較早前楊明與黃店老闆合照,後者展示五大訴求缺一不可手勢,網上瘋傳,這位藍絲藝員被同路人罵個半死,他才知中伏,反擊:「五個一排,全部拉晒」,女友莊思明措詞更強硬:「賤人就係會用賤招去害人,得啲白癡先會信你哋。」這句話連自己男友也罵上了。
章偉鎽沒想過「楊明」立萬,冷不防相片掃下17,000個like;他坦言並非存心設伏,不想陷對方於不義(或者正義),之後在圖下補充事件始末;對於莊思明大罵「黃絲賤種」,他說:「我都明白,佢哋身為明星一定要澄清,擔心斷財路嘛大佬!」至於楊明回敬「五個一排」,應如何賞析?「藍絲鍾意點諗就點諗,佢哋話隻馬係鹿都得啦!」
記者問章偉鎽何故深黃,他答:「黃?有批判性思考就黃。」他在社運期間早上練波,夜看街頭燈火闌珊。楊明有份演出《愛.回家》,當時阿鎽每晚都能回家,不曾五個一排,只是球員生涯受考驗,「三、四點回家,第二朝起到身練波,頹啲咁練,主要係心情頹,你見咁多手足被捕,見到爆晒眼,流晒血,第二日邊有心情練波?」他司職中場防守,本應是全隊跑動最多的一員,結果是最頹的一個,入球也不慶祝,隊友問:「你搞咩?」生活完全圍繞抗爭,日子如夢似幻,一天女友通知他:「噚日係我生日。」
爸爸早逝,媽媽勞碌半生捱大兒子,誰願放手?「佢見到有人流血、爆眼,好驚自己個仔係下一個。」姨母患癌,半夜在醫院也打給阿鎽:「返屋企未?安全未?」又叮囑:「做咩都好,最緊要睇住自己!」到得後來病毒抬頭,爬山不再,港超也暫停,他說:「做咗全職足球員兩年,疫情之下,幾鍾意踢波都冇得踢,我而家覺得冇踢波冇乜特別,我以前一直唔敢想像我唔踢波。」
https://hk.appledaily.com/local/20200913/D5FZZIBD7BETRK4CMPUUGJONZU/