入校隊就唔建議，用練波時間去學英文唔好咩？

七、餘緒
1. 如果你係初中生，記住第日揀理科，一定要揀理科。因為創造財富嘅技能大部份需要理科出身。就算對文史哲好有興趣，都要揀理科。理科隨時可以轉文科，文科好難轉理科。呢個定理恆古不變。文史哲唔會消失，永遠等緊你。安身立命之後，大把時間畀你鑽研，唔洗急住十幾歲就鍾個頭埋去讀。
2. 高中生不幸揀咗文科，咁就專攻外語。英文唔洗講，基本嘢。大把人識英文，最好搭多一種外語，加強優勢。
3. 強烈建議年青人嘗試經營youtube頻道。一次過練晒剪接、寫稿同演說三種生產工具，好運嘅仲可以吸埋人氣，一舉四得。
4. 學校勝在有好多機會比你實習，課外活動小組，例如拍片嘅來累積經驗。參加比賽，例如對你有幫助。
5. 如果對未來生涯毫無頭緒，做暑期工儲錢一定冇蝕底。第日有idea，呢啲錢都會幫到你。例如突然想學日文，就可以用來交學費。
6. 保護好你地對眼。當兵又好，揸飛機又好，做演藝工作都好，戴眼鏡係障礙。有淺近視都要護眼，唔好畀佢變深近視。
7. 如果你已經廿歲出頭，入咗行，其實仲有時間可以探索。入錯行，出返來轉工都仲未遲。

偽娘（失業） 2020-09-17 20:38:52

一句講晒，窮撚咪撚讀乞食科